भांगरभूंय | प्रतिनिधी
नवी दिल्ली, खबरां संस्था : नागरिकत्व दुरुस्ती कायद्या खाला (सीएए) बुधवारा पयलेच फावट १४ जाणांक ‘नागरिकत्व प्रमाणपत्रां’चो पयलोच संच दिलो. तीन शेजारच्या देशांत छळ जाल्ल्या बिगरमुस्लीम स्थलांतरितांक वादग्रस्त थारिल्ल्या सीएएतल्या तरतुदीं प्रमाण भारतीय नागरिकत्व दिलें.
केंद्रीय गृहमंत्री अमित शहा हांणी ह्या दिसा ईतिहासीक दीस म्हणलां. पाकिस्तान, बांगलादेश आनी अफगाणिस्तानांत धर्मीक छळ जाल्ल्या नागरिकांनी हाची फाटल्या कितल्याच्याच दसकां सावन वाट पळयल्ली. तांची प्रतिक्षा आतां सोंपल्या अशी प्रतिक्रिया शहा हांणी उक्तायली. १४ जाणांच्या अर्जांची ऑनलायन प्रक्रिया पुराय केल्या उपरांत गृहसचीव अजय कुमार भल्ला हांणी १४ जाणांकडेन नागरिकत्व प्रमाणपत्रां दिलीं.
छळाक लागून बांगलादेश, पाकिस्तान आनी अफगाणिस्तानांतल्यान ३१ डिसेंबर २०१४ वा ताचे पयलीं भारतांत आयिल्ल्या हिंदू, शिख, जैन, बौद्ध, पारसी आनी ख्रिस्ती स्थलांतरितांक भारतीय नागरिकत्व दिवपाक डिसेंबर २०१९ त ‘सीएए’ अमलात आयिल्लो. ताका राष्ट्रपतींची मंजुरीय मेळिल्ली. मात ज्या नेमां प्रमाण भारतीय नागरिकत्व दिवपाचें आशिल्लें तें चार वर्सां उसरां म्हळ्यार फाटल्या ११ मार्चाक जारी केल्लें.
लोकसभा वेंचणुके खातीर १९ एप्रील सावन मतदानाचे टप्पे सुरू जाले. हे वेंचणूके मदीं आसतना सरकारान १४ जाणांक भारतीय नागरिकत्व दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
