भांगरभूंय | प्रतिनिधी
पणजी : १३० कोटी गुंतवणूक भानगडीचो मुखेल सुत्रधार मायरन रॉड्रिग्जचे पयले बायलेक गुन्यांवकारी आरोपा खातीर अटक केल्ली. दक्षीण गोंय जिल्लो न्यायालया वतीन तिका ५० हजारांचो वयक्तीक बॉन्ड आनी तितलेच किमतीचो हमीदार हाचे वांगडा अटी घालून जामीन मंजूर केलो. भारतीय दंड संहितेच्या कलम ४०६, ४२० आनी जीपीआयडी कायद्याच्या कलम ३ आनी ५ खाला सुनीता रॉड्रिग्जाक अटक केल्ली.
मायरन आनी ताची पयली बायल सुनीता हांणी चड व्याजाचें हांयस दाखोवन लोकां कडल्यान कोट्यांनी रुपया घेतिल्ले. हे पयशे परत करपाचे सोडून तांणी ते स्वता खातीर वापरिल्ल्याचें उक्तडार आयलां. ह्या प्रकरणांत सुनिता हिचो हात आशिल्ल्याचें मुखार आयलां. तिका पुलिसांनी जायते फावट चवकशे खातीर आपयिल्ली. मात तपासांत सहकार्य करूंक नाशिल्ल्यान तिका अटक करची पडली.
पुलिसांनी नोव्हेंबराचे निमाणे कडेन गुंतवणुकीची भानगड उक्तडार हाडिल्ली. मायरन रॉड्रिग्ज आनी ताची दुसरी बायल दिपाली परब हांणी शेअर बाजारांत गुंतवणूक करपाक लोकां कडल्यान पयशे घेतिल्ले. हो सगळो पयसो तांणी स्वता खातीर वापरलो. मजगतीं, ३८ जाणांनी कागाळ केले उपरांत पुलिसांनी हें प्रकरण उक्तडार हाडपाक पत्रकार परिशद घेतली. सुनीता रॉड्रिग्ज हिचोय ह्या प्रकरणांत आसपाव आशिल्लो. तिका अटक केल्ली.
दक्षीण गोंय न्यायालया कडल्यान ५० हजारांची वैयक्तीक बॉन्ड आनी तितलेच किमतीचो हमीदार, घराचो नामो, मोबायल क्रमांक आनी पासपोर्ट तपास अधिकार्यां कडेन जमा करप, न्यायालयाच्या आदेशा बगर राज्या भायर वचप ना, जामिनाचेर सुटका जाले उपरांत ८ दीस पुलीस बंदखणींत हजेरी लावप. असल्या अटीं सयत जामीन मंजूर केला. ह्यो अटी मोडल्यार जामीन रद्द करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
