भांगरभूंय | प्रतिनिधी
नवी दिल्ली, खबरां संस्था: वेंचणूक आयोगान मंगळारा उत्तर प्रदेशांत स्पेशल इंटेसिव्ह रिव्हिजन (एसआयआर) ची मसुदो वळेरी तयार केली. हाचे वांगडाच १२ राज्यांनी एसआयआरचो पयलो टप्पो सोंपलो. मतदार वळेरी दुरुस्त करपा खातीर २८ ऑक्टोबर २०२५ सावन सुरू जाल्ली मोहीम २ म्हयने ११ दीस चल्ली.
एसआयआर पयलीं ह्या राज्यांनी ५०.९७ कोटी मतदार आशिल्ले. व्हॅरिफिकेशना उपरांत ४४.३८ कोटी उरले. सुमार ६.५९ कोटी मतदारांचीं नांवां मसुदा मतदार वळेरेंतल्यान काडल्यात. हीं नांवां १२ राज्यांतल्या वट्ट मतदारांच्या १२.९३% आसात, म्हळ्यार दरेका १०० मतदारां फाटल्यान सुमार १३ नांवां काडलीं.
मध्य प्रदेश-राजस्थानांत सुमारे ७.५ टक्के लोकांचीं नांवां काडल्यांत. म्हळ्यार हांगा दरेक १३वें नांव मतदार वळेरेंतल्यान भायर मारलां. तशेंच ही निमाणी वळेरी ना, जांचीं नांवां काडल्यांत, ते दावे-हरकती नोंद करपाक शकतात. फॉर्म ६ वा ७ भरून नांवां जोडून घेवपाक शकतात.
जाणून घेयात खंयच्या राज्यांनी एसआयआर मसुदो वळेरेंत कितले मतदार उणे जाले आनी वेंचणूक आयोगाचे युक्तिवाद कितें आसात.
मसुदो वळेरेंत सगल्यांत चड नांवां उत्तर प्रदेशांत काडल्यांत, हांगा दरेक १०० मदल्या १९ मतदारांचीं नांवां काडल्यांत, जाल्यार लक्षद्वीपांत हो आंकडो फकत ३ आसा. दुसरे कडेन पश्चीम बंगालाक दरेक १०० मदलीं ८, गुजरातांत १५, छत्तीसगडांत १३ जाणांचीं नांवां वळेरेंतल्यान काडलीं.
१. राजस्थानः ४१.८५ लाख मतदारांचीं नांवां काडलीं
राजस्थानांत ४१.८५ लाख मतदारांचीं नांवां एसआयआरच्या मसुद्याचे वळेरेंतल्यान काडलीं. मसुदो वळेरे पयलीं राज्यांत ५.४८ कोटी मतदार आशिल्ले, ५.०६ कोटी मतदारांचीं नांवां मसुद्याचे वळेरेंत आस्पावल्लीं. काडिल्ल्या मतदारांचें प्रमाण ७.६% आसा, म्हळ्यार दर शंबर मतदारांतल्या सुमार ८ मतदारांचीं नांवां काडल्यांत. मात ४१.८५ लाख मतदारांतले ८.७५ लाख मतदारांक मरण आयलां, ३.४४ लाख डुप्लीकेट वा बनावट, जाल्यार स्थलांतर, बेपत्ता आनी हेर कारणांक लागून २९.६ लाख मतदारांचीं नांवां काडल्यांत.
२. उत्तर प्रदेश: २.८९ कोटी मतदारांचीं नांवां काडलीं
उत्तर प्रदेशांतल्या एसआयआरच्या मसुद्याचे वळेरेंतल्यान २.८९ कोटी नांवां काडल्यांत. मसुदो वळेरे पयलीं राज्यांत १५.४४ कोटी मतदार आशिल्ले, १२.५५ कोटी मतदारांचीं नांवां मसुद्याचे वळेरेंत आस्पावल्यांत. काडिल्ल्या मतदारांचें प्रमाण १८.७२% आसा, म्हळ्यार दर शंबर मतदारांतले सुमार १९ मतदार काडल्यात. पूण २.८९ कोटी मतदारांतल्या ४६.२३ लाख मतदारांक मरण आयलां, २५.४७ लाख डुप्लीकेट वा बनावट, जाल्यार २.१७ कोटी मतदार स्थलांतरीत, बेपत्ता आनी हेर आशिल्ले.
३. मध्य प्रदेश: ४२.७४ लाख मतदारांचीं नांवां काडलीं
मध्य प्रदेशांत एसआयआरच्या मसुद्याच्या वळेरेंतल्यान ४२.७४ लाख नांवां काडल्यांत. मसुदो वळेरे पयलीं राज्यांत ५.७४ कोटी मतदार आशिल्ले, जाल्यार ५.३१ कोटी मतदारांचीं नांवां मसुद्याचे वळेरेंत आस्पावल्यांत. काडिल्ल्या मतदारांचें प्रमाण ७.४४% आसा, म्हळ्यार दर शंबर मतदारांतल्या सुमार ७ मतदारांचीं नांवां काडल्यांत. मात ४२.७४ लाख मतदारांतले ८.४६ लाख मतदार मेल्ले, २.७७ लाख डुप्लीकेट वा बनावट, जाल्यार ३१.५१ लाख मतदार स्थलांतरीत, बेपत्ता आनी हेर मतदार मेळ्ळे.
४. अस्तंत बंगाल : ५८.२० लाख मतदारांचीं नांवां काडलीं
अस्तंत बंगालांत एसआयआरच्या मसुद्याच्या वळेरेंतल्यान ५८.२० लाख नांवां काडल्यांत. मसुदो वळेरे पयलीं राज्यांत ७.६६ कोटी मतदार आशिल्ले, ७.०८ कोटी मतदारांक मसुद्याचे वळेरेंत आस्पाव केला. काडिल्ल्या मतदारांचें प्रमाण ७.६% आसा, म्हळ्यार दर शंबर मतदारांतले सुमार ८ मतदार काडल्यात. पूण ५८.२० लाख मतदारांतल्या २४.१७ लाख मतदारांक मरण आयिल्लें, १.३८ लाख डुप्लीकेट वा बनावट, जाल्यार स्थलांतर, बेपत्ता आनी हेर कारणांक लागून ३२.६५ लाख मतदारांचीं नांवां काडलीं.
५. गुजरात : ७३.७३ लाख मतदार काडले
गुजरातांतल्या एसआयआरच्या मसुद्याच्या वळेरेंतल्यान ७३.७३ लाख नांवां काडलीं. मसुदो वळेरे पयलीं राज्यांत ५.०८ कोटी मतदार आशिल्ले, ४.३४ कोटी मतदारांक मसुद्याचे वळेरेंत आस्पाव केला. काडिल्ल्या मतदारांचें प्रमाण १४.५२% आसा, म्हळ्यार दर शंबर मतदारांतले सुमार १५ मतदार काडल्यात. मात ७३.७३ लाख मतदारांतले १८.०७ लाख मतदारांक मरण आयिल्लें, ३.८१ लाख डुप्लीकेट वा बनावट, जाल्यार ५१.८५ लाख मतदार स्थलांतरीत, बेपत्ता आनी हेर आसात.
६. तमिळनाडू : ९७ लाख मतदारांचीं नांवां काडलीं
मिळनाडूंतल्या एसआयआरच्या मसुद्याचे वळेरेंतल्यान ९७ लाख नांवां काडलीं. मसुदो वळेरे पयलीं राज्यांत ६.४१ कोटी मतदार आशिल्ले, ५.४४ कोटी मतदारांचीं नांवां मसुद्याचे वळेरेंत आस्पावल्यांत. काडिल्ल्या मतदारांचें प्रमाण १५.१३% आसा, म्हळ्यार दर शंबर मतदारांतले सुमार १५ मतदार काडल्यात. पूण ९७ लाख मतदारांतले २६.९५ लाख मतदारांक मरण आयिल्लेंे, ३.३४ लाख डुप्लीकेट वा बनावट, जाल्यार ६६.७ लाख मतदार स्थलांतरीत, बेपत्ता आनी हेर आशिल्ले.
७. स राज्यांनी सुमार ५५ लाख नांवां काडलीं
तशेंच हेर ६ राज्यांतल्या मतदार वळेरेंतल्या मसुद्यांतल्यान व्हड प्रमाणांत नांवां काडल्यांत.
-छत्तीसगडांत २.१२ कोटींतल्यान २७.३४ लाख (१२.९%) नांवां काडलीं, आतां १.८५ कोटी मतदार आसात.
-केरळांत २.७८ कोटींतल्यान २४.०८ लाख (८.६६%) नांवां काडलीं, आतां मसुद्यांत २.५४ कोटी मतदार उरले.
-गोंयांत ११.८५ लाख मतदारां मदल्या १.०१ लाख म्हळ्यार ८.५२% नांवां काडलीं. आतां १०.८४ लाख मतदार उरल्यात.
-पुडुचेरींत १०.२१ लाखांतलीं १.०३ लाख वा १०.०९% नांवां काडून उडयलीं. आतां ९.१८ लाख मतदार उरले.
-लक्षद्वीपांत तांचो निकाल उणो आशिल्लो. ५८ हजारां मदीं १.६ हजार नांवां काडून उडयलीं (२.७९%), आतां ५६.४ हजार मतदार आसात.
-अंदमान आनी निकोबारांत ३.१० लाखांतल्यान ६४ हजार नांवां काडून उडयलीं (८.६६%), आतां २.४६ लाख मतदार उरल्यात.
एसआयआरा विशीं जाणून घेयात
बिहार उपरांत देशांतलीं १२ राज्यां आनी केंद्रशासीत प्रदेशांत एसआयआर २८ ऑक्टोबर सावन सुरू जालां. हे प्रक्रियेत मतदार वळेरेचें अद्ययावतीकरण करतले. नव्या मतदारांचीं नांवां जोडटले आनी मतदार वळेरेंतल्यो चुको सुदारतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
