भांगरभूंय | प्रतिनिधी
२.२० लाखांचे मॅपिंग ना
पणजी : राज्यांतल्या मतदारांचे विशेश फेरतपासणी (एसआयआर) खाला आतां मेेरेन १०.५५ लाख (९६.५ टक्के) मतदारांचे एन्युमरेशन फॉर्म संकली जाल्यात. सुमार ९० हजार मतदारांचे फॉर्म परत आयल्यात. अशा मतदारांचीं नांवां मसुदो वळेरेंत येवचीं ना. सुमार २.२० लाख मतदारांचे वा तांच्या आवय बापायचें नां २००२ च्या मतदार वळेरेंत ना. अश्या मॅपिंग जावंक नाशिल्ल्या मतदारां विशीं सुनावणी घेवन निमाणो निर्णय घेतले, अशी म्हायती मुखेल वेंचणूक अधिकारी संजय गोयल हांणी दिली.
आयतारा पणजे जाल्ले पत्रकार परिशदेंत गोयल हांणी, फॉर्म परत येवंक नाशिल्ल्या ९० हजार
मतदारांचो एएसडीडी हे श्रेणींत आसपाव केला. हातूंत मारण आयिल्ले, हाजीर नाशिल्ले, दोट्टी नांवां वा नामो बदलिल्ल्याचो आसपाव आसा. ९ डिसेंबराक जारी जावपी मसुदो वळेरेंत हांचीं नांवां आसचीं ना. अशा मतदारांचीं नांवां ऑनलायन आनी ऑफलायन पद्धतीन जाहीर करतले. हातुंततलय कोणाक आपलें नांव चुकीचे पद्धतीन काडिल्ल्याचें दिसल्यार तांणी ७ फेब्रुवारी आदीं अर्ज ६ भरून दिवप गरजेचें.
अशा मनशांक घोशणा पत्रूय दिवचें पडटलें. सगलीं कागदपत्रां योग्य आसल्यार ह्या मनशांचीं नांवां निमाणे मतदार वळेरेंत घेतले. राज्यांत ह्यान पयलीं २००२ वर्सा एसआयआर जाल्लें. २००२ आनी २०२५ च्या मतदार वळेरेचें व्हॅरिफिकेशन केलें तेन्ना सुमार २.२० लाख मतदारांचे मॅपिंग जावंक ना. हाचोच अर्थ २.२० लाख मतदारांचें वा तांची आवय वा बापायचें नांव २००२ च्या मतदार वळेरेंत ना. ह्या सगल्या लोकांचें नांव मसुदो वळेरेंत येतलें.मात तांकां नोटीस धाडटले. तांकां आपलें नांव आदींय आशिल्लें हें सिद्ध करचें पडटलें. हे खातीर सुनावणी घेवन निमाणो निर्णय घेतले.
जिल्लो पंचायत केंचणुकेंत मतदान करपाक मेळटलें
गोयल हांणी, मॅपिंग जरी जावंक ना तरी २.२० लाख मतदारांक जिल्लो पंचायत वेंचणुकेंत मतदान करपाक मेळटलें. मात हे खातीर तांचीं नांवां जिल्लो पंचायतीचे मतदार वळेरेंत आसप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
