भांगरभूंय | प्रतिनिधी
ॐकार गोंयांत थाण मारून बसला म्हूण हांगचे लोक भियेल्यात म्हणपाचें वाचूंक मेळटा. भियेवपाची गरज ना म्हणपी सद्याक गोंया भायर आसा. ॐकार गोंयांत येवपाचें कारण कितें आसूं येता काय? कांय दिसां फाटल्यान सिंधुदुर्गांत गोंयची एक कंपनी रोजगार मेळावो घेवची आसली. तशी जायरात थंयच्या वर्तमानपत्रांनी प्रसिद्ध जाली आनी कांय गोंयकारांच्या पोटांत कल्ल जालें. जातलेंच न्ही. गोंयकारांचे पोट मारून भायल्यांक जर नोकर्यो दिल्यो जाल्यार गोंयच्या तरणाट्यांनी कितें करपाचें? गोंयांत बोवाळ जालो आनी कंपनीन ह्या बोटावेली थुकी त्या बोटार व्हेली. कंपनीन जायरात दिलेबगर थंयच्या लोकांक कशें कळ्ळें की ही कंपनी कामगार घेवची आसा म्हणून? कंपनीन कोणाक तरी कळयलां आसतलेंच न्ही. आनी आमच्या सरकाराचो तेंको आसले बगर कंपनी असलें पावल उबारूंक शकता तर?
हो ॐकारूय तीच जायरात वाचून बी गोंयांत येवंक भायर सरूंक ना मूं? असो बेठोच प्रश्न मनांत आयलो. तोय बाबडो थंय बेकार आसतलो. कोंकणांतल्या लोकांक गोंयांत नोकर्यो मेळटा जाल्यार आपणांकूय काम मेळूं येता ह्या उद्देशान तो गोंयांत भितर सरला आसूंक येता. जाल्यार कंपनीन ती जायरात फाटीं घेतल्या म्हणपाचें ताका सांगूक जाय. पूण तो कामाच्या सोदांत आयला काय जाग्याच्या हेंय पयलीं जाणून घेवचें पडटलें. गोंय सरकार सद्याक बरेंच उदार जालां. वेंचणूक लागीं पावता तशें सरकाराक लोकांक भुलोवंक जायतें कितें करचें पडटा. ना तर परिवर्तनाचो भंय आसता. देखुनूच सरकाराक एकेक नवी स्कीम हाडची पडटा. फुकट रेशन, जाण्ट्यांक आनी बायलांक दुडू अशें हांयस दाखोवचें पडटा. आतां एक नवी स्कीम सरकारान काडल्या. सरकारी आनी कोमुनिदाद जमनींत आशिल्लीं बेकायदेशीर घरां कायदेशीर करपाची स्कीम. आतां हाचो लाव कोणाक मेळटलो तें रोखडेंच कळटलें. मदींच कोणेतरी प्रायव्हेट जाग्यांचेर बांदिल्लीं घरांय कायदेशीर करचीं म्हणपाचें निवेदन मुख्यमंत्र्याक दिलां. वेंचणूक लागीं पावता तसो ताचेरूय विचार जावंक शकता म्हणा.
वेंचणूक येता म्हणल्यार आनीक कितें कितें फुकट मेळटलें तें पळोवया. म्हणटकूच ॐकार हांतल्या खंयच्या हांयसाक भुलून गोंयांत येवंक पळेता तें ताकाच विचारचें पडटलें. फुकट रेशन, फुकट जमीन काय काम, कितें जाय आसतलें काय ताका. ताका ताच्याच जातभायन कळपांतल्यान भायर घाला म्हणपाचेंय वाचूंक मेळटा. म्हणटकूच ताका रावपाक जागो आनी खाण जायच पडटलें. मागीर ताणें गोंयांतूच येवचें पडलें ना? तातूंत आमचें सरकार तर सिमा भागांतल्या लोकांचेर सामकें खोशी आसा. फाटीं वेंचणुकेच्या प्रचाराक शेजारच्या राज्यांत गेल्ले कडेन आमच्या राजकारण्यांनी तुमचे खातीर गोंयांत नोकर्यो तयार करतले म्हणपाचें आश्वासन थंयच्या लोकांक दिल्लें. सरकारांतलेच मंत्री जेन्ना अशीं आश्वासनां दिता तेन्ना खंयचेय कंपनीन भायल्या वाठारांत नोकर्यांची जायरात दिली म्हणून तांका कसो दोश दिवपाचो? सरकाराचीच देख घेवन ते अशे वागतात म्हणचें पडटलें.
तातूंत गोंयकारांक कामांत आवड आशिल्ली जाल्यार कोण काम दिनासतना रावपाचो? पूण आमकां फेस्तां आनी जात्रांनी गोडी. हें सगळें करून जातकूच वेळ मेळ्ळो तरूच काम करपाचें. आज गोंयचे खंयचेय कंपनींत वचून पळे गोंयकारां परस भायलेच चड कामाक आशिल्ले नदरेक येतले. जांचीं पोटां भरिल्लीं आसा तांकां काम कित्याक करूंक जाय? आनी काम करचेंच जालें तर चड पगार मेळटा थंय वचपाचें. गोंयकार गोंयांत काम करिनात पूण भायल्या देशांनी वचून रातीचे दीस करून जोडटात. आमकां गोंयांत काम करूंक नाका आनी हाचोच फायदो भायले घेतात. आमकां मनशांची गरज म्हणटकूच तांकां येवं नाकात म्हूण कशें म्हणपाचें? देखून ते येतात आनी आमी तांकां कामाक दवरतात. मागीर एकादे कंपनीन भायल्या राज्यांत जायरात दिली वा कामगार मेळावो घेतलो जाल्यार बोवाळ कित्याक मारूंक जाय?
सद्याक बिहारांत वेंचणुको आसात. आमचो मुख्यमंत्री थंय प्रचाराक वतलो. बिहारांत बेकारी खूब आसा. थंयचे लोक नोकरेच्या सोदांत देशभर वतात. गोंयांतूय जायते बिहारी आसात. थंय मतदानाक वचूंक तांकां भरपगारी सुटी जाहीर जातली हातूंत दुबाव ना. कारण हाचे पयलींय आमच्या सरकारान शेजारच्या राज्यांनी जावपी वेंचणुके वेळार गोंयांत रावपी थंयच्या मतदारांक अशी सुटी जाहीर केल्ली. म्हणटकूच आतांय तशें जावप सभावीक. पूण प्रचाराक वचप्यांनी मात थंय आशिल्ल्यांक, गोंय तुमची वाट पळेता म्हणून सरकारी नोकर्यांचें बी हांयस दाखयलें ना म्हणजे जालें. बिहार भाजपाक सामकें गरजेचें. ताणीं थंय आपणाली प्रतिश्टा पणाक लायल्या म्हणल्यार जाता. अशे वेळार थंयच्या लोकांक नोकरेचें हांयस दाखोवचेंच पडटलें. आनी बिहाराकडेन काय इतल्यो नोकर्यो दिवपाची तांक आसचिना. थंयचे लोक नोकरे खातीर खंयूय वचपाक तयार आसतात. तांकां गोंयांत येवंक आवडटलेंच. पूण गोंय कितलो भार घेवंक शकतलें हाचो विचार करचेली गरज आसा.
आतां ॐकाराक गोंयांत कित्याक येन दिसलें तें मात पळोवचें पडटलें. तो जर काम सोदीत आयला जाल्यार ताका गोंयांत दवरूंक हरकत नासची. ताच्या राबित्याचीय सोय करप शक्य आसा. बोंडलाय कोण तरी जायच न्ही. पळेयात विचार करून. तो जर वचूंक तयार ना आनी ताका गोंय आवडलांच जाल्यार ताचे खातीर रेड कार्पेट घालूंक कितें जालां? दिवंया ताका येवकार. इतले दीस रानांतल्यान बिबटे गांवांत येताले आतां हती येवंक लागले. आतां मुखार आनी कोण येतले तें काळूच जाणा. आमी त्या काळाकूच नमस्कार करुंया.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
