भांगरभूंय | प्रतिनिधी
पणजीः वैजकी मळार जाल्ले उदरगतीन एके तरेन मरणाचें रुपांतर दुयेंसांत केल्ल्याचें मत अभिनेते आनी मानसोपचारतज्ञ डॉ. मोहन आगशे हांणी उक्तायलें. शेनवारा समाज कल्याण खात्यान पणजेंत आयोजीत केल्ले ‘टुगेदर इन दि ट्वायलायट’ कार्यावळींत ते उलयताले. ह्या वेळार खासदार सदानंद शेट तानावडे, खात्याचे संचालक अजीत पंचवाडकार, डॉ. मीनाक्षी मार्टीन, संजय ढवळीकार, प्रमोद कामत, चारुदत्त पाणिग्रही आनी हेर मानेस्त हाजीर आशिल्ले.
कार्यावळींत डॉ. आगाशे हांणी लघुपटां वरवीं जाण्टेपण, याद उरप, जाण्ट्यांची मानसीक भलायकी अशा विशयांचेर मार्गदर्शन केलें. जल्म आनी मरण हो जिणेचो एक भाग. वैजकी विज्ञान वा हेर मळार मनशान उदरगत केल्या. ताका लागून मरण येवपाचें प्रमाण उणें जालें आनी मनशाचे आयुश्य वाडलें. पूण हें वाडिल्लें आयुश्य भुरगेपणांत वा तरणेपणांत न्हय, तर जाण्टेपणांत जाता. वैजकी उदरगतींतल्यान तुमचें जाण्टेपण बरे दर्जाचें आसतलें हाची हमी मेळना.
भुरगें जल्माक येता तेन्ना ताचो स्वास आनी काळजाची धडधड सुरू जाता. स्वास आनी काळजाची धडधड बंद जातकच मनशाक कायदेशीर रितीन मेल्लो जाहीर करतात. सुणीं, माजर वा हेर जीव सैमीक रितीन जियेतात आनी मरतात. फकत मनशांनीच आपल्या अफाट बुद्धींतल्यान सैमीक आयुश्या परस आपलें आयुश्य वाडयलां. पूण हाका लागून जिणेचो दर्जो सुनिश्चीत जायना. हाचेर आमी गंभीरतायेन विचार करपाक जाय.
सध्या कॉर्पोरेट हॉस्पिटलांतल्या अतिदक्षता विभागांत 90 टक्क्यां परस चड जाण्टे लोक आसतात. अशीं हॉस्पिटलां तुमच्या स्वर्गाच्या वाटेर टोल बूथां सारकीं. टोल बूथाचेर पयशे दिलें जाल्यारुच तुमकां फुडें वचपाक मेळटा. देखून, तुमकां व्हेजिटेबल स्टेटांत जगपाची इत्सा ना जाल्यार, तुमचो मेंदू काम करता तो मेरेन तुमकां खंयच्या प्रकारची उपचार पद्दत दिवपाक परवानगी दिवची हाचो विचार करुन दवरचो असो सल्लो डॉ. आगाशे हांणी दिलो.
भूतकाळांत जियेवंक नाकात…
डॉ. आगाशे हांणी सांगलें, ज्येश्ठ नागरिकांनी भूतकाळांत जियेवंक फावना. आमच्या काळांत अशें आशिल्लें अशें म्हणचे परस सध्या कितें घडटा तें सोदून काडपाक जाय. हे खातीर सध्याचे तरणाटे कितें करतात तें पळोवचें. कारण हे तरणाटे तुमच्या वर्तमानाचो एक दुवो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
