भांगरभूंय | प्रतिनिधी
नवी दिल्ली, खबरां संस्था: भारतीय सेलिब्रिटींच्या नांवान हॅकर्स व्हड प्रमाणांत लोकांक फटयतात. जागतीक सायबर सुरक्षा कंपनी McAfeeन ‘सेलिब्रिटी हॅकर हॉट लिस्ट २०२४’ ची वळेरी जाहीर केल्या. तातूंत आस्पाविल्ल्या सेलिब्रिटींचीं नांवां लोकांक हॅकर्स आपल्या जाळ्यांत आडकावपा खातीर वापरतात. नांवां वापरून हॅकर्स डेटा चोरपा पसून लोकांच्या खात्यांतल्यान पयशे काडपा मेरेन फटयतात.
सेलिब्रिटींची वळेरी जाहीर
McAfeeन धा सेलिब्रिटींचीं नांवां जाहीर केल्यांत. ओरीचें नांव पयले सुवातेर आसा. हालींच्या काळांत ओरी म्हळ्यार ओरहान अवत्रमणी हे बरेच लोकप्रीय जाल्यात. सेलिब्रिटींचो इश्ट म्हणून ओरी जायत्या पार्ट्यांनी आनी कार्यावळींनी दिसता. ओरी हाका अंबानी घराण्याक लागींचो मानतात. अनंत अंबानीच्या लग्नांत माचयेर ओरी दिसलो. तरणाट्यां मदींय ओरीचें खूब पिशें आसा. हाचो फायदो सायबर गुन्यांवकार घेतात. लोक सेलिब्रिटींच्या नांवान फोन करतात. भारतीयांकूय सेलिब्रिटींचें खूब पिशें. तांचे विशीं जाणून घेवपाची उमळशीक दरेकल्याक आसता. उपरांत घोटाळे करपी तांकां ल्हवू ल्हवू जाळांत आडकयता.
McAfeeन जाहीर केल्लें सेलिब्रेटिंचें हॉट लिस्ट
ओरी (ओरहान अवत्रमणि)
दिलजीत दोसांझ
आलिया भट्ट
रणवीर सिंह
विराट कोहली
सचिन तेंडुलकर
शाहरुख खान
दीपिका पदुकोण
आमिर खान
महेंद्र सिंह धोनी
मॅकाफीन ह्या वर्साचे सुरवातेक जाहीर केल्ल्या सर्वेक्षणांत ८० टक्के भारतीय सेलिब्रिटींचेर डीपफेकाचो खोलायेन परिणाम जाता. ६४ टक्के लोकांच्या म्हणण्या प्रमाण एआय तंत्रज्ञानाक लागून ऑनलायन घोटाळ्यांची वळख करप कठीण जालां. ७५ टक्के लोकांनी इंटरनॅटाचेर डीपफेक सामुग्री पळयल्या. ३८ टक्के लोकांनी आपूण डीपफेक घोटाळ्याक तोंड दिवचें पडलां अशें सांगलां. १८ टक्के लोक अशा घोटाळ्यांचे बळी पडल्यात.
फटोवपी १८ टक्के लोकांक सेलिब्रिटींच्या फोटो आनी व्हिडियो वरवीं फटयतात. हातूंत व्हडा प्रमाणांत पयशांची फटवणूक जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
