‘ह्या’ देशांत बायलांची सुरक्षीतताय धोक्यांत, दर दिसा तीन हजार गुन्यांवांची नोंद

भांगरभूंय | प्रतिनिधी

नवी दिल्ली, खबरां संस्था ः संवसारभर बायलां आड जावपी हिंसाचाराची संख्या वाडत आसा, जाल्यार युनायटेड किंगडमाचो एक भाग आशिल्ल्या इंग्लंड आनी वेल्सांतय बायलां आड जावपी हिंसाचाराची संख्या वाडत आसा. बायलां आड अत्याचाराच्या प्रकरणांची दर दिसा तीन गुन्यांवांची नोंद जाता. हे संबंदी इंग्लंडांतल्या पुलिसांनी मंगळारा एक अहवाल उजवाडायला. दर वर्सा दर 12 बायलां मदली एक बायल बळी जाता अशें ह्या अहवालांत म्हणलां. देखून ह्या देशांतल्या बायलांची सुरक्षीतताय धोक्यांत आसा.
“बायलां आनी चलयां आड हिंसाचार ही राष्ट्रीय आणीबाणी”, अशें अहवाला वांगडा दिल्ल्या टिप्पण्यांनी वरिश्ठ पुलीस मुखेली मॅगी ब्लिथ हांणी सांगलें. ह्या अभ्यासांत 2022-23 वर्सा बायलां आनी चलयां आड 10 लाखां परस चड गुन्यांव जाल्ल्याचे दिसून आयलां. एप्रिल 2022 ते मार्च 2023 ह्या काळांत दर पांचलो गुन्यांव बायलांच्या कडेन संबंदीत आशिल्ल्याचें बायलांचे सुरक्षेचेर केल्ल्या अभ्यासांत दिसून आयलां.

दर 20 मदल्या एका कडल्यान अत्याचार

2018-2019 ते फाटल्या वर्सा मदीं बायलां आनी चलयां आड जावपी हिंसाचारांत 37 टक्क्यांनी वाड जाल्या अशें अहवालांत म्हणलां. जाल्यार घरगुती अत्याचार पयल्या क्रमांकाचेर आसा. इंग्लंड आनी वेल्समांतल्या दर 20 मदल्या एक प्रौढांक वा 2.3 लाख लोकां कडल्यान बायलां आड हिंसाचार वा हेर गुन्यांव केल्ल्याचेंय ह्या अभ्यासांत दिसून आयलां.

भुरग्यांच्या लैंगीक अत्याचाराच्या कागाळींत 435 टक्क्यांनी वाड

दोनूय देशांनी बायलां आड जावपी हिंसाचार म्हामारीच्या पांवड्यार पावलां अशें पुलिसांनी सांगलें. देखून ह्या प्रकरणांत सरकारान न्याय वेवस्थेंत हस्तक्षेप करचो अशी मागणी पुलिसांनी केल्या. 2013 ते 2022 ह्या काळांत भुरग्यांच्या लैंगीक अत्याचार आनी शोशणाच्या गुन्यांवांत 435 टक्क्यांनी वाड जाल्या. 20 हजार प्रकरणां वयल्यान सरळ 1 लाख 7 हजार गुन्यांव नोंद जाल्यात.

गुन्यांवगारां मदीं तरणाट्यांचो चड आस्पाव आसून तांची सरासरी पिराय 15 वर्सां आसा. तशेंच ऑनलायन संबंदीत गुन्यांवांतले 85 टक्के गुन्यांव छळ कडेन संबंदीत आसात अशेंय अहवालांत म्हणलां. डिसेंबर 2022 ते डिसेंबर 2023 ह्या काळांत प्रौढ बलात्काराच्या आरोपांत 38 टक्क्यांनी वाड जाल्ल्याचें अहवालांत दिसून आयलां.