भांगरभूंय | प्रतिनिधी
राम मंदीर जालें म्हणजे रामाचो प्रस्न सुटलो. ताका स्वताचें घर मेळ्ळें. सोंपलो एकदाचो वनवास. अयोध्येकूय ते निमतान बरे दीस आयले. फाटल्या तीन म्हयन्यां भितर अयोध्येच्या जमनीचे दर वाडले. तीन म्हयन्यां पयलीं दोन हजार प्रती चौरस फूट आशिल्ली जमीन आतां साडेआठ हजार प्रती चौरस फुटांचेर पावल्या. आतां गोंयचे वरी कोणूय मेल्ल्यांच्यो सयो बी करून जमनी विकना जातकूच जालें. कशेंय जावं जमीन आशिल्ल्यांक ‘अच्छे दिन’ आयले म्हणूंक जाता. आतां मुखार कितें? आमचें राजकारण चलतलें जाल्यार आमकां वेंचणुकेक कसलो तरी विशय जाय आसता. राम मंदीर विशयाचेर इतलो तेंप राजकारण चललें. राम मंदिरांत पावलो. पूण जाणें ह्या विशयाक हात घाल्लो त्या अडवाणींक मात वनवास घडलो. आतां तर तो सामकोच विजनवासांत वचपाचो. काँग्रेसूय वनवासाक गेल्ल्यांत जमा. तांचो वनवास सोंपोवंक एक नवो विशय जाय पडटलो. एक विशय सोंपलो म्हणजे नवो विशय जायच पडटा. नासल्यार राजकारणांत मजा येना.
येता ती वेंचणूक राम मंदीर जालें ह्या विशयाचेर रंगतली हातूंत दुबाव ना. पूण उपरांत कितें? ताचो विचार आतांच जावचो पडलो ना? अर्थीक महासत्ता हो विशय तसो बरो आसा पूण लोकांक खुबळावंक ताचो उपेग जायतसो दिसना. म्हणटकूच लोकांच्या काळजाक हात घालपी विशय जाय. विशय कशे जाय? मंदीर वहीं बनायेंगे सारके. अडवानीन मंदिरा खातीर रथयात्रा काडली आनी मुखार राजकारण कशें बदल्लें तें सगल्यांनी पळेलें. गरिबी हटाव, मंडळ आयोग सगलें विसरायेर पडलें आनी फक्त मंदीर लोकांचे तकलेंत उरलें. तशे आमचे कडेन विशय उणे नात, पूण ते मुखार घेवन वचपी खडेगांठ फुडारी नात. राहूल सद्याक एक जोकर सो जाला. अडवानी सारको विशय ताणून धरपी फुडारी आसल्यारूच विशय मुखार वता. नासल्यार तीं फकांडां जातात.
अयोध्येक देवूळ जालें. एक प्रस्न सुटलो पूण सद्याक जायतीं देवळां बंद पडटात ताचें कितें? हांगा हांव देवळां म्हणटां तीं सामान्याच्या पोटा पाणयाची वेवस्था करपी आस्थापनां. पयलीं मनीस सुखी जावंक जाय. आनी मनीस सुखी जातलो जाल्यार ताच्या आनी ताच्या घरच्यांच्या पोटा पाण्याची वेवस्था जावंक जाय. पूण हांगा जाता कितें तर, दर दिसा खंयचें तरी आस्थापन बंद पडटा आनी कितलेशेच जाण रस्त्यार येतात. खूबशीं आस्थापनां खर्च उणो करपाक कामगारांच्या हातांत नाल्ल दिता. पूण कोणाचेंच हाचेर लक्ष वचना. जांणी हाचेर लक्ष दिवपाचें ते फकत ‘जय श्री राम’च्यो घोशणा दिवन लोकांक पिशे करता. ह्या घोशणांनी पोट भरना हें कशें कळना हांकां?
हालींच बीग बझार हें फ्यूचर रिटेल हे कंपनींच्या आस्थापनान शटर बंद केलें. हें आस्थापन चालू आसतनाच घेवंक संवसारांतल्यो जायत्यो कंपनी तयार आसल्यो. आमचे बिलियनर मुकेश अंबानी तर दुडू घेवन तयार आसलो. कितले खबर आसा? चोवीस हजार सातशें तेरा कोटी. सुमार णवशें अब्ज डॉलर मोलाच्या मार्केटाचेर कब्जो करूंक जायते जाण तयार आसले. एकूण 49 कंपनीं सर्तींत आसल्यो. फ्यूचर रिटेल हो किशोर बियानींच्या सपनांतलो प्रकल्प. सुरवात बरी जाली. हजारांनी लोकांक पोटाक लावपी हो प्रकल्प. पूण वयर उडी मारपाच्या हावेसान रीण वाडलें. पयशे परते दिवंक जालें ना आनी बँको दारांत उब्यो रावल्यो. खबर वाऱ्यार वचूंक वेळ लागना. खबर सगल्याक पातळ्ळी आनी संवसारांतल्यो जायत्यो कंपनीं हातांत पयशे घेवन दारांत उब्यो रावल्यो. मुकेश अंबानीची रिलायन्स रिटेल्स तांतली एक.
पूण एकल्याकूय बीग बझार ताब्यांत घेवंक जालो ना आनी हातांत पयशे नाशिल्ल्यान खांके वरशे करपाची बीग बझारचेर पाळी आयली. बीग बझारचें शटर ओडचें पडलें आनी हजारांनी लोकांची नोकरी गेली. ह्या सगल्याक जापसालदार म्हणल्यार एमेझोन. एमेझोनान सगली वाट लायली. फ्यूचर ग्रुपाचे एके कंपनींत एमेझोनान चार आणें घाल्ले. हे पयशे घालतना एक अट आसली ती म्हणजे मुखार कंपनी विकची जाली जाल्यार पयलो अधिकार आपणांक आसतलो म्हूण. जेन्ना बीग बझार लुकसाणेंत वचूंक लागलो तेन्ना हे तोंड धांपून बसले आनी जेन्ना रिलायन्स बीग बझार घेताशें जालें तेन्ना एमेझोनान ताचेर हरकत घेतली. हांणी खरें तर एकेच कंपनींत पयशे घाल्ले पूण हरकत पुराय ग्रुपाचेर घेतली. आनी सिंगापूरच्या कोर्टांत खटलो घालो. फ्यूचर भारतीय कंपनी, एमेझोन अमेरिकन कंपनी आनी खटलो सिंगापूराक. फ्यूचर बंद करपाचोच हांचो डाव आशिल्लो आनी तातूंत ते जैतिवंत जाले.
सद्याक जायते जाण बेकार जाल्यात. देशांतल्या बँकांचें वीस हजार कोटी आडखळून पडल्यात. आतां हे पयशे मेळप कठीण. खरें तर हो विशय घेवन राजकारण करूं येतालें. एक भायली कंपनी येता आनी आमच्या देशाचें कितलेंशेंच लुकसाण करता. पूण हाचेर कोण लक्ष दिना. उरफाटें जे अंबानी, अडाणी लोकांक काम दितात त्या देशांतल्या कारखानदारांचेर आरोप करून तांकां नखलामी करतात. फ्यूचर रिटेल जर अंबानी, अडाणी सारक्यांच्या हातांत पडिल्ली तर बँकांचे रीण फारीक जावपाचें आनी कोणाचें कामूय वच्चें नाशिल्लें. पूण सरकारूय ओगी रावलें आनी विरोधकूय. सरकारान एमेझोनाक दोळे मोठे करपाचे. सरकार करिना जाल्यार विरोधकांनी सरकाराक जाप विचारपाची. हजारांनी लोकांचेर उपासमारीची पाळी येवंक जायना आसली. पूण कोण राम मंदिरांत मग्न जाल्यार कोण यात्रा काडूंक गुल्ल. सामान्यांचें कोणाक पडलां? तीं देवळां बांदतना हीं गरजेचीं देवळां बंद जावंक दिवचे नात म्हणपाचें पळोवंक नाका? अर्थीक महासत्ता जावचें सपन पळेतात आमी.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
