भांगरभूंय | प्रतिनिधी
नवी दिल्ली, खबरां संस्था ः भारतांत जिणे पद्दती संबंदीत दुयेंस वाडल्यात. हातूंत काळजाक संबंदीत जावपी दुयेंसाचें प्रमाण चड आसा. कुडींत कोलेस्टेरॉल वाडप हें काळजाच्या दुयेंस जावपाचे कारण.
इंडियन हार्ट जर्नलांत उजवाडाक आयिल्ल्या अहवाला प्रमाण भारतांतल्या 15 टक्के तरणाट्यां मदीं कोलेस्टेरॉल जावपाचो धोको चड वाडला. जे संवसारांतल्या सरासरी 5 ते 10% परस खूब चड आसा.
इंडियन हार्ट जर्नलांत उजवाडाक आयिल्ल्या एका अहवालांत कोलेस्टेरॉल वाडपाचें मुखेल कारण म्हणल्यार आनुवंशिकी अशें सांगलां. हाका ‘फॅमिली हायपरकोलेस्टेरोलेमिया’ अशें म्हण्टात, देखून ल्हान पिरायेचेर कोलेस्टेरॉल वाडल्यार काळजाच्या दुयेंसांचोय धोको वाडटा. इतलेंच न्हय तर ह्या अहवाला प्रमाण संवसारांतल्या हेर देशांपरस भारतांत काळजाचे दुयेंस एक दशक पयलीं जातात. म्हणल्यार संवसारभर काळजाच्या दुयेंसाची पिराय सरासरी 62 वर्सां, जाल्यार भारतांत ती 52 वर्सां आसा. कारण हे दुयेंस आनुवंशिकतेक लागून ल्हान पिरायेचेर जातात.
लिपोप्रोटीनाचें प्रमाण चड
ह्या अहवालाप्रमाण भारतीयांच्या लिपिड प्रोफायलांत लिपोप्रोटीनाचे प्रमाण चड आसा. धक्को दिवपी गजाल म्हळ्यार 25 टक्क्यां परस चड लोकांक तें प्रमाणा परस चड आशिल्ल्याचें दिसून आयलां. संवसारीक पांवड्यार सरासरी 20 टक्क्यांपरस उणी आसा. लिपोप्रोटीनाची पातळी चड आसल्यार हायपरकोलेस्टेरोलेमियाचो आनुवंशिक धोको दिसून येता.
81 टक्के भारतीयांचे लिपिड प्रोफायल वायट
हालींच लिपिड प्रोफायलाचेर जाहीर केल्ल्या एका अहवालांत 81% भारतीयांचें लिपिड प्रोफायल वायट आसा अशें सांगलां. तशेंच 67% भारतीयांक उणे एचडीएल कोलेस्टेरॉल आनी ट्रायग्लिसराइड्स चड आशिल्ल्याचे समस्या आसा अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
