भांगरभूंय | प्रतिनिधी
नवी दिल्ली, खबरां संस्था: बायलां सशक्तीकरणाचेर चर्चा जायत आसता. पूण बायलां आड जावपी हिंसाचार आनी गुन्यांव उणे जातना दिसनात. बेळगांवच्या अशाच एका प्रकरणाक लागून हो प्रस्न मुखार आयला. कर्नाटक उच्च न्यायालयान बेळगांवचे हे घडणुकेची स्वता दखल घेवन (सु-मोटो) कर्नाटक सरकार आनी पुलिसांक धारेर धरले. बायलांक इतली वायट वागणूक मेळटाली तेन्ना पुलीस खंय आशिल्ले? असोय प्रस्न न्यायालयान उक्तायलो.
नेमकें कितें प्रकरण?
बेळगांवां ११ डिसेंबराक एक तरणाटी चली आपल्या साखरपुड्या दिसा त्याच गांवांत रावपी तिच्या इश्टा सयत पळून गेली. ते चलयेच्या घरांतल्यांक हाचो राग आयिल्ल्यान तीं सगळीं त्या चल्याच्या घरा गेलीं आनी ताचे आवयक बरीच बडयली. तशेंच ते बायलेची कपड्यां विणें धींड काडून तिका दोन वरां लायटीच्या खांब्याक बांदून दवरली. हे घडणुकेक लागून बेळगांवां बोवाळ जालो. तिची उच्च न्यायालयान दखल घेवन प्रशासन वेवस्थेक उजरावन काडलें.
कर्नाटक उच्च न्यायालयांत मुखेल न्यायाधीश प्रसन्ना वराले आनी न्यायमूर्ती कृष्ण दीक्षित हांच्या खंडपिठा मुखार ही सुनावणी केली. ह्या वेळार न्यायालयान रागान भरिल्ली टिप्पणी करून पुलीस वेवस्थेचेर तिडक काडली. ‘अशा घडणुकांक लागून देशांतल्या हेर बायलांच्या मनांत असुरक्षिततायेची भावना निर्माण जाल्या आसतली. अशें महाभारतांत लेगीत घडूंक ना. भगवान श्रीकृष्ण द्रौपदी खातीर धांवून आयलो. पूण सद्याच्या आधुनीक युगांत तिच्या आदाराक कोणूच येवंक ना. दुर्दैवान हो संवसार दुर्योधन आनी दुशा:सनाचो.’’ अशी न्यायाधीशान तिडक उक्तायली.
मनीस इतलो कपटी कसो आसपाक शकता?
मजगतीं, पयलीं तिका मारली. उपरांत कपड्यां विणें धींड काडली आनी तशीच दोन वरां विजेच्या कांब्याक बांदून दवरली. हाचेर न्यायालयान तिडक उक्तायली. ते बायलेक त्या राकेसांच्या काकुळटेचेर सोडून दिल्ली. ते बायलेक ह्या सगळ्याचो केदो व्हडलो धपको बसला आसतलो हाचो विचार करात. आमी जो मेरेन ते बायलेचे सुवातेर आमकां दवरिना तो मेरेन हे घडणुकेची खरसाण कोणाकूच जाणवची ना. आरोपींक मनीस म्हणपाक आपल्याक लज दिसता. मनीस इतलो कपटी कसो आसपाक शकता? असो प्रस्न न्यायाधीशान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
