भांगरभूंय | प्रतिनिधी
प्रधानमंत्री नरेंद्र मोदीः सोनमर्ग बोगद्याचें उक्तावण
खबरां संस्था
श्रीनगरः जम्मू आनी काश्मीरांतल्या लडाखाची आनीक एक पोरणी मागणी पुराय जाल्या. तुमी विस्वास दवरात, हो मोदी आसा, उतर दिलें जाल्यार तें पुराय करताच दरेका कामाचो वेळ आसता आनी योग्य काम योग्य वेळार जातलें, अशें प्रधानमंत्री नरेंद्र मोदी हांणी सांगलें.
प्रधानमंत्री मोदी हांणी सोमारा जम्मू- काश्मीरांतल्या गांदरबलांत झॅड मोड बोगद्याचें उक्तावण केलें. त्या वेळार ते उलयताले. श्रीनगर- लेह म्हामार्ग एनएच- 1 चेर बांदिल्लो हो बोगदो 6.4 किलोमिटर लांबायेचो दोट्टी बोगदो आसा. तो श्रीनगराक सोनमर्गा कडेन जोडटलो. झेलाक लागून हो म्हामार्ग 6 म्हयने बंद आसता. बोगद्याच्या बांदकामाक लागून लोकांक सगळ्या मोसमांत कनेक्टिव्हीटी मेळटली.
प्रधानमंत्री मोदी हांणी सांगलें, सोनमर्ग बोगद्या विशीं सांगपाचें जालें जाल्यार हो बोगदो सोनमर्ग तशेंच कारगील आनी लेहांतल्या लोकांची जीण खूब सोंपी करतलो. आतां झेल पडटा तेन्ना, झेलाचीं पालसणां कोसळ्ळ्यार वा पावसाळ्यांत पालसणां कोसळ्ळ्यार रस्ते बंद जावपाच्यो समस्या उण्यो जातल्यो. रस्ते बंद जाले उपरांत लोकांक हॉस्पिटलांनी वचपाक मेळनाशिल्लें आनी गरजेच्यो वस्तू मेळपूय कुस्तार जातालें. ह्या बोगद्याक लागून ह्यो समस्या सुटाव्यो जातल्यो.
देशाचे उदरगती खातीर, जम्मू- काश्मीराचे उदरगती खातीर, मेहनती भावांनी कठीण परिस्थितींत काम केलें, आपलो जीव धोक्यांत घालून काम केलें, आपलो जीव वगडायलो, पूण ते तांच्या निश्चेवा पासून मातूय फाटीं सरूंक नात. कामगार वर्गांतले सांगाती भियेवंक नात. कोणूच घरा वचपा संबंदांत उलोवंक नात. दरेका आव्हानाचेर जैत जोडून तांणी हे काम पुराय केलां. आयज सगळ्यांत पयलीं आपल्याक जीव वगडायल्ल्या त्या सात जाणांचो उगडास येता, अशें मोदी हांणी सांगलें.
आदीं श्रीनगर- लेह म्हामार्गा वयले गगनगीर ते सोनमर्ग मेरेनचें अंतर हुपपाक एका वरा परस अदीक वेळ लागतालो. ह्या बोगद्याक लागून हें अंतर आतां 15 मिण्टांनी हुपपाक मेळटलें. तशेंच गाडयांची गती वराक 30 किलोमिटरा वयल्यान 70 किलोमिटर मेरेन वाडटली. आदीं हो दोंगराळ वाठार हुपपा खातीर 3 ते 4 वरां लागतालीं. आतां हें अंतर फकत 45 मिण्टांनी हुपपाक मेळटलें. पर्यटना वांगडाच देशाचे सुरक्षेचे नदरेन हो प्रकल्प म्हत्वाचो आसा. ह्या बोगद्याक लागून लश्कराक लडाख मेरेन पावप सोंपें जातलें. म्हणल्यार झेल पडटालो तेन्ना लश्कराक हवाई दळाच्या विमानांतल्यान जें सामान व्हरप गरजेचें आशिल्लें, तें आतां उण्या खर्चांत व्हरप शक्य जातलें. ह्या प्रकल्पा खाला 31 बोगदे बांदतात. तातूंतले 20 जम्मू- काश्मीर आनी 11 लडाखांत आसात.
उक्तावण सुवाळ्याक हाजीर राविल्ले जम्मू आनी काश्मीराचे मुख्यमंत्री ओमर अब्दुल्ला हांणी सांगलें, जम्मू आनी काश्मीरांतल्यो वेंचणुको जाल्यो. सगळ्यांत व्हडली गजाल म्हणल्यार खंयच कसलेच तरेची वायट घडणूक जावंक ना, सत्तेचो गैरवापर जाल्ल्याची कागाळ ना. हाचें स्रय प्रधानमंत्री मोदी, तांचे सांगाती आनी भारतीय वेंचणूक आयोगाक वता. आपलें मन सांगतां, प्रधानमंत्री मोदी राज्याचो दर्जो परतून दिवपाचें उतर पुराय करतले.
बोगद्याक वापरलां ‘एनएटीएम’ तंत्रज्ञान
सोनमर्ग बोगदो न्यू ऑस्ट्रियन टनेलिंग पद्दतीचो (एनएटीएम) वापर करून बांदला. हे प्रक्रियेंत बोगदो खणटनाच ताची मातीय भायर काडटात. माती भायर काडून भितर मार्ग तयार करतात. तेच पद्दतीन बोगद्याची वणत बांदल्या. ताका लागून दोंगर कोसळपाचो धोटो वाटावता. एनएटीएम तंत्रांत बोगद्याचें काम सुरू जावचे आदीं दोंगर, ताचे भोंवतणचें हवामान आनी मातयेची तपासणी करतात. बोगद्याचे प्रक्रियेंत एकाच वेळार कितली यंत्रसामुग्री आनी कितले लोक काम करपाक शकतले हाचो अदमास काडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
