भांगरभूंय | प्रतिनिधी
पयशां खातीर वा खीणभराच्या सुखा खातीर कोण खंयच्या पांवड्यार देंवत, कितें करीत ते सांगपाक येवचें ना. कितलोय प्रतिश्ठीत, सुशिक्षीत आसलो तरी ताणें पयशां खातीर चुकीचो मार्ग आपणायिल्ल्याचे, स्वताच्या नांवाक खत लायिल्ल्याचे प्रकार घडल्यात. बरें एकदा चूक जाली म्हूण तो सुदारूंक ना, तर परतून- परतून त्योच चुको करीत रावला. गोंयां सयत पुराय देशांत झटपट पयसो जोडपाक घुंवळे वखदांचे विक्रेचो मार्ग आपणावपी हजारांनी लोक आसात. तातूंत लज भाजून खाल्लेय आसात. मात तुळजापूर ड्रग्स विक्री प्रकरणांत जी टोळी उक्तडार आयल्या, तातूंतल्या 35 जाणां मदीं 13 तुळजापूरच्या तुळजाभवानी देवीचे पुजारी आसात, ही खरेंच धक्को दिवपी गजाल. तांचीं नांवां देवळाच्या वेवस्थापनान पुलिसां कडल्यान मागयल्यात. ते देवीची पुजा करिनाशिल्ले, अशेंय स्पश्ट केलां. ह्या सगल्या दुबावितां मदले 21 जाण फरारी आसात. तुळजाभवानी सारक्या व्हडल्या देवस्थाना कडेन संबंद आशिल्ल्यांक ड्रग्साचे वाटेर कित्याक चलचेंशें दिसलें, तें कळना. उरिल्ल्या दुबावितां मदीं अर्थांत राजकी फुडारी, वावुरपी आसात. पूण, ती सदचीच गजाल!
धाराशिव जिह्यांतलें तुळजाभवानी देवूळ हें पयलीं सावन लोकप्रीय. महाराष्ट्राचें दैवत आशिल्ल्या छत्रपती शिवाजी महाराजान तिचो उल्लेख ‘कुलस्वामिनी’ असो केला. ते बरेच फावटी देवळांत दर्शना खातीर येवन गेल्यात. तांची भवानी देवीचेर खूब भक्ती आशिल्ली. औरंगजेब- संभाजी राजा वयल्यान सोशल मिडियाचेर धुळवड खेळपी मात ह्या ड्रग्स प्रकरणान व्हडलेशे तिडकल्ले दिसूंक नात. खंयच्याय प्रकरणांत एखादे जातीचो दुबावीत सांपडलो काय त्या जातिकूच आरोपीच्या पांजऱ्यांत उबो करून तांचेर सकयले पातळेचेर टिका करपी स्वयंघोशीत सोशल मिडिया न्यायाधीश आमच्या देशांत खूब आसात. मात जाती वयल्यान वाद घालपी, हे विचारवंत सध्या तरी ओगी आसात. खरें म्हणल्यार तशें करप चुकीचें. ह्या प्रकरणाचो फाटल्या अडेज म्हयन्यां सावन तपास चालू आसा. दीस वतले तशी ड्रग्साची ही पुडी उक्ती जायत वतली. कोण साव, कोण चोर तेंय कळटलेंच.
नेमकें कितें हें प्रकरण? 15 फेब्रुवारीक तुळजापूर तालुक्यांत तामलवाडी गांवांत पुलिसांनी अडेज लाखांच्या एमडीएमए ड्रग्साच्यो 59 पुडयो जप्त केल्यो. कांय जाणांक अटकूय केली. हें ड्रग्स तुळजापूरा व्हरताले. तपासा उपरांत मुखेल सुत्रधार आशिल्ल्याच्या दुबावा वयल्यान मुंबयचे एके बायलेक अटक केली. तिच्या बँक खात्या वयल्यान पांच कोटींचे वेव्हार जाल्यात. तिचे कडेन भांगराच्यो वस्तीय मेळ्ळ्यात. तपासा मजगतीं 21 दुबावीत फरारी आशिल्ल्याचें दिसलें. हातूंत 13 पुजारी आसात. ते राजकी पक्षां कडेन संबंदीत आसात. देवळाच्या प्रशासनान तांचेर कडक कारवाय करपाचें थारायलां. हातूंत एखाद्या पक्षाचो फुडारी सांपडलो काय विरोधक ताचेर, पक्षाचेर तुटून पडटात. मात हांगा सत्ताधारी पक्षा सयत सगल्यांचेच फुडारी, वावुरपी आसात. भितरलो एकलो तुळजापूरचो आदलो नगराध्यक्ष. दुसरो आदल्या नगराध्यक्षाचो घोव. कांय दुबावितांचे सगल्या पक्षांच्या मंत्री, खासदारां वांगडा फोटो आसात. आपलेच ओंठ आनी आपलेच दांत असलो हो प्रकार जाला.
तुळजापूर, लातूर (शिक्षणीक केंद्र) हीं शारां ड्रग्साचे भकीक पडप ही हुस्को करपा सारकी गजाल. लातूरांत एका कारखान्यांत 17 कोटींचें सिंथेटीक ड्रग्स धरिल्ल्याचेंय पुलीस सांगतात. आदले गृह मंत्री अनील देशमुख हांणी ह्या वाठारांत ड्रग्साचो गैरवेव्हार वाडला आनी हातूंत राजकी मळा वयले लोक घुस्पल्यात असो आरोप केला. ड्रग्साची टोळी सगल्याच राज्यांनी धरतात. गोंयांत दिसाक एकलो तरी सांपडटाच. पूण तुळजापूर गांव हो श्रद्धेचो विशय. ताका लागून हें प्रकरण सरकारान गंभीरपणान घेवंक जाय. देवळाच्या, शाळेच्या कुशीक सोऱ्याचे बार्र घालपाक मेळना. हांगा तर ड्रग्स मेळटात, अशें पुलिसांच्या तपासांत दिसून आयलां. इतलेंच न्हय, तर देवळा कडेन संबंदीत मनिसूय घुस्पल्ल्याचो दुबाव आसा. ते नेमके कोणाक ड्रग्स विकताले, हें कळटकच घडये आनीक बोवाळ जातलो. देवळांचे कुशीक हरशी कडक बंदोबस्त आसता. खुद्द देवळाचे सुरक्षा रक्षक आसतात, तरीय हें ड्रग्स थंय कशें रिगलें, ही अजापाची गजाल. पवित्र जाग्यांचेर गुन्यांव, चुकीचीं कामां करपाक जायनात, अशें म्हणटात. मात पुलीस सांगतात, तें खरें धरल्यार हो प्रकार म्हणल्यार श्रद्धा आनी भक्तीक वेर घालपी.
आमच्या देशांत ड्रग्स येत आसता. गुजरातांतल्या धक्यार पोरूं अब्जांनी रुपयांचें ड्रग्स धरिल्लें. दिल्लींतूय तें मेळिल्लें. एके कडेन देंवोवप आनी मागीर तें सगल्याक धाडप. पुलिसांक चुकूनच ते सांपडटात. 2019 ते 2021 चे आंकडेवारी प्रमाण उत्तर प्रदेशांत 31,482 पुलीस कागाळी जाल्ल्यो. उपरांत महाराष्ट्र 28,959 आनी मागीर पंजाब 28,417 हांचो क्रमांक लागता. झटपट पयसो मेळोवपाक बरेच भारतीय असलीं देशद्रोही कामां करतात. तातूंत श्रद्धेच्या थळांक खत लागता, भाविकांच्यो भावना दुखावतात, हाचें मात कोणाक पडून गेल्लें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
