भांगरभूंय | प्रतिनिधी
एक आशिल्लें बायूल ही कथा तुमकां कशी सुचली?
हे नवलिकेंत हांवें म्हजें बालपण बरयलां. सात वर्सा पिराये मेरेन हांव म्हज्या आजोळा म्हणल्यार सांखळे रावतालें. तेन्ना थंय जें भुरगेंपण गेलें ते विशीं बरोवपाची उमेद आशिल्ली. तेन्नाची जगपाची पद्दत कशी आशिल्ली आनी तेन्नाच्या सैमाचो आमी कशीं आनंद घेतालीं तें सगळें ह्या पुस्तकांत आसा. आतां गोंय बदलत चल्लां, पयलींचें कांयच उरूंक ना आनी तें दिसय ना. हे खातीर आदल्या समृद्ध बालपणाचें डॉक्युमॅन्टेशन जावचें अशी म्हजी इत्सा आशिल्ली. ताची मांडावळ कशी करची हाचेरच खूब विचार चलताले. मात कोंकणी भाशा मंडळाच्या बाल साहित्य कार्यशाळांनी वांटो घेतकच तातूंतल्यान उर्बा मेळ्ळी आनी म्हजी ही कथा बालनवलिका रुपांत आयली. ताची खूब खोस आसा.
बाल साहित्य बरोवप सोंपें काय व्हडल्यांचें साहित्य?
बाल साहित्य बरोवप खूब कठीण. कारण भुरग्यांची मानसीकताय वळखून लिखाण करचें पडटा. तांकां कितें आवडटा तें दिवचें पडटा आनी सगळी अचूक म्हायती दिवची पडटा. तशेंच भुरग्यां खातीर बरयतना सादेपणान बरोवचें पडटा, कारण तें तांकां कळूंक जाय. ह्यो सगळ्यो गजाली मतींत दवरूनच बालसाहित्य बरोवचें पडटा.
तुमकां साहित्यांतलो खंयचो प्रकार बरोवंक आवडटा आनी कित्याक?
म्हाका चड करून निबंद बरोवपाक आवडटात आनी भुरग्यां खातीर काणयो…. म्हाका काणयो सांगपाकय आवडटात. शाळेंत आसतना म्हाका निबंद बरोवपाक आवडटाले आनी जेन्ना हांव साहित्य बरोवपाक लागलें तेन्ना ताचो आदार म्हाका जालो.
साहित्य अकादमीचो पुरस्कार मेळिल्ल्यान कितली खोस जाल्या? हाचें स्रय तुमी कोणाक दितात?
खूब खोस जाली. आमची जबाबदारी बरयत रावपाची. तकलेंत विचार घोळत रावतात, ते कागदाचेर हाडपाचे आनी आमच्या वाचकांक आनंद दिवपाचो. वाचकांनी म्हज्या लिखाणाचेर खूब मोग केला हे खातीर हो पुरस्कार हांव तांकां ओंपतां. ही नवलिका वाचून म्हाका एका भुरग्यान प्रस्न केलो की हाचो दुसरो भाग येवपाचो आसा काय म्हूण, कित्याक तर बायूल सांखळेच्यान मडगांव पावता तेन्ना ही नवलिका सोंपता. अशे तरेन वाचकांनी म्हाका खूब मोग दिला.
प्रवास वर्णना बरोवपाचो अणभव कसो आसता?
म्हाका प्रवास करपाक आवडटा. प्रवासाक वचप थंयच्या सुवातांचो आनंद घेवप आनी तो आनंद लिखाणांत हाडप हें आवडटा.
तुमी नवीन कितें बरयतात वा बरोवपाचीं आसात?
हांव सद्या गोंयच्या खाणां- जेवणांचेर संशोधनात्मक लेख बरयतां. एक बाल कादंबरी मनांत आसा. ताचेर मुखार काम करतलें. तशेंच कोंकणी लोकजिवनांतल्यो विसरायेर गेल्ल्यो वस्तू,आयदनां, गोंयचीं रानफुलां, फुलपाखे, शेवणीं हांचें लेखन करतलें.
साहित्य
म्हजी माती म्हजें मळब (कविता झेलो), मोतयांची माळ (ललित निबंद), आनंद यात्रा (प्रवास वर्णन), गोंयचीं सवणीं (सवण्यांची वळख), कथा रंग (कथा संग्रह), साता समुद्रां पेल्यान (प्रवास वर्णन), आमुरचंवर (ललित निबंद)
बाल साहित्य
जगमां, चला,भारत भोंवुया. बोमाडे, चंपू इन रांदची कूड, एक आशिल्लें बायूल, फुलां, म्हजो जल्मदीस, गोड आनी तीख, हांव कोण?
साहित्यीक पुरस्कार
कथारंग पुस्तकांक कोंकणी भाशा प्रचार सभा, कोचीचो सरस्वतीबाय साहित्य पुरस्कार 2016, प्रवासवर्णन साहित्याक शंकर भांडारी यादस्तीक बिम्ब पुरस्कार 2014, ‘आनंद यात्रा’ पुस्तकांक कोंकणी भाशा मंडळाचो रॉक बार्रेत साहित्य पुरस्कार 2013, ‘म्हजी माती म्हजें मळब’ ह्या कविता झेल्याक अ. भा. कवयित्री संमेलनाचो गोदावरीदेवी केजरीवाल पुरस्कार 2007.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
