भांगरभूंय | प्रतिनिधी
भांगरभूंय । प्रतिनिधी
केंपेंः आयडियल एज्युकेशन सोसायटीच्या केंपें हांगच्या होली क्रॉस हायस्कुलाचें वर्सुकी स्नेह संमेलन व्हडा उमेदीन जालें. मुखेल सोयरो म्हणून निवृत्त पुलीस उपअधिक्षक आनी उद्देजक संतोबा देसाय हाजीर आशिल्ले. तांचे हस्तुकीं धावेचे परिक्षेंत हायस्कुलांत पयलो आशिल्ल्या हृदय शेवणी आनी हेर विद्यार्थ्यांचो भोवमान केलो. बरी पिळगी घडोवपा खातीर सरकारान शिक्षणीक मळार चडांत चड गुंतवणूक करपाक जाय अशे देसाय हाणे सांगलें.
हांव ह्या हायस्कुलाचो आदलो विद्यार्थी. केपें हांगा पुलीस म्हणून काम करतना ह्या हायस्कुलांतल्यान हावें म्हजें माध्यमीक शिक्षण पुराय केलें अशें देसाय हाणे सांगलें आनी हायस्कुलाक एक लाख रुपयाची देणगी दिली. हायस्कूल वेवस्थापन जेन्ना आपली स्वताची इमारत बांदपाक सुरवात करतलें तेन्ना दोन लाख रुपया मोलाचें बांदकाम साहित्य आपले कंपनी वतीन दिवपाचें ताणे जाहीर केलें.
आयडीएल एज्युकेशन सोसायटीचो अध्यक्ष राजीव सुखठणकार हाणे सुरवेक येवकार दिलो. वेवस्थापक संदीप शिरवयकारान उपकार मानले. मुख्याध्यापिका रश्मी डिसोझान अहवाल सादर केलो. सूत्रसंचालन रोमा बरड, ग्लेडीन परेरा, गंधाली भट आनी गीता मावरेकार ह्या शिक्षकांनी केलें. ताचे पयलीं सकाळी आयडीएल एज्युकेशन सोसायटीच्या टायनी टॉट्स ह्या प्राथमीक आनी पूर्व प्राथमीक शाळेचें स्नेह संमेलन शाळा संकुलांतल्या हेर विद्यार्थ्यां वांगडा जालें. विद्यार्थ्यांनी ह्या वेळार सांस्कृतीक कार्यावळी सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
