भांगरभूंय | प्रतिनिधी
– डोनाल्ड ट्रम्प हांची इराणाक शिटकावणी
-हल्लो केल्यार होर्मुझ कायमचे बंद करतलेः इराणाची शिटकावणी
– इराण – अमेरिका संघर्श वाडपाची शक्यताय
– अमेरिकेचो लश्करी कारवाय करपाचो विचार
वॉशिंग्टनः अमेरिकेचे अध्यक्ष डोनाल्ड हांणी होर्मुझ सामुद्रधुनी उक्ती करात ना जाल्यार इराणाच्या वीज प्रकल्पांचेर हल्लो करून नश्ट करतले, ताची सुरवात सगल्यांत व्हडल्या प्रकल्पा पासून सुरू जातली अशी शिटकावणी अमेरिकेचे अध्यक्ष डोनाल्ड ट्रम्प हांणी इराणाक दिल्या.
मजगतीं, इराणानूय सांगलें, हल्लो केल्यार ताका प्रतिसाद दितले आनी होर्मुज कायमचे बंद करतले अशीय शिटकावणी इराणान दिल्या. हाका लागून इराण आनी अमेरिके मदलो संघर्श आनीक वाडटलो अशीं लक्षणां दिसतात.
अमेरिकेचे अध्यक्ष डोनाल्ड ट्रम्प इराणांत आशिल्लो समृध्द युरेनियमाचो व्हडलो सांठो भायर काडपाक अमेरिकेचें सैन्य धाडपा खातीर खूब धोक्याची लश्करी कारवाय करपाचो विचार करता.
अमेरिकेचीं संयुक्त संस्थानां आनी इझ्राएलान 28 फेब्रुवारी सावन इराणा आड आक्रमक कारवाय करपाक सुरवात केल्ली. काल झुजाचो 24 वो दीस आशिल्लो. ह्या झुजांत इराणांत 1500 लोकांक मरण आयलां. इराणान होर्मुझ सामुद्रधुनी खनिज तेल आनी वायू व्हरपी बोटी खातीर बंद केल्या. ताका लागून संवसारांतल्या इंधनाची 20 टक्के पुरवण बंद जाल्या. ताचो परिणाम आतां वेगवेगळ्या देशांनी जाणवता. ताचे बदला खनिज तेलाचे पुरवणेंत संकश्ट आयलां आनी गॅस आनी इंधनाचे दरय वाडल्यात. डोनाल्ड ट्रम्प हांणी सोशल मिडियाचेर एक पोस्ट घाल्या. तातूंत ताणें ही अस्पश्ट शिटकावणी दिल्या. सगळ्यांत व्हडल्या वीज प्रकल्पांतल्यान हल्लो सुरू जातलो अशें शिटकावणींत म्हणलां.
ट्रम्पाच्या शिटकावणीक जाप दितना इराणाच्या ‘खतम अल-अंबिया सेंट्रल कमांड’चे प्रवक्ते इब्राहिम ज़ोल्फाघरी हांणी सांगलें, आमच्या उर्जा प्रकल्पांक लक्ष्य केल्यार आमी मध्य उदेंतांतल्या अमेरिका आनी इझ्राएलाक संबंदीत आशिल्ल्या सगळ्या उर्जा मुळाव्या साधनसुविधांचेरूय हल्लो करतले. आमी डिसॅलिनेशन प्लांट आनी म्हायती तंत्रज्ञान सुविधांचेर हल्लो करतले.
संयुक्त अरब अमीरात, ब्रिटन, फ्रांस, जर्मनी, जपान ह्या सारक्या 22 देशांनी होर्मुझाचेर एकठांय आयल्यात. होर्मुझ सामुद्रधुनीक आडावप म्हणल्यार आंतरराश्ट्रीय कायद्याचें उल्लंघन अशें तांणी सांगलां. इराणान हल्ले थांबवचे आनी दर्याचो मार्ग उक्तो करचो.
होर्मुझ सामुद्रधुनी सगळ्या देशांतल्या बोटी खातीर उक्ती आसा; पूण दुस्मान देशांतल्या बोटींक प्रवेश मेळचो ना अशें इराणान जाहीर केलां. आतां दुस्मान देशांत अमेरिकेचो, इझ्राएल आनी तांच्या इश्ट देशांचो आस्पाव जाता. संवसारांतली सुमार 20 टक्के तेल येरादारी होर्मुझ सामुद्रधुनींतल्यान वता. हाचो संवसारीक उर्जा पुरवणाचेर परिणाम जावपाची भिरांत आसा.
फाटल्या 4 सप्तकां सावन इराणांत इंटरनॅट सेवा बंद जाल्या. ‘इंटरनेट जोडणी’चेर नियंत्रण दवरपी ‘नेटब्लॉक्स’ संघटनेच्या म्हणण्या प्रमाण भायल्या संवसाराक जोडपी इंटरनॅट दुवे चड करून पुरायपणान कातरल्यात आनी घरगुती इंटरनॅट वापर खूब मर्यादीत जाला. तशेंच सरकारान व्हीपीएन आनी ‘सॅटेलाइट इंटरनॅट’ हांचेर बंदी घाल्या; ताका लागून आतां लोकां कडेन इंटरनॅट वापरपाचे पर्याय सामके उणे आसात.
झुजाचो तेल पुरवणाचेर परिणाम जावं येता अशें अध्यक्ष अनुरा कुमार डिसानायके हांणी स्पश्ट केलें; देखून देशान ताचे खातीर आदींच तयार करपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
