भांगरभूंय | प्रतिनिधी
-म्हापशें पालिकेच्या निर्णयाचेर उच्च न्यायालयाची नाराजी
म्हापशेंः गोंय जमीन उदरगत आनी इमारत बांदकाम नेमावळ 2010 अंमलात येवचे पयलीं ही होर्डिंग अस्तित्वांत आशिल्ली अशें सांगून शारांतल्या 14 होर्डिंग धनयांक धाडिल्ली कारणां दाखयात नोटिसो फाटीं घेवपाच्या निर्णयाचेर मुंबय उच्च न्यायालयाच्या गोंय खंडपिठान नाराजी उक्तायल्या.
फाटल्या बिरेस्तारा 3 तारखेक जाल्ल्या भौशीक हिताच्या दाव्याचे सुनावणे वेळार खंडपिठान हे संबंदी योग्य आदेश दिवचे पयलीं पिडीत पक्षांक आपलें म्हणणें सादर करपाचें निर्देश दिलें आनी सुनावणी 29 जुलयाक थारायली.
कारणां दाखयात नोटिसो जे पद्दतीन फाटीं घेतल्यात ते विशीं आमी मात्तूय समाधानी नात. ताका लागून होर्डींग कायमस्वरूपी उरपाची परवानगी मेळटली, असो निश्कर्श नोंदोवन म्हापशें पालिका मुख्याधिकाऱ्यांनी 26 एप्रील दिसा दिल्ल्यो 14 कारणां दाखयांत नोटिसीची कार्यवाही रद्द केल्या. प्रभावीत पक्षाचे म्हणणें आयकून उपरांत योग्य आदेश दितले, अशें न्यायमूर्ती एमएस कर्णीक आनी न्यायमूर्ती वाल्मिकी मिनेझीस हांणी सांगलें.
सुनावणी वेळार म्हापशें पालिकेचे वकील अॅड. पाडियार हांणी सांगलें, 18 होर्डिंगांक कारणां दाखयात नोटिसो जारी केल्ल्यो, तातूंतल्यो 14 नोटीस फाटीं घेतल्यात. एक होर्डिंग मोडून उडयले, जाल्यार आनीक तीन होर्डिंग मोडपाचो आदेश जारी केला. संबंदीत होर्डिंग धनयां कडेन सुनावणी जाले उपरांत ह्यो नोटिसो फाटीं घेतल्यात अशें तांणी न्यायालयांत सादर केलें.
खंडपिठान नमूद केल्ले प्रमाण तांणी ह्या आदेशाचे उल्लंघन केला, जातूंत नोटीस फाटीं घेवपाचें कारण नमूद केलां. कारण हे होर्डींग गोंय जमीन उदरगत आनी बांदकाम विनियम 2020 त लागू जावपा पयलीं लायिल्ले. ताका लागून नेमळावळींतल्यो कांय तजविजो लागू जायनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
