भांगरभूंय | प्रतिनिधी
भांगरभूंय । प्रतिनिधी
पणजी : होम स्टे येवजण दिसपाक बरी आसली तरी प्रोमोटरच्या नांवा खाला वेवसायीक आस्थापनांक लाव दिवपाची तजवीज आसा. हाका लागून ही येवजण म्हणल्यार भानगड आसा, असो आरोप काँग्रेस आमदार कार्लोस फेरेरा हांणी केलो. पर्यटन मागण्यांचे उलयताना आमदारांनी मतदारसंघांतल्या पर्यटन थळांचो विकास करपाची मागणी केली.
होम स्टे येवजण ही बरी येवजण आसा. दर्यादेग तशेंच गांवगिऱ्या वाठारांत जांचीं व्हडलीं घरा आसात, त्या घरांतल्या लोकांक रोजगार दिवपाची तजवीज आसा. तरी हे येवजणेंत होम स्टेक उर्बा दिवपी वेवसायीक आस्थापनांचो लेगीत आस्पाव आसा. हाका लागून भायलीं आस्थापनां गांवगिऱ्या वाठारांत बरीं घरां बांदतले आनी सवलती दितले. एक वा दोन आस्थापनांक हाचो लाव जातलो. प्रोमोटराचे तजविजेक लागून ही येवजण पारदर्शी दिसना, अशें कार्लोस फेरेरा हांणी सांगलें. पोंबुर्पा झर हें बरें पर्यटन थळ आसा. पर्यटन थळ जावपा खातीर फावो त्या प्रमाणांत पर्यटन खात्यान लक्ष दिवंक ना, अशेंय तांणी सांगलें.
दोना पावल जेटी कार्यावळीं खातीर कंत्राटदारांक दिवची न्हय, अशी मागणी थळावी आमदार जेनिफर मोंसेरात हांणी केली. कंत्राटदारांक जेटी दिल्ल्या कारणान लोकांक ती वापरपाक मेळना, अशें तांणी सांगलें.
पांडुरंग देवस्थान (सांखळी), हरवळें घसघसो, सप्तकोटेश्वर देवूळ हांचें पर्यटन सर्कीट करपाची मागणी आमदार प्रेमेंद शेट हांणी केली. हें पर्यटन सर्कीट जालें जाल्यार वाठाराची उदरगत जातली. कारापूरचे कोळंब तळें पर्यटन थळ म्हूण विकसीत करपाची मागणी तांणी केली.
हॉटेलां, उदकां खेळ (वॉटर स्पोर्टस) तशेंच पर्यटन वेवसायिकांचें शुल्क उणें करपाक जाय. येणावळी खातीर थळाव्या लोकां खातीर चड शुल्क आकारप अयोग्य आसा, अशें आलेक्स रेजिनाल्ड हांणी सांगलें.
दुदसागर घसघसो, महादेव मंदीर (तांबडी सुर्ला) हांचे सयत सांगें, सांवड्डें वाठारांतल्या हेर पर्यटन थळांची उदरगत जावपाक जाय, अशी मागणी आमदार गणेश गांवकार हांणी केली.
वास्को रेल्वे स्थानक, खारीवाडो दर्यादेग हांकां उर्बा दिवन वास्कोंत पर्यटन वाडोवपाची मागणी आमदार कृष्णा साळकार हांणी केली. गोंयांतलो पयलो कॅसिनो वास्कोंत सुरू जाल्लो. ही इमारत अजून आसा. हे इमारतीचो पर्यटना खातीर उपेग करप शक्य आसा, अशेंय तांणी सांगलें.
पर्यटना खातीर दर्यादेगांचे नितळसाणी कडेन लक्ष दिवपाची गरज आसा. दर्यादेगांचे नितळसाणीचेर नदर दवरपा खातीर व्हॉट्सअॅप ग्रूप करपाची मागणी आमदार डिलायला लोबो हांणी केली.
घुंवळी वखदांच्या वेव्हाराक लागून गोंयचें पर्यटन बदनाम जावपाक लागलां. बाणावले टुरीझम ट्रॅवल मार्ट आयोजीत करपाची मागणी आमदार वेन्झी व्हिएगस हांणी केली.
आमदार संकल्प आमोणकार हांणी वास्कोच्या किल्ल्या कडेन लक्ष दिवपाची मागणी केली. वास्कोचो किल्लो कोसाळिल्ले स्थितींत आसा. किल्याची दुरूस्ती करपाची गरज संकल्प आमोणकार हांणी उक्तायली.
सांगोड, बोंदेर हांकां 25 लाखा मेरेन अर्थीक मजत दिवपाची मागणी आमदार राजेश फळदेसाय हांणी केली. दिवाडी जुंव्यार उदकां खेळ सुरू करपाची मागणी तांणी केली. फ्रान्सीस झेवियराच्या पवित्र कुडीच्या अवशेश प्रदर्शनाचें विदेशांत प्रमोशन करप गरजेचें आसा. हाका लागून पर्यटकांचो आकडो वाडटलो, अशें तांणी सांगलें. जीत आरोलकार, एल्टन डिकोस्टा, दिगंबर कामत, क्रूज सिल्वा, विजय सरदेसाय हांणी पर्यटना संबंदांत तरेकवार सुचोवण्यो केल्यो.
कनेक्टिविटी समस्या
मोबायल कनेक्टिविटी सुदारपा खातीर गांवगिऱ्या वाठारांत ऑप्टीकल फायबर घालपाची मागणी आमदारांनी केली. गांवगिऱ्या वाठारांत इंटरनॅट तशेंच कनेक्टिविटीची समस्या खर आशिल्ल्याचें आमदारांनी सांगलें.
रस्त्याचेर रांदपी पर्यटक गोंयांत : मायकल लोबो
गोंयांत दर्जेदार पर्यटकांचो आकडो देंवत आसा. रस्त्याचेर रांदपी आनी जेवण घेवन येवपी पर्यटक गोंयांत चड येतात. हाका लागून प्रदुशणाचें प्रमाण वाडटा. टॅक्सी तशेंच हॉटेलांक वेवसाय जायना, अशें मायकल लोबो हांणी सांगलें. पर्यटनाक उर्बा दिवपा खातीर विदेशांत रोड शो जावपाक जाय, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
