भांगरभूंय | प्रतिनिधी
पणजीः पर्यटन खात्यान होमस्टे आनी बेड अँड ब्रेकफास्ट येवजण 2025 ची अधिसुचोवणी दिल्या. हाचे प्रमाण राज्याच्या भितरल्या वाठारांतल्या बायलां अापमजत गटां वरवीं चलयिल्ल्या पात्र लाबार्थ्यांक 2 लाख रुपया निधी दितले. हो निधी मुळाव्या सुविधां खातीर, इमारत बांदकाम, सोबीतीकरण आदी खातीर वापरचो पडटलो. निधी वापराचें प्रमाणपत्र स म्हयन्यां भितर खात्याक सादर करचें पडटलें. मजत मेळ्ळ्या उपरांत होमस्टे युनीट उण्यांत उणें दोन वर्सां सुरू दवरप गरजेचें आसा. येवजणेचो काळ पांच वर्सां आसतलो.
खात्यान जारी केल्ले अधिसुचोवणे प्रमाण गोंयांतले दर्यादेग हांगा पर्यटनाची एकूच वळख उरची न्हय हे खातीर पर्यटन खातें नवे धोरण हाडटा. ते प्रमाण थळाव्या लोकांक रोजगाराची संद मेळोवन दिवप, तांची कुशळटाय वाडोवप, थळाव्या उत्पादनांक बाजारपेठ दिवप, परंपरीक गोंयच्या वास्तुकलेच्या घरांची राखण करप आदी गांवगिऱ्या वाठारांनी होमस्टे येवजण सुरू केल्या. तशेंच हाचे वरवीं वेवसायीक सुविधा दिवन राज्यांतल्या होमस्टेचेर नियंत्रण दवरप सोंपें जातलें.
ही येवजण राज्यांतल्या गांवगिऱ्या वाठारांतल्या सात तालुक्यां खातीर आसतली. तातूंत सत्तरी, धारबांदोडें, सांगें, दिवचल, फोंडें, केपें आनी काणकोण हांचो आस्पाव जाता. होमस्टे खातीर अर्ज करपी मनशाक घराचें मालकी हक्क आसूंक जाय. तातूंत उण्यांत उणी 1 आनी चडांत चड 6 कुडी आसपाक जाय. हांगा चडांत चड 12 खाटींक परवानगी मेळटली. अर्जदार वा ताचे आवय-बापूय उण्यांत उणें 15 वर्सां त्या पंचायती वा नगरपालिका वाठारांत रावपी आसूंक जाय.
इत्सूकांनी ऑनलायन वा ऑफलायन अर्ज करप आनी पर्यटन खात्या कडेन नोंदणी करप सक्तीचें आसा.
तशेंच खात्यांत नोंदणीकृत होमस्टे आनी बेड अँड ब्रेकफास्ट आस्थापनांक वर्साक एक फावट थळाव्या वेपार प्रदर्शनांत वांटो घेवपा खातीर चडांत चड 50 हजार रुपया मजत दितले. अशा आस्थापनांक पर्यटन खात्याचो वेळ सॉफ्टवेअर फुकट दितले.
तशेंच तांकां उद्देगांतल्या वेवसायीकां कडल्यान प्रशिक्षण दितले अशें अधिसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
