भांगरभूंय | प्रतिनिधी
पणजी : राज्यांत होमगार्डच्या १४३ पदां खातीर ६ हजारा परस चड अर्ज आशिल्ल्याची म्हायती मेळ्ळ्या. बुधवरा, ११ डिसेंबराक आल्तिनो जीआरपी कॅम्पसांत उमेदवारीच्या अर्जांची पडताळणी जाली. तशेंच उमेदवारांचो रावपाचो दाखलो, जल्म, शिक्षण दाखलो आनी हेर कागदपत्रांची तपासणी केली. अर्जांची तपासणी करपा खातीर उमेदवारांच्यो लायनी लागिल्यो.
मेळिल्ले म्हायती प्रमाण, गोंयांत सद्या होमगार्डच्यो १५०० सुवातो मंजूर केल्यात. राज्यांत वेगवेगळ्या सुवातांचेर वट्ट १२३० होमगार्ड काम करतात. होमगार्डांच्यो २७० सुवातो रित्यो आसात. सद्या हातूंत १४३ सुवातांचेर भरती प्रक्रिया सुरू आसा. राज्य सरकारान होमगार्डा खातीर १० टक्के आरक्षण दिवपाचो निर्णय घेतला. तेच प्रमाण होमगार्डन पुलीस कॉन्स्टेबल, बंदखण गार्ड, अबकारी गार्ड, उजो पालोवपी दळ तशेंच रान खात्यांत बडती मेळपाक शकता.
अर्जांची तपासणी जाले उपरांत भरतींची फुडली प्रक्रिया सुरू जातली. उपरांत शरिरीक तपासणी आनी लेखी परिक्षा घेतले. लेखी परिक्षेंत पास जावपा खातीर ३५ मदले १४ गूण मेळोवप गरजेचें. निवड जाल्ल्या होमगार्डांक भरती जावचे पयलीं वाळपय पुलीस प्रशिक्षण केंद्रांत ४५ दिसांचें प्रशिक्षण दितलें. होमगार्डांक राज्यांतल्या खंयच्याय वाठारांत काम करचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
