भांगरभूंय | प्रतिनिधी
निलेश काब्रालः कामा खातीर कोणाचोच विरोध ना
भांगरभूंय । प्रतिनिधी
केपें: होडार- कुडचडें पुलाचें काम बेगीन जावपाक जाय. आदीं ह्या पुलाची रुंदी उणी आशिल्ली. एक गाडी गेली जाल्यार दुसरी सुटनाशिल्ली. ताका लागून खूबशे अपघात जाले आनी तातूंतल्या कांय जाणांक जीव लेगीत वगडावचो पडला. हे खातीर हो म्हत्वाचो पूल म्हूण तो बेगिनांत बेगीन करपाचो हेतू आसा, अशें भौशीक बांदकाम मंत्री निलेश काब्राल हांणी म्हणलां.
होडार ते कुडचडें मेरेन पुलाचें काम जुस्त भुरग्यांचे धावेचे परिक्षे वेळार हातांत घेतिल्ल्यान ह्या कामा वयल्यान राजकारण तापिल्लें. धावीची परिक्षा आशिल्ल्यान ह्या वाठारांतलीं भुरगीं आनी पालकांक चार किलोमिटर भोंवताडो घालून वचचें पडटलें. सात दीस हो पूल बंद आसतलो, अशी नोटीस भौशीक बांदकाम खात्यान जारी केल्या. ह्या संबंदांत आदले नगराध्यक्ष आनी सध्याचे नगरसेवक पिंटी होडारकार हांणी प्रतिक्रिया दिल्ली.
हाका प्रतिजाप दितना भौशीक बांदकाम मंत्री निलेश काब्राल हांणी म्हणलां, कुडचडेंचे पालक आपल्याक वळखतात आनी लोक आपल्या संपर्कांत आसात. ह्या कामा खातीर कोणेच आपल्याक विरोध करूंक ना. रस्त्या वयल्यान राजकारण करतात तांणी भुरग्यां खातीर कितें केलां तें आदीं सांगचें, अशें मंत्री काब्राल हांणी म्हणलां.
धावेची परिक्षा आसा हें त्या लोकांनी आपल्याक सांगपाची गरज ना. कुडचडेंच्या लोकांकूय तें खबर आसा. तांकां उदरगत जाय. हेच खातीर फाटले वर्सभर रस्ते खणिल्ले आसात, तांकां त्रास जातात, तरीय ते समजून घेतात. कारण कसलेंय उदरगतीचें काम करतना त्रास हो जाताच, तें ते जाणात. पुला विशीं उलोवचें जाल्यार ताका पर्यायी रस्तो आसा. हाडोर वटेन धावेचे परिक्षेक वचपी कितले विद्यार्थी आसात ताची वळेरी काडल्या. जो कोण पुलाच्या कामाचेर टिका करता ताका कितले विद्यार्थी आसात ते विचारचें, अशें मंत्री काब्राल हांणी सांगलें.
31 मार्चाक राती सावन पूल बंद केला आनी फुडले सात दीस तो बंद आसतलो अशें जरी सांगलें तरीय शेनवार, आयतार सुटी आसा. सोमार एक दीस लोकांक त्रास जातलो. मंगळार मेरेन पुलाचे काम पुराय जातलें, असो विस्वास आसा. साद दिसां आदीं पुलाची एक बाजू उक्ती करपाचो यत्न करतले. सगळ्यो गजाली वेळार जाल्यो जाल्यार काम वेळा आदींच पुराय जातलें. होडार पूल आमकां बेगिनांत बेगीन पुराय करपाचें आसा, अशें मंत्री काब्राल हांणी सांगलें. आपूण फाटल्या 15 वर्सां सावन दर वर्सा शिबिरां आनी हेर माध्यमांतल्यान विद्यार्थ्यांक पुस्तकां आनी हेर साहित्य वांट्टां. सेगीत विद्यार्थ्यांच्या संपर्कांत आसता. पुला वयल्यान जे राजकारण करतात, तांणी विद्यार्थ्यां खातीर कितें केलां, तें स्पश्ट करचें, अशें मंत्री काब्राल हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
