भांगरभूंय | प्रतिनिधी
केरी- सत्तरीः भारतीय संस्कृतींत राखी पुनवेच्या सणाक व्हड म्हत्व आसा. ह्या दिसा भयण मोगाचें प्रतीक म्हूण भावाक राखी बांदता, तशेंच भयणीचें रक्षण करचें आनी भावाक व्हड आयुश्य मेळचें हे खातीर देवा कडेन प्रार्थना करतात. सगळेच कडेन झाडां मारिल्ल्यान सैमाची संतुळाय इबाडल्या. हाचो परिणाम म्हणल्यार तापमानवाड ही संवसारीक समस्या जाल्या. हे खातीर झाडांचे रोपे लावपा वांगडाच आशिल्ल्या झाडांचो सांबाळ करपाची गरज आसा. हेच खातीर नारायण नगर होंडाच्या सरकारी मुळाव्या शाळेच्या विद्यार्थ्यांनी वृक्षबंधन केलें.
श्रावणांत खूबशे सण येतात. खूबशे सण हे खरे म्हणल्यार सैम पुजे कडेन संबंदीत आसतात. पर्यावरण समजून घेवचे खातीर हे सण तेच पद्दतीन समजून घेवप गरजेचे आनी मनोवपाचे आसतात. हेच नदरेन नारायण नगर होंडाची सरकारी मुळावे शाळेंतले विद्यार्थी श्रावण म्हयन्यांतले सण मनयतात. शाळेंत नागपंचमी निमतान विद्यार्थ्यांनी सोरपां विशीं म्हायती घेतली. तशेंच रानभाजयो महोत्सवूय मनयलो.
रक्षाबंधना निमतान सैमीक राखयो तयार करून तांचे प्रदर्शन मांडलें. कडधान्य, वेगवेगळीं पानां, फुलां वापरून विद्यार्थ्यांनी कल्पकता दाखयली. झाडां आमचें रक्षण करतात, ताका लागून रक्षीबंधना निमतान भुरग्यांनी दोन झाडांक स्वता तयेर केल्ल्यो राखयो बांदल्यो. शिक्षिका दीपाली गांवस, शिक्षिका मिलिंदी हांणी रक्षाबंधन आनी सुतांपुनव हे विशीं म्हायती दिली. ह्या वेळार पालक लेगीत व्हड संख्येन हाजीर राविल्ले.
परिसर अभ्यास ह्या विशयाचो अभ्यास अशे आगळे पद्दतीन जाता हाका लागून पालकांनी शिक्षकांक परबीं दिलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
