भांगरभूंय | प्रतिनिधी
थळाव्या लोकांचो प्रस्न : बायपास रस्त्याची मागणी अजून पडून
भांगरभूंय । प्रतिनिधी
वाळपय : होंडा गांवकारवाड्या वयल्या अशीर रस्त्यांचेर दिसानदीस वाडपी येरादारी कोंयडीक लागून थळाव्या लोक बेजार जाल्यात. ह्या वाठारांतल्यान जावपी येरादारी खातीर पर्यायी रस्त्याची सुविधा निर्माण करात, अशी कितल्याश्याच वर्सांची लोकांची मागणी आसा, पूण अजून ती पुराय जावंक ना. हाका लागून लोकांनी खर नाराजी उक्तायल्या.
बुधवारा 7 जानेवारीक ह्या मार्गाचेर परतून एकदां येरादारीची कोंयडी जाली. खूबश्यो गाडयो कितलोसोच वेळ आडकून उरल्यो. व्हड गाडयो मुखा वयल्यान येतकच उरफाटे दिशेन येवपी गाडयांक वाट मेळना, हाका लागून ही कोंयडी जाली. हे कटकटी पसून आमकां केन्ना मुक्ती मेळटली, असो प्रस्न गांवकारवाड्या वयले लोक करपाक लागल्यात.
ह्याच मार्गा वयल्यान चोर्ला मार्गान खडी येरादारी, रेंव येरादारी तशेंच 10 टायरांच्या, 16 टायरांच्या गाडयांची येरादारी ह्या मार्गा वयल्यान जाता. तशेंच गोंयांतल्यान हैदराबाद, बंगळुरू, पंढरपूर, पुणे ह्या वाठारांत वचपी प्रवासी बशी ह्याच मार्गाचो वापर करतात. गांवकारावड्या वयलो रस्तो अशीर आसा. हे खातीर अवजड आनी व्हड प्रवासी गाडयांक लागून नेमान ह्या वाठारांत येरादारेची कोंयडी जाता. हेरशी जिल्होधिकाऱ्यांच्या आदेशा प्रमाण ह्या वाठारांतल्यान अवजड गाडयांचे येरादारीक मनाय केल्या. मात ह्या आदेशाची अंमलबजावणी गांभिर्यान करिनात, असो आरोप थळाव्या लोकांनी केला.
मजगतीं, सांखळी मार्गान बेळगांवां वचपाक- येवपा खातीर सांखळे आशिल्ल्या आडखळीच्या रस्त्याक लागून शक्य ना. हाका लागून ही येरादारी होंडा मार्गान मोर्ले आनी ते उपरांत केरी वाठारांत वता. ल्हान गाडयो सोडल्यार सगले तरेची म्हालयेरादारी होंडा गांवकारवाड्या वयल्या रस्त्याचो वापर करतात. थळाव्या लोकांनी दिल्ले म्हायती प्रमाण रातीं- मध्यानरातीं ह्या वाठारांतल्यान जावपी येरादारीक लागून लोकांची न्हीद मोडटा. कान फोडपी हॉर्नांचो आवाजाक लागून आंग काडून उठपाक जाता. हे खातीर ही येरादारी ह्या मार्गा वयल्यान बंद करची, अशी मागणी ह्या वाठारांतल्या लोकांनी हाचे आदींच केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
