भांगरभूंय | प्रतिनिधी
वाळपय : होंडाच्या उद्देगीक वसणुके लागसारचे शेवंती माईणकार हिच्या घराक आयज अचकीत उजो लागिल्ल्यान बरेंच व्हड अर्थीक लुकसाण जाल्ल्याचें मुखार आयलां.
हे विशीं चड म्हायती प्रमाण, आयज दनपरां शेवंती माईणकार हिच्या घराचे फाटले वटेन उजो लागलो. हो उजो कांय वेळांतूच तिच्या घराच्या पांख्या मेरेन पावलो आनी तिच्या घरांतलें सामान लासून गेलें. हो उजो घरच्या वांगडा शेजार्यांनीय नियंत्रणांत हाडपाचो यत्न केलो. मात ते यत्न अपेशी थारले.
हे विशीं वाळपय उजो पालोवपी दळाक कळयले उपरांत विभागाचे कर्मचारी रोखडेच घडणुके सुवातर पावले आनी तांणी उज्याचेर नियंत्रण हाडलें. ह्या उज्यांत सुमार ५० हजार रुपयां परस चड लुकसाण जालां. तशेंच घराची पुरायेन सामकी वायट अवस्था जाल्या.
माईणकार हांणी अर्थीक अवस्था सारकी नाशिल्ल्यान घर दुरुस्त करप तिका शक्य ना. हाका लागून तिणें सरकारान बेगोबेगो मजत करपाची मागणी केल्या.
मजगतीं, थळावी आमदार डॉ. देविया राणे हांणी हे विशीं रोखडीच दखल घेवन माईणकार कुटुंबियांक बेगोबेग मजत करतले अशें आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
