भांगरभूंय | प्रतिनिधी
फोंडें: गोंयांत सध्या लग्नांचो मोसम सुरू जाला. शारांतल्या विवीध हॉलांचें लग्न सुवाळ्यां खातीर नेटान बुकींग चालू आसा. लग्न सुवाळ्यांत लाखांनी रुपयांची उलाढाल जाता. फोंडें शारांत हालींच लग्नाच्या हॉलांत पावचे आदींच व्हंकलेन रस्त्या वयल्यानूच आपल्या मोगीं वांगडा पळून वचपाचो प्रकार घडलो. ताका लागून हॉलांत व्हंकलेच्या गळ्यांत माळ घालपा खातीर तयार राविल्ल्या न्हवऱ्या सयत ताच्या घरच्यांक, सोयऱ्यांक आनी इश्ट परिवाराक व्हंकलेचे करणेक लागून तोंड धांपून घरा वच्चें पडलें.
पुराय म्हायती प्रमाण दोन वेगवेगळ्या गांवांतल्या व्हंकल- न्हवऱ्याचें लग्न थारलें. फोंडें शारांतल्या एका आलिशान हॉलांत लग्न सुवाळो आयोजीत केलो. लग्न सुवाळ्याक येवपी सोयरी- धायरी आनी इश्ट परिवारा खातीर सुमार 800 जाणांच्या जेवणाची वेवस्था केल्ली. लग्ना खातीर न्हवऱ्याच्या आनी व्हंकलेच्या घरच्यांनी लाखांनी रुपयांचो खर्च केल्लो. हॉलाचे सजावटी खातीर लेगीत खूबसो खर्च केल्लो. हळद सुवाळो लेगीत व्हड दबाज्यान न्हवऱ्या- व्हकलेच्या घरा जाल्लो. लग्नाच्या दिसा सगळीं तयारी पुराय जाली, पूण व्हंकलेन घात मारिल्ल्यान बाबडो न्हंवरो मान खाला घालून घरा गेलो.
लग्नाच्या दिसा हॉलांत सगळी तयारी पुराय जाल्ली. लग्नाचो म्हूर्त दनपारचो आशिल्ल्यान जेवणाची लेगीत तयारी पुराय जाल्ली. हॉलांत न्हंवऱ्या सयत ताची सोयरी- धायरी आनी इश्ट परिवार पाविल्लो. लग्नाचो म्हूर्त चुकचो न्हय हे खातीर भटजी तयारी करतालो. न्हंवऱ्या कडलीं सगळीं व्हंकलचें तोंड पळोवपाक उत्सूक आशिल्ले. त्या वेळार हॉला भायर आलिशान गाडयेंतल्यान व्हंकलेक देंवतना खूब जाणांनी पळयली. पूण त्याच वेळार व्हंकलेचे गाडये लागसार आनीक एक मोटर येवन रावली. मोटारी लागसार आशिल्ल्या हेरांक कांय कळचे आदींच व्हंकलेन फाटलो फुडलो विचार करिनासतना मोटारींतल्यान देंवून दुसरे मोटारींत वचून बसली. व्हंकल मोटारींत बसताच मातूय वेळ काडिनासतना ती मोटार थंयच्यान नाच्च जाली. व्हंकल दुसरे मोटारींत बसून गेले उपरांत मात लोकांक खरी गजाल कळ्ळी. ती व्हंकल दुसऱ्याच्या मोगांत पडिल्ली. मात तिच्या घरांतले तिचें लग्न जबरदस्तीन दुसऱ्या चल्या कडेन लावन दितात अशें व्हंकलेन आपल्या मोगीक कळयल्लें. लग्ना आदींच सगळ्यांच्या दोळ्यां मुखार पळून वचपाचो मोगी आनी मोगिकेचो यत्न फळादीक जाल्ल्याची चर्चा फोंडें शारांत चल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
