भांगरभूंय | प्रतिनिधी
तेलंगणा, खबरां संस्थाः महाराष्ट्राच्या ठाणे जिल्ह्यांतल्या मीरा भाईंदर – वसय विरार पुलिसांनी ड्रग्स आड व्हड कारवाय केल्या. पुलिसांनी हैदराबादांत धाड घालून व्हड ड्रग्स फॅक्टरी उक्ताडार हाडली. हे कारवायेंत 32 हजार लिटर लिक्विड एमडी (मेथीलीनडायऑक्सी मेथॅम्फेटामाइन) ड्रग्ज जप्त केलां. जाचें आंतरराष्ट्रीय बाजारांतलें मोल सुमार 12 हजार कोटी रुपया आसा. ह्या प्रकरणांत आतां मेरेन 13 दुबावितांक अटक केल्या.
ह्या प्रकरणाची सुरवात 25 लाखांचें 200 ग्राम एमडी ड्रग्ज जप्त केल्ले तेन्ना सावन जाली. तपासा वेळार पुलिसांनी तेलंगणांतल्या गुप्त फॅक्टरीचो सोद लायलो. फॅक्टरीतल्यान जप्त केल्लें केमिकल्स आनी हेर सामान जप्त केलां.
पुलिसांनी दिल्ले म्हायती प्रमाण, ह्या फॅक्टरीत अत्याधुनीक यंत्रणा आनी रसायनां वापरून एमडी ड्रग्ज तयार करताले. दुबावितांनी पुरवणदार आनी वितरकांचें व्हडलें जाळें तयार केलां. देखून ह्या पुराय नेटवर्काचो सोद घेवप पुलिसांक व्हड आव्हान जालें. हाचे आदीं मीरा-भाईंदर पुलिसांनी ड्रग्स विरोधी कारवाय करून 22 कोटी रुपयांचें 15 किल कोकेन जप्त केल्लें. त्या प्रकरणांत दोग परदेशी नागरिकां सयत तीग जाणांक अटक केल्ली.
मजगतीं, जुलयांत मुंबय पुलिसांनी 400 कोटी रुपया मोलाचो व्हड प्रमाणांत ड्रग्साचो सांठो जप्त करून व्हड कारवाय केल्ली. हाचे उपरांत ह्याच प्रकरणांत कर्नाटकांतल्या म्हैसूरांत धाड घाली. हे फाटभुंयेर देशभरांत ड्रग्स सिंडिकेट कितले खोलायेन पातळ्ळा तें स्पश्ट जाता अशें सूत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
