भांगरभूंय | प्रतिनिधी
ज्येश्ठ पत्रकार संमेलनाक पांच पत्रकारांचो पंगड फाटल्या सप्तकांत केरळांत गेलो तेन्ना पावस नेटान पडटालो, रों रों वारो थाकाय दिवपी. चवथी आदीं येवपी उमासेचीं कुपां गोंयांत येतना मळबांत दिसलीं. वेधशाळेन हवामानांत बदल जातले अशें कळयलां. दोन सप्तकां आदीं चवथीक पावस आसतलो अशें ज्येश्ठनीतींत बरयिल्लें वेधशाळेन मांडिल्ल्या अदमासान. गोंयची पावसाची वर्सुकी सरासरी भरत आयल्या. पावस खूब पडल्यारय चवथ उरचीना, चड वेळ घरच्या वावरांत शिरकुपाची सगल्यांची तयारी आसची. चवथ देड दिसाची आसली तरी वावर खूब आसता. नितळसाण, रांदप वाडप दिवप घेवप चड उणें जालें तरी चवथ जातलीच. चवथीची गोडसाण गोंयच्या घराघरांतली, देड दीस ते सात दिसांची. चवथीक गोंयचे घराबे एकठांय येतात, आरत जेवणां खबरी आसतात, तीच तर ज्येश्ठनीत.
केरळा सावन घरा येतना चवथीच्या वावरांत मनां घुस्पल्लीं. संमेलनाक वतना ज्येश्ठ पत्रकारांक देस पावंड्या वयले समितीची बांदावळीचो अदमास आशिल्लो, पूण संमेलन गोंयांक कितें दितलें अशें दिसूंक नाशिल्लें. येतना अभिनंदनाच्या मेसेजीचो पावस समितीचेर पडलो. ज्येश्ठ पत्रकारांच्या विचार, बसकांक म्हत्व आशिल्लें. निमणे पत्रकारांक अडचणी आसात, ते भायर भलायकी, समाजीक सुरक्षा, फुडाराचो हुस्को, दिसाळीं उरतलीं? माध्यमाचें प्रदुशण अती जालां? भोव- माध्यमी पत्रकारीता टेन्शन वाडोवपी? उपाय कितें करप? ह्या विशयांचेर भासाभास जाली. माची सोडप ना, विचार परगटावप हें म्हज्या मनान आशिल्लें. एकामेकांक मेळप, मानेस्तांच्या मनां समजून घेवप, ज्येश्ठांचे प्रस्न सरकारा मेरेन पावोवप, सोडोवप, कायदे बदलप विशय संमेलनांत आशिल्ले.
संमेलनाची जापसालदारकी केरळ पत्रकार समितीची. संमेलनाच्या ब्रोशरार, उक्तावणाक आसतलें हें निमण्या आठ दिसांनी कळ्ळें. मन केरळाक केन्नाच पाविल्लें, चवथीक येतलीं हो निश्चेव जाल्लो. 21 राज्यांचे पत्रकार प्रतिनिधी आयिल्ले. गोंयच्या पत्रकारांच्या पंगडान राज्यपाल राजेंद्र आर्लेकार हांचे भेटेवेळार पत्रकारांचे प्रस्न मांडले, खबरो छापून आयल्यो. संमेलनाच्या आरंभाक केरळचे राज्यपाल प्रस्न सुटावे करूंक शकतात हो विश्वास मेळ्ळो. गोंय, गोंय म्हणत ज्येश्ठ म्ह-यांत आयले, संमेलन सोंपता गोंयच्यो यादी आदल्या राज्यपालांनी जागयल्यो. येतना जापसालदारकी आयल्या. माचयेर गोंय आसप म्हत्वाचें अशें म्हाका दिसलें, आमी आसात हीं उतरां गेलीं. चवथ लागीं येतना गोंयांत कितें करप तें थारयलें. केरळ राजभवनांत फुलिल्लीं रोजां, सैम, निकत्याच फुलपी कमळांतली निळाय मनाक धादोसकाय दिवपी. तीच तर ज्येश्ठनीत, विश्वासाची. पावस वारो पळयिल्ली, चार पांच दसकांची.
चूक जाल्यार जाता, पूण उतरां शेणूंक जायनात, दिल्लें उतर मोडूंक जायना हें मतींत दवर अशें सांगपी केरळी भावय चवथ मनयतात. चवथ एक सारकी नासत पूण थंयचें अन्न, उदक, भूंयपूत, धुवेक मायेन वजें धाडटा अशें म्हाका दिसता. ती भूंय भारताची, तीच गोंयची थंय मायभासेक म्हत्व दितात थंयच हिन्दी, कोंकणीय एकठांय येतात. गोंय म्हजी आवयभूंय, तीच म्हजी पितृभूय. आमी जेन्ना एक जावन चवथ मनयतले ते भारतभूंयेंत फुलां फुलतलीं, पानांय मेळटलीं तेन्नाच नेवऱ्यो, मोदक मेळटले. उतरांक उतरां मेळटलीं थंयच दोळ्यांची भास कळटली तेच चवथीची पार्वती, गंगा, मांडवी नितळ उरतली.
नितळसाणीक ना कित्याक म्हणप? नितळसाणींतल्यान निर्माल्याचें भांगर जाता थंयंच गोंय भांगराळें दिसतलें. ती तर म्हजी भांगरभूंय, ती म्हजी विद्या, ती म्हजी देवता. ते देवतेक ‘नन्नी’ म्हणल्यार, दोन हात जोडल्यार, गीतां गायल्यार आमी कित्याक शेण्टलीं? तेंच लोकमान्यांचें स्वातंत्र्य, तें मेळयतना गुळयांचे फार जातले, फातरय मारतले. आमी फातर खायत व्हड जाल्यांत, गरज पडल्यार फातरांनी जापोय दिल्यात , आतां उजवाडाची दिवली पेटोवया, हातांक हात लायत, हात जोडूनय फुडें वचूया, फुडार पळोवया, शांतीकायेचो जाती धर्माचीं दारां मोडटना सादूर रावया, उजवाड दाखोवया. तीच तर ज्येश्ठनीत. ती भारतभूंयेची, तीच आमची भांगरसाळ.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
