भांगरभूंय | प्रतिनिधी
पेडणें: पेडणें नगरपालिकेंतलो कारभार सध्या गंभीर जाला. कर्मचार्यांचे पगार, पेन्शन आनी नागरिकांचीं कामां कितलेशेच म्हयने जाले आडकून पडिल्ल्यान तिडकीचें ल्हार पातळ्ळां. डिसेंबर, जानेवारी आनी फेब्रुवारी ह्या तीन म्हयन्यांचो पगार कर्मचार्यांक मेळूंक ना, जाल्यार कांय निवृत्त कर्मचार्यांक दोन वर्सां पसून पेन्शन मेळूंक नाशिल्ल्याची धक्को दिवपी म्हायती मुखार आयल्या.
पालिकेकडेन दोन अभियंते आनी दोन लेखापाल कार्यरत आसात. मात एकूय कारकून नाशिल्ल्यान सदचीं प्रशासकीय कामां पुरायेन ठप्प जाल्यांत. घरपट्टी ट्रान्सफरच्यो फायली कितलेशेच म्हयने जाले आडकून पडिल्ल्यान नागरिकांक कार्यालयांत पावटी मारच्यो पडटात. हाताच्या बोटार मेजपा इतले कामगार आशिल्ले पालिकेंत, तांकांय फाटले तीन म्हयन्यांचो पगार मेळूंक ना. हाका लागून कर्मचार्यां मदीं तिडक वाडल्या.
सिवरेज टँकर बंद
हातूंत भर म्हणल्यार सुमार ६३ लाख रुपया खर्च करून खरेदी केल्लो सिवरेज टँकर फाटल्या सात म्हयन्यां सावन वापर बगर पडून आसा. गाडी खरेदी करतना चालक, संबंदीत कामगार आनी भितरल्या रस्त्यांची तांक, हाचो विचार केल्लो काय? असो प्रस्न नागरीक विचारतात. संबंदीत कर्मचार्यांक विचारल्यार, केन्ना चालक उपलब्ध नात, जाल्यार केन्ना सिवरेज प्लांट बंद आशिल्ल्याचें सांगतात. मात हो प्लांट फकत पेडण्यां खातीरूच बंद आसा काय पुराय गोंयां खातीर, ह्या प्रस्नाची जाप आजून मेळूंक ना. जनतेच्या कराच्या पयशांचो असो विध्वंस जाता हाचें हें खर उदाहरण थारता.
तसेच पालिकेच्या मुख्याधिकार्यांकडेन अतिरिक्त कार्यभार आशिल्ल्यान ते पुराय वेळ कार्यालयांत हाजीर नासतात. हाचो परिणाम नागरिकांच्यो कागाळी आनी प्रशासकीय निर्णय प्रक्रियेक कळाव जाल्ल्याची कागाळ आसा. नगरसेवकांची उदरगत काय जनतेची उदरगत, असो प्रस्न पेडणेंकारांच्या मनांत निर्माण जाला. पगार- पेन्शन थकबाकी, आडकल्लीं कामां आनी निश्क्रीय साधनसामग्री हे फाटभूंयेर पेडणें नगरपालिकेचो कारभार जापसालदार पद्धतीन चलोवपाची मागणी नागरीक सध्या करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
