भांगरभूंय | प्रतिनिधी
चवथीच्या दिसा गणपतीबाप्पा घरांघरांनी येवप म्हळ्यार ल्हान व्हडाच्या तोंडार खोशेचें ल्हार खेळप. घराघरांत
गणपती पुजपाचें गोंयचें व्हड दायज, गोंयांत येवन, राबितो करप्यांनी तें उखल्लां. आपले पद्धतीन गोंया भायले गोंयकार गणपतीबाप्पा घरांत हाडटात. आपल्या राज्याचे संस्कृतायेंतल्यान पुजा, नेवेद्य, विसर्जन करतात. तांणी गोंयकारपण आपणावपाची, गोंयची संस्कृताय वेंगावपाची गरज आसा. गोंयकार तसो शांत, शेजार्यांक त्रास दिवप, तांची सवस्तकाय इबाडप हो ताचो सभाव न्ही. शेजार्यांनी गोंयकारांचो हो सभावगूण घेवचो, गोंयचे सवस्तकायेक काळें खत लावचें न्हय, गोंयकारांक खुबळावन घालचें न्हय, खुबळायल्यार गोंयकार ओगी रावना. विंगडविंगड विशयां वेल्यान समाजांत धोंशी घालपी राजकारणी, समाजकारणी आसात. तांकां, आमकां बुद्धी दी, आमचें गोंय, गोंयची शांतिकाय सांबाळपाची. हेंच गाराणें अंदूंचे चवथीचें.
चवथी दिसांनी शांत, सवस्तकायेन चलपी गोंय आमकां जाय. पंचमी दिसा गणपतीच्या विसर्जना वेळार फुगोट्यांचो गडगड, सरभोंवतण प्रदुशणा पसून पयस दवरपाक, गोंय, गोंयचो सैम तिगोवपाक सगल्यांक बुद्धी दी अशें गणपतीबाप्पा लागीं मागुया.
गणपतीबाप्पा सैमाच्या सांगातात रावपी, मातयेंतल्यान जल्म घेवपी आनी देड, पांच, सात, 9, 21 दिसां मागीर उदका भरवण जावपी दैवत. त्या दैवता मुखार तुमी आमी बागवतात तेन्ना मनांत सकारात्मक विचार दवरुया, हे भांगरभुंयेंक व्हड करपाचे. गणपतीबाप्पा सगल्यांक बुद्धी दी भांगरभुंयेर संकश्ट येता तेन्ना एकठांय रावपाची तेंच गणपती पायतना अंदूं मागणें करचें.
गणपतीबाप्पा तूं सुखकर्ता, तूं दुखकर्ता, तूंच लंबोदर, मंगलमुर्ती, सिद्धीविनायक, हेरंब, गणनायक, गौरीकुमार…. अशा तुज्या 108 नांवांनी अर्थ आसा. त्या नांवांचो अर्थ समजून घेवपाची बुद्धी गणराया तूंच आमकां सगल्यांक दी.
आयिल्लीं आडमेळीं पयसावन चवथी निमतान गोंयच्या घराब्यांतलीं सगलीं एकामेकांक मेळटलीं. तेन्ना घराबो सांबाळपाक बळगें आमी मागुया, एकवटाचें बीं शिंपडावपाची बुद्धी तूंच सगल्यांक दी.
ल्हान व्हड, अंदल्ले चिड्डले जेन्ना उलो मारतले तेन्ना तांकांय बुद्धी दी तांकांच सोदपाची. ल्हाना व्हडांनी एकूच मागणें करुया जाण्ट्यांक नेण्ट्यांक सांबाळुया. ल्हान रोंपो व्हड जातना चिंतनासतना एखाद्री चूक अज्ञानान घडल्यार ते खातीर माफी मागपा पासत बुद्धी दी.
तूंच बालगणेश, तूंच भालचंद्र, तूंच धूम्रवर्ण, तूंच गौरीसूत, तूंच गजपती, तूंच गणपती बुद्धी दी तूंच सगल्यांक पेटिल्ले म्हारगायेंत जाय तितलेंच विकतें घेवपाक.
सैमाचें दायज सांबाळपा पासत फुडें सरिल्ल्यांक बुद्धी दी आनी सांग सगल्यांक तीच वाट फुडाराची, सैम तिगल्यारच तुमी आमी वाटावपाची.
हे वक्रतुंडा, हे लंबोदरा, हे गौरीपूत्रा चवथी दिसाय पावस घसघशांनी पडटलो, विसर्जना वेळार भिजयतलो. तरी थांबप ना, क्रियाशील रावपाची बुद्धी दी तूंच सगल्यांक गणपतीबाप्पा.
मोरया रे कित्याक तुजो? शिवराकान पोट भरिल्ल्यान नुस्त्याच्या कांट्या कडेन पळोवपाक? तेचवेळार कित्याक मेळटात त्यो बांगडुल्यो? त्यो वेल्ल्यो? नाका त्यो झेलांत घाल्ल्यो. बुद्धी दी गणेशा नुस्तेकारांक बंदी पाळपाक, ताजें तें गिरायकाक दिवपाक.
तूं विद्येचो देव. विद्या जेन्ना म्हारग जाता तेन्ना कोणा कडेन पळोवपाचें? तूंच सांग. तूंच दी बुद्धी सगल्यांक सवाय शिक्षणाची केंद्रां करपाक, उच्च शिक्षण घेवपाक, शिक्षणांतली पट्टी, बडी भायर उडोवपाक. विद्यार्जनाचे ते दीस परत हाडपाक.
गणपतीबाप्पा हांसतें तुजे दोळे, त्या दोळ्यांनी दवर सगल्यांचेर नदर. तेच नदरेन शिटकावणी दी, बुद्धी दी फट न मारपाची, दुसऱ्याच्या बोल्सांनी, घरांनी, कचेऱ्यांनी, लूट न करपाची.
कितलीं वर्सां गणपतीबाप्पा तुका आमी बुडयतात? मोरया म्हण्टात? खरोच तूं बुडटा? तुजो मोरया जाता? तूं तर सदांच उरतां, आमच्या काळजांत, शिरंतरांनी. बुद्धी दी सगल्यांक गजवदना, अमिता आंगणात, व्हारांदांत तुजें विसर्जन करपाक. निर्माल्यांतल्यान नवीं फुलां फुलोवपाक, मंगलमुर्तीचेर घालपाक.
गणपतीबाप्पा, तुजे पासत नेवऱ्यो, मोदक, मुगांगाठी, पायस, भजीं, फोडी, पंचामृत, पांचपाली भाजी, आळूं, पंचखाद्य, पोळे करतना, तुजो प्रसाद खातना भलायकेची जतनाय घेवपाची बुद्धी दी.
गौरीनंदना, बाजार तुजे खातीर घरा मेरेन येता आसले तरी मखरां, पाट, दिवल्यो वर्सा कणकणी घेवपाची गरज नासली तरी बाजारांत पावट मारल्यारय खोस जाता. अश्टमी मागीर तुका येवकार दिवपाक वाट आडावपीय आसतात. तांकां आडमेळीं न हाडपाची, दोंगर न बुड्डुवपाची बुद्धी दी.
लखलखपी, झगझगपी लायटी परस गणपतीबाप्पा मूर्त तुजी दिवलेच्या उजवाडांत मनाक थाकाय, उजवाड दिता. गणराया, तोच उजवाड मनां काळजांनी सदांच दवरपाची बुद्धी दी.
गणपतीबाप्पा तूं कसोय आसलो, केदोय आसलो तरी नवनिर्मणेची दिका दाखोवपी, सिद्धींतल्यान जागोवपी. ती नवनिर्मणी, सिद्धी सगल्यां मेरेन पावोवपाची बुद्धी दी.
कालचे नवनिर्मणेक आयज पाखां फुटल्यांत, मखरांय सोबीत जाल्यांत. ती सोबीतकाय हारशा वरी अस्सल आसची, नक्कल नासची हीच बुद्धी दी गणपतीबाप्पा.
मूर्त ल्हान पूण व्हडविकाय नित्याची, तीच तुजी कीर्ती. गणपतीबाप्पा सगल्यांक यशवंत, किर्तीवंत जावपा पासत, सुदारपा पासत बुद्धी तुवें दिवची.
मोरया बाप्पा तूं सगल्यांक जीण, उदक, भूंय, अन्न दिवपी. केन्ना तूं रागार जावन विघ्नां हाडटा पूण निवळाव पासतय तुजोच आधार. त्याच आधाराचेर चलपाक, व्हड जावपाक बळगें दी, बुद्धी दी.
गर्दी जाली, फोंडकुलां पडलीं, दुकळ आयले तरी तुजी गिरेस्तकाय तीच दुर्वा आनी तुळशीची, दसणी फुलांचीं. तें दायजाक, ती गिरेस्तकाय तिगोवपाची बुद्धी दी.
गणपतीबाप्पा जसो तूं विद्येचो देव तसोच मायेचो भक्त.
गौरीपुत्रा, गजवदना नांवां रे तुजीं कितलीं? 108 चीं 1008 य जातलीं, प्रांत आनी राज्यां प्रमाण. विदेशांतय तुजी भक्ती, सगल्या देशांक दी शक्ती, बुद्धी तुजे साधनेची.
हे सिद्धीविनायका तुजी आराधना करतना दीस रात पावना. गीतां आनी आरती हजार पूण तूं मात एकच, सगल्यांक सांबाळून घेवपी, आलाशिरो दिवपी, गिन्यान आनी समृद्धीची देवता. गणपतीबाप्पा, तुजे सिद्धीविणे, नांव न घेता फुडें वचपाक फाटल्यान रावतल्यांक बुद्धी दी सरळ मार्गान चलपाची. गणपतीबाप्पा केन्ना बेगीन, केन्ना उसरां भाद्रपदांतले चवथीक येतना कितलें हाडप? कितलें करप? नवो भेस, नवो रंग, नवें रुप पूण नांव तेंच गणपती, गणेश. हे गणेशा, तुजे भितर एकरूप जातना सरभोंवतण न विसरपाची, सांबाळपाची सगल्यांक शक्त, बुद्धी, गिन्यान दी.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
