हे खेपो हांव बाणावले मतदारसंघांतल्यान निमाणी वेंचणूक लढटलों:चर्चिल आलेमाव

भांगरभूंय | प्रतिनिधी

मडगाव : हे खेपो हांव बाणावले मतदारसंघांतल्यान निमाणी वेंचणूक लढटलों. लोकांनी आपल्याक तेंको दिवचो. भलायकी केंद्रा सयत बाकीचीं जीं कामां उरल्यांत तीं पुराय करतलों, अशें चर्चिल आलेमाव हांणी सांगलें. तशेंच वालांका आलेमाव ही नावेलीच्यान वेंचणूक लढटली अशेंय तांणी स्पश्ट केलें.
वार्काच्या कार्यालयांत पत्रकार परिशदेंत आदले मंत्री चर्चिल आलेमाव हांणी येवपी वेंचणूक लढटले अशें सांगलें. लोकां कडल्यान परत मागणी जाल्ल्यान आपूण हे फावट निमाणी वेंचणूक लढटलों अशें तांणी सांगलें. लोकांनी फाटबळ दिल्यार आनी वेंचून आयल्यार भलायकी केंद्राचें काम पयलीं करतलों. राजकारणांत संयम आसपाक जाय. लोक, प्रसारमाध्यमां टिका करतात तें सकारात्मक तरेन घेवपाक कळपाक जाय. अहंकार आसचो न्हय. सध्याचो आमदार व्हॉट्सअप आमदार जावन आसा. ताचे कडेन कामां जावचीं नात हें म्हाका खबर आशिल्ली. कांय जाणां समाज माध्यमावेल्या प्रचाराक भुलले आनी आपूण कांय मतांनी वेंचणूक हारलों. मात वेळ आयलो काय फुटबॉल आसूं वा राजकारण, लोकांक कितें बरें हें समजता.
राजकारणांतली दुस्मानकाय वेंचणुके पुरती आसची. मात कसलेच तरेची हिंसा खपोवन घेवचे ना. पवून घेता कामा नये. मुख्यमंत्र्यांनी खर कारवाय करची. खंयचेंय सरकार राज्यांत आयलें तरी गुंडगिरी जावपाक जायना. राज्यांतली शांतिकाय, सुवेवस्था इबाडपाक जायना. रामावेलो हल्लो हो निशेध करपा सारको आसा. मात रामाची भलायकी बरी जाले उपरांत, ताचे कडल्यान खरें कितें तें समजले उपरांत आमी ताचेर उलोवया, अशेंय तांणी सांगलें.
राजकारणांत कोणूच इश्ट नात आनी कोणूच दुस्मान ना, अशे तांणी सांगलें.
मराठीचो दुस्वास ना. कोंकणी चळवळीक लागून गोंय महाराष्ट्रांत वचूंक ना. ना जाल्यार गोंय आतां महाराष्ट्रांत आसपाचें. हाका लागून कोंकणी खातीरची चळव म्हत्वाची थारता आनी तातूंत आपलोय आसपाव आशिल्लो. हें आतांच्या खुबश्या जाणांक खबरूय ना, अशें चर्चिल आलेमाव हांणी म्हणलें.
राज्यांत सर्वधर्मीय लोकां मदीं एकवट आसा, तातूंत फूट पडपाक जायना, अशें तांणी म्हणलें.

वालांका फिफाचेर
मजगतीं वालांका आलेमाव हांची फिफाच्या वांगडी पदार निवड जाल्या. हो गोंयच्या फुटबॉला खातीर व्हड खीण आसा. हातूंतल्यान फुटबॉल खेळाक आनीक उर्बा मेळटली अशेंय तांणी मुखार सांगलें.