भांगरभूंय | प्रतिनिधी
गोवा मीट कॉम्प्लेक्साचे कर्मचारी उच्च न्यायालयांत
पणजी ः गोवा मीट कॉम्प्लेक्साच्या 29 कर्मचाऱ्यांकूय हेर सरकारी कर्मचाऱ्यां प्रमाण 7वो वेतन आयोग लागू करुन सुदारीत वेतनमान दिवचे हे खातीर दाखल केल्ले याचिकेचेर गोंयच्या मुंबय उच्च न्यायालयान राज्य सरकाराक नोटीस जारी केल्या. न्यायाधीश भारती डांगरे आनी निवेदिता मेहता हांच्या खंडपिठा मुखार ही याचिका दाखल केल्या.
गोवा मीट कॉम्प्लेक्सच्या 179व्या संचालक मंडळान 14 डिसेंबर 2021 दिसा जाल्ले बसकेंत 7वो वेतन आयोग चालीक लावपाचो थाराव संमत जाल्लो. पूण तो अजून चालीक लावंक ना अशें याचिकादारांनी सांगलें. देखून हेर सरकारी कर्मचाऱ्यां प्रमाण 1 जानेवारी 2016 सावन सुदारीत वेतनमानाचो लाव आमकां मेळचो अशी मागणी कर्मचाऱ्यांनी केल्या. ॲड. दत्तप्रसाद लवंदे हांणी वयले मुद्दे याचिकादारांच्या वटेन मांडले. ॲड. प्रदोश डांगी आनी ॲड. अक्षया जोगळेकार हांणी तांकां तेंको दिलो.
याचिकेचेर सुनावणी करतना न्यायालयान गोंय सरकाराचे मुखेल सचीव आनी हेर तीन प्रतिवादींक नोटीस जारी केल्यो. तशेंच गोवा मीट कॉम्प्लेक्साक 3 सप्टेंबर 2025 दिसा आपलें म्हणणें सादर करपाचो आदेश दिला. ह्या प्रकरणाचेर फुडली सुनावणी 3 सप्टेंबर 2025 दिसा जातली अशें न्यायालयान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
