भांगरभूंय | प्रतिनिधी
चोडण-रायबंदर न्हंय मार्गार दोन रो-रो फेरीचें लोकार्पण
पणजीः सरकार आठ न्हंयांच्या मार्गार रो रो फेरी घालपाचो विचार करता आनी हे खातीर लोकांचें सहकार्य गरजेचें. जर हे फेरी सेवे खातीर लोक फक्त २५ टक्के शुल्क भरपाक हयकार दितात जाल्यार सरकार ह्यो रो-रो फेरी घालपाक तयार आसा. सरकार फकत भौशीक येरादारी आनी पर्यटना खातीर जेटी बांदता देखून आंदोलकांनी गैरसमज करुन घेवचो न्हय, अशें मुख्यमंत्री डॉ. प्रमोद सावंत हांणी सांगलें.
चोडणा फेरी धक्यार डाॅ. सावंत हांचे हस्तुकीं व्दारका आनी गंगोत्री ह्या दोन फेरी बोटींचें लोकार्पण जालें. ह्या वेळार ते उलयताले. केंद्रीय राज्य मंत्री श्रीपाद नायक, राज्यसभा खासदार सदानंद शेट तानावडे, न्हंय येरादारी मंत्री सुभाष फळदेसाय, मयेंचे आमदार प्रेमेन्द्र शेट आनी हेर मानेस्त हजर आशिल्ले.
उक्तावणा उपरांत रोखड्योच ह्यो दोनूय रो रो फेरी चोडण-रायबंदर प्रवाश्यांचे सेवेंत रूजू जाल्यो. हे एके बोटींत १५ मोटारी, ४० स्कुटरी आनी १०० प्रवाशी एका वांगडा घेवन वचपाची तांक आसा. ही फेरी रायबंदर ते चोडण हें अंतर सात ते आठ मिण्टां भितर पुराय करतले. देखून फेरी बोटीची वाट पळोवपाचें आनी तातूंत प्रवास करपाचो वेळ १२ मिण्टां परस चड आसचो ना.
सरकार प्रवश्यांक बरी सुविधा दिवपाक सोदता. देखून लोकांनी ५ रुपयांच्या शुल्कांक लागून विरोध करचो न्हय, असो उलो मुख्यमंत्र्यान ह्या वेळार मारलो.
न्हंय मार्ग हें भौशीक येरादारीचे साधन जावचें अशें दुरदृष्टी प्रधानमंत्री नरेंद्र मोदी हांणी दवरला. देखून जेन्ना आमी जेटी दुरूस्त करपाचें हातांत घेतलें, तें फकत भौशीक येरादारी खातीर आनी कसल्याच कारणाक लागून न्हय. जे लोक दुसरें कितें तकलेन घेवन विरोध करपाक लागल्यात तांणी हें लक्षात दवरचें, फकत थळावे आनी पर्यटनां खातीर ह्यो जेटी वापरतले, अशें स्पश्टीकरण मुख्यमंत्र्यान दिलें.
ही पुराय दोन फेरी पीपीपी तत्वाचेर बांदल्यात. विजय मरीन सर्विसेस हांणी ह्यो दोनूय रो रो २५ कोटी खर्चून बांदल्यात. विजय मरिन सर्विस हे रो रो चलयतले आनी सरकार तांकां भाडें म्हण ४० लाख दितले. ही फेरी गोंयांत गोंयचे शिपयार्डांत आनी गोंयचे इंजिनयरांनी बांदला. देखून ही फेरी पुराय मेक इन गोवा आसा. भायलीं राज्यां जेन्ना हे रो रो बोटीची देख घेतले तेन्ना ते गोंयातल्यो रो रो फेरी विकत्यो घेतले तेन्ना मेक इन गोवा हे पुराय देशभर पावतले, अशी आस्त मुख्यमंत्र्यान उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
