भांगरभूंय | प्रतिनिधी
विजय भिकेः कायदो सुवेवस्था कोसळिल्ल्याचें म्हणणें
भांगरभूंय । प्रतिनिधी
म्हापशें: अॅड. गजानन सावंत हांचे संबंदांत पर्वरे घडिल्ली घडणूक निशेध करपा सारकीच आसा. तशेंच राज्यांत घडपी हेर घडणुकांचेर लेगीत वकील संघटणांनी अशेच तरेन रस्त्याचेर येवन आवाड काडपाक जाय, अशें मत काँग्रेस फुडारी विजय भिके हांणी उक्तायलें.
म्हापश्यां पक्ष कार्यालयांत घेतिल्ले पत्रकार परिशदेंत भिके उलयताले. ह्या वेळार उत्तर गोंय जिल्हो अध्यक्ष विरेंद्र शिरोडकार आनी पणजीचे नगरसेवक जोवा आंद्रेव हाजीर आशिल्ले.
भाजपाशासीत आमच्या राज्यांत कायदो सुवेस्था पुराय कोसळ्ळ्या. कायद्याची राखण करपीच सध्या कायद्याचे भक्षक जाल्यात. अन्याया आड लडपी वकिलाक पुलिसां कडल्यान मारपेट जावप, हे सारकी दुसरी लजेची गजाल ना, अशें भिके हांणी सांगलें.
अॅड. सावंत हाका जाल्ल्या मारपेट प्रकरणाची कागाळ नोंद करून घेवपाक पुलिसां कडल्यान हयगय तशेंच वेळकाडूपणा जाता. ताका लागून सर्वसामान्यांचे स्थितीचो अदमास काडूं येता. भाजपा सरकारान सगळ्यांक समान न्याय दिवपाची गरज आसा. हम करे सो कायदा, हे भावनेन भाजपा सरकाराची राजवट सुरू आसा, अशी टिका भिके हांणी केली.
जोवा आंद्रेव हांणी सांगलें, एकाद्या पुलिसान कायदो हातांत घेवन मारपेट केलो जाल्यार ताका रोखड्या रोखडो बडतर्फ करपाक जाय. अॅड. सावंत हांच्या प्रकरणांतल्यान गोंय पुलिसांची दादागिरू दिसता. गृहमंत्र्यान कायदो आनी सुवेवस्था जाग्यार घालपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
