भांगरभूंय | प्रतिनिधी
नवी दिल्ली, खबरां संस्था ः हेपेटायटीस (Hepatitis) हें दुयेंस यकृताचेर वायट परिणाम करता. ताचे ए, बी, सी, डी आनी ई अशे पांच प्रकार आसात. हालीं संवसारीक भलायकी संघटने कडेन (WHO) संबंदीत आशिल्ल्या इंटरनॅशनल एजन्सी फॉर रिसर्च ऑन कॅन्सरान (IARC) हेपेटायटीस डी कर्करोगजन्य म्हूण जाहीर केलां. हाचे आदीं डब्ल्यूएचओन हेपेटायटीस बी आनी सी हांकां कर्करोगजन्य म्हूण जाहीर केल्लें.
जर्नल ऑफ हेपॅटोलॉजींत 2020 वर्सा उजवाडाक आयिल्ल्या एका अभ्यासांत संवसारभर क्रॉनिक हेपेटायटीस बी व्हायरस (HBV) संसर्ग जाल्ल्या सुमार 5% लोकांकय हेपेटायटीस डी व्हायरसाचो (HDV) संसर्ग जाला आसूं येता.
ह्या अभ्यासा प्रमाण एचबीव्ही आशिल्ल्या लोकांक यकृत दुयेंस आनी यकृताचो कॅन्सर जावपाच्या सुमार 5 मदले १ प्रकरण एचडीव्हीच्या सह-संसर्गा कडेन संबंदीत आसूं येता.
डब्ल्यूएचओच्या मतान, संवसारभर दर 30 सेकंदानी एकल्याक हेपेटायटीस कडेन संबंदीत यकृताच्या दुयेंसाक लागून वा यकृताच्या कॅन्सराक लागून मरण येता. ही आंकडेवारी खूब भिरांकूळ आसा. पूण वेळार चांचणी, लस आनी जतनाय घेतल्यार हो धोको चड करून टाळूंक मेळटा.
ह्या कराणांक लागून हेपेटायटीस डी जाव येता…
० हाचे आदीं हेपेटायटीस बी जाल्लो आसल्यार हेपेटायटीस डी जावपाचो धोको आसता.
० संसर्ग जाल्ल्या रगताच्या वा कुडीच्या द्रवाच्या संपर्कांतल्यान.
० असुरक्षित संभोगा वरवीं.
० इंजेक्शना वरवीं वखदां घेतल्यार.
० संसर्गजन्य सुयेन टॅटू काडल्यार.
० बाळंतपणाच्या वेळार आवय कडल्यान भुरग्याक जाव येता.
हेपेटायटीस डी ची सामान्य लक्षणां…
० जोर.
० पोटात दुखप, फाटीच्या वयल्या भागांत दुखप.
० जळजळ आनी ओंकारी.
० कावीळ.
० भुक लागप ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
