भांगरभूंय | प्रतिनिधी
केरळांत हेपेटायटीस ए दुयेंतींनी वाड, 12 जाणांक मरण
खबरां संस्था ः संवसारीक भलायकी संघटनेन जाहीर केल्ल्या अहवालांत दर दिसा 3500 लोकांक हेपिटायटिस जावन मरण येता अशें दिसून आयलां. आतां केरळांत हेपिटायटिस ए दुयेंतींची संख्या नेटान वाडत आसा. पयल्या साडेचार म्हयन्यांत राज्यांत हेपिटायटीस एचे 1,977 दुयेंती मेळ्ळ्यात आनी 12 जाणांक मरण आयलां. देखून केरळ राज्याची भलायकी मंत्री वीना जॉर्ज हांणी बुधवारा (16 मे) कोझीकोड, मलप्पुरम, त्रिशूर आनी एर्नाकुलम ह्या चार जिल्ह्यां खातीर अलर्ट जारी केला. ह्या व्हायरसाची लागण मुखेलपणान दूशित अन्न आनी उदक वा संसर्ग जाल्ल्या मनशाच्या संपर्कांत आयल्ल्यान जाता.
हेपिटायटिस ए कसो पातळटा?
अमेरिकेच्या सेंटर फॉर डिसीज कंट्रोल अँड प्रिव्हेन्शन (CDC) ह्या संस्थेच्या मतान हेपिटायटिस ए हो एक खूब संसर्गजन्य दुयेंस. हेपिटायटिस ए व्हायरस कितलेशेच म्हयने जियेवंक शकता. तुमच्या यकृताचेर ह्या व्हायरसाचो खूब परिणाम जाता. ह्या व्हायरसाची लागण जाल्ल्या मनशाचें यकृत सुजता, जाचो अर्थ ताका हेपिटायटिस आसा. कांय खर प्रकरणांनी व्हायरसाच्या संसर्गाक लागून यकृताच्या पेशींचेंय लुकसाण जावं येता. हाका लागून प्रत्यारोपणाची गरज निर्माण जाता. वायट स्थितींत मरण लेगीत येवंक शकता. हेपिटायटिस ए हो सादारणपणान अशा वाठारांनी पातळटा, जंय नितळसाण ना आनी अन्न आनी उदक दूशित आसा. संवसारीक भलायकी संघटनेच्या म्हणण्या प्रमाण हेपिटायटिस ए हो दूशित घाणयारें उदका पुरवणांतल्यान जावंक शकता. हेपिटायटिस ए केन्ना केन्ना परतूनय जाता म्हळ्यार कांय प्रकरणांनी हालींच बरो जाल्लो मनीस हो व्हायरस जावन परतून दुयेंत पडटा.
हेपिटायटिस ए संसर्गाचीं लक्षणां…
० पोटांत दुखप, खास करून उजवे वटेन
० भूक लागप ना
० मळमळ आनी उलटी जावप
० अतिसार
० दुबळेपण आनी थकवा येवप
० जोर
० कावीळ (कात, नाखटा आनी दोळे हळडुवे जावप)
० सांधेदुखप
० कातीक खाज येवप
स्वताची राखण करपा खातीर….
० जेवचे पयलीं वा पियेवचे पयलीं आनी शौचालय वापरल्या उपरांत शाबू आनी कोमट उदकान हात धुवचे.
० उदक गरम करुन पियेवचें.
० रेस्टॉरन्टांतल्या पेयां मदीं बर्फाचे कुडके वापरप टाळचें. कारण बर्फ तयार करपाकय उदकाचो उपेग करतात.
० अस्वच्छ सुवातींनी आशिल्ली कच्चीं फळां आनी भाजीपालो खावप टाळचें.
० तुमची भोंवतणची सुवात निवळ दवरची आनी कोयर आनी घाणयारें उदकाचो सारको विलो लावचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
