भांगरभूंय | प्रतिनिधी
हालिंसाराक, जर एखाद्र्या खेळगड्यान भारतीय पंगडाक आनी भारतीय क्रिकेट मोग्यांक सगल्यांत चड कोणे त्रास दिसा आसत जाल्यार तो ट्रॅव्हिस हेड आसा. अॅडिलेडांत चालू आशिल्ले दीस-रात टॅस्टीच्या दुसऱ्या दिसा ताणें शेंकडो मारून मॅच भारताच्या हातांतल्यान काडून व्हेली. उरिल्लें काम दिसाच्या अखेरच्या सत्रांतऑस्ट्रेलियेच्या फास्ट बॉलरांनी केलें आनी भारताक हारीच्या हुमऱ्यार हाडून दवरलो. दुसऱ्या दिसाचो खेळ सोंप मेरेन भारतान आपल्या दुसऱ्या डावांत फकत 128 धांवड्यांचेर 5 विकेटी व्हगडायल्यात. ऑस्ट्रेलिये परस तो अजून 29 धांवड्यांनी फाटीं आसा.
दिसाची सुरवात जाली त्या वेळार भारताक पयल्या वराच्या खेळाचो बरे तरेन फायदो करून घेवपाक जाय आशिल्लो. मोहम्मद सिराज सातत्यान बरी बॉलींग करतालो. हाचो फायदो दुसरे वटेच्यान जसप्रीत बुमराक मेळटालो. ताणें उत्कृश्ट बॉलाचेर नॅथन मॅकस्विनीक बाद केलो. विकेटकीपर ऋषभ पंतान ताची कॅच धरली. कांय वेळांत स्टीव स्मिथ परतून बुमराच्या जाळांत सांपडलो आनी सवाय भितर बाद जालो.
दुसरे वटेन ऑस्ट्रेलिये खातीर ऑस्ट्रेलियेंत पिंक बॉल टॅस्टींत सगल्यांत चड धांवड्यो करपी बॅट्समन मार्नस लाबशेनान पुर्णपणान खेळपट्टीचेर जम बसयिल्लो. ताणें भारताच्या बॉलरांक विकेट घेवपाची कसलीच संद दिली ना. मुखेली रोहीत शर्मान आपल्या बॉलरांक ताजे दवरपाक तांकां ल्हान ल्हान स्पेल दिले. हे मजगतीं, ताणें नितीश कुमार रेड्डीक बॉल दिलो आनी ताणें लाबशेनाक बाद केलो. पूण, ते मेरेन लाबशेनान (64) आपलो अर्द शेंकडो पुर्ण केल्लो.
पूण, दिसाचो खेळ ट्रॅव्हिस हेडान आपल्या नांवार केलो. बॉल पोरणो जाल्लो आनी हेड हे संदीचो पुर्णपणान फायदो घेवपाक सोदतालो. तो शेंकड्याच्या लागसार आशिल्लो, तरी आसतना ताणें सेगीत चवके मारले. नवो बॉल घेवचे पयलीं पोरण्या बॉलाचेर शक्य तितक्यो धांवड्यो करपाची ताची मोख आशिल्ली.
टॅस्ट कारकिर्दींतलो ताणें आठवो आनी भारता आडचो दुसरो शेंकडो पुर्ण केलो. ते उपरांत लेगीत तो थांबपाचो नांव घेनाशिल्लो. नव्या बॉलाचेर लेगीत तो आक्रमक बॅटींग करतालो. बाद जावचे आदल्या बॉलाचेर ताणें सिराजाक डीप मिडविकेट वाठारांत सको मारलो. पूण, फुडल्या बॉलाचेर सिराजाच्या यॉर्कर लॅंथाचेर तो फसलो.
च्या च्या विसवा उपरांत ऑस्ट्रेलियेचो पयलो डाव 337 धांवड्यांचेर सोंपलो. भारता वतीन बुमरा आनी सिराज हाणें दरेकी 4 विकेटी घेतल्यो.
आतां दिसाचो तो वेळ आशिल्लो जंय ऑस्ट्रेलिया पंगडान भारताक चडांतचड बॅटींग करपाक दिवपाची रणनिती आंखिल्ली. भारताच्या डावांत 24 ओव्हरी जाल्यो. लोकेश राहुल आनी यशस्वी जयस्वाल हाणें बरी सुरवात केली. दोगांयनी बाबत बॉलाचेर धांवड्यो केल्यो. पूण, मुखेली पॅट कमिन्सान राहुलाचो संयम मोडून ताका विकेटी फाटल्यान कॅच बाद केलो. जयस्वाल फॉर्मांत दिसतालो. पूण, तो डिफॅन्सा सयत आक्रमक शॉर्ट लेगीत मारतालो. दुसरे वटेन शुभमन गिलान लेगीत खेळपट्टीचेर जम बसयिल्लो. हे मजगतीं, पयलो बदल म्हणून स्कॉट बोलॅण्डाक हाडलो. ताणें आपल्या पयल्याच बॉलाचेर जयस्वालाक बाद केलो.
ऑफ स्टम्पा भायले बॉल आपूण सोडटलो हो मनांत विचार करून विराट कोहली मैदानांत देंविल्लो. तो तशें करपाक येसस्वी लेगीत जातालो. पूण, बोलॅण्डान ऑफ स्टम्पाच्या लागसार बॉल घालून कोहलीक खेळपाक लायलो. ताची ही रणनिती येसस्वी थारली. बॉल बॅटाचे धारेक लागून विकेटकीपराच्या हातांत गेलो. कांय वेळान मिचेल स्टार्कान एक उत्कृश्ट फुलर बॉलाचेर गिलाक बोल्ड केलो.
ऋषभ पंतान पयल्याच बॉलाचेर चवको मारून आपूण खंयच्या मुडांत बॅटिंगेक आयला हें दाखोवन दिलें. खेळाच्या निमाण्या खिणांत रोहीत शर्मा बाद जावन लेगीत पंत आनी नितीश कुमार रेड्डी वेगळ्याच मुडांत आशिल्ले.
मॅचींतलें आव्हान कायम राखपाक जाय जायल्यार आक्रमक बॅटींग करप सामकी गरजेची आसा हें दोगांकूय खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
