भांगरभूंय | प्रतिनिधी
गोवा कोंकणी अकादेमी वर्सांन वर्स नाटक महोत्सव घडोवन हाडटा. अंदू 30 वो नाटक महोत्सव मुरगांवच्या श्री छत्रपती शिवाजी महाराज व्यासपीठ, हेडलॅण्ड, सड्यार तो आयोजीत केल्लो. अकादेमीन ओंकार संगीत संस्था, इस्वटी ब्राह्मण लक्ष्मीनारायण देवस्थान आनी मुरगांव भौशीक नवरात्र सांस्कृतीक मंडळ न्यू वाडो, वास्को हांच्या जोडपालवान मुरगांवकारांक पांच नाटकांची मेजवानी दिवन तांचीं मनां जिखलीं. मुरगांवकारां वतीन नाटक महोत्सव घडोवन हाडपी आयोजकांक, नाटक उबें करपी नाट्य संस्थांक, कलाकारांक, नाट्य लेखकांक, कार्यकर्त्यांक तशेंच रसीक मोग्यांक धन्यवाद आनी खूब खूब परबीं.
अंदू अकादेमीन वेचून काडिल्ली पांचूय नाटकां पळोवपा सारकीं तर आशिल्लींच तेच परी कांय नाटकां साहित्यीक मुल्यां घेवनय मंचार आयिल्लीं. तीं पळोवन मनाक वेगळीच खुशालकाय मेळ्ळी म्हणूं येत. कारण नाटक म्हणटा तें रस निरुपण करचे खातीर आसता आनी तें जर प्रेक्षकांक मेळटा आसत तर तें नाटक उत्तम थारता. ह्या महोत्सवांतलें एकान एक नाटक तीं आवश्यक मुल्यां घेवनूच माचयेर सादर जाल्लीं पळोवंक मेळ्ळीं. म्हज्या मतान लेखकान ही साहित्यीक मुल्यां नाटकांत जाणून बुजून घालूंक नात ती कथानकांत आपसूक आयल्यांत. समाजाक एक नवी दिका दाखोवंक अशा नाटकांचो आदार मेळटाच मेळटा.
17 ते 21 फेब्रुवारी मेरेन सद्दां सांजवेळा 7.30 वरांचेर नाटक सुरू जातालें. सुरवातीक प्रेक्षकांची संख्या उणी दिसताली, पूण नाटक सुरू जायना बराबर माटोव भरूंक लागतालो आनी नाटक सोंप मेरेन रसीकमोगी कलाकारांच्या कलागुणांक मना सावन दाद दिताले. हाचे वेल्यान नाटकांचो दर्जो कितलो उंच आशिल्लो हाचो कोणेय अदमास लावं येता. पयले दिसा कला आविष्कार, मासोड्डें हांणी सादर केल्लें ‘होमखण’ हें नामनेचे लेखक डॉ. प्रकाश वजरीकार हांणी बरयिल्ल्या आनी विनय गांवस हांणी दिग्दर्शीत केल्ल्या नाटकाचें सादरीकरण जालें. नाटकाची सुरवात जबरदस्त जाली. काळजाक भिडपी संवादांनी प्रेक्षकांची मनां जिखलीं. कथानकाची पुराय मांडणी सुंदर आनी वेवस्थीत थिकाक थीक बशिल्ले वरी आशिल्ली. देखून ‘होमखणा’चो पुराय पंगड तोखणायेक पात्र थारता. ह्या सादरीकरणान नाटकाच्यो आदल्यो सगल्यो त्रुटी पुसून काडल्यो
म्हणूं येता.
दुसरे दीस, 18 फेब्रुवारी सुशांत नायक हांणी बरयिल्लें आनी स्वता दिग्दर्शीत केल्ल्या ‘फ्रेंड रिक्वेस्ट’ ह्या नाटकाचें सादरीकरण जालें. तें वळवयच्या कला चेतनान सादर केलें. मुळ अमेरिकन कादंबरीकार ग्गेग आयल्स हांच्या 24 अवर्स (24 hours) हे कादंबरीचो आदार घेवन बरयिल्लें हें नाटक प्रेक्षकांची वा, वा मेळोवंक पावलें. हाचे स्त्रय लेखक आनी दिग्दर्शक सुशांत नायक हांका तर वताच. त्या भायर तांचे कलाकार आनीक हेर वांगड्यांक लेगीत तें दिवचें पडटले. पुराय नाटकाचें कथानक एका हृदयरोग तज्ञाच्या जिणें भोंवतणीं घुंवता. मनीस जेन्ना सुवार्था खातीर ज्या समाजांत वावुरता, ताचो विचार करिना तेन्ना एका मनशाचे जिणेंत कितलें खर वादळ येवं येता हाचें हें ‘फ्रेंड रिक्वेस्ट’ नाटक एक उदारण थारूं येता.
नाटक महोत्सवाच्या तिसर्या दिसा19 फेब्रुवारीक सादर जाल्लें म्हालगडे लेखक दत्ताराम कामत बांबोळकार हांणी डॉ. विवेक बेळे हांच्या मूळ मराठी नाटका वयल्यान केल्लें कोंकणी अनुसर्जन ‘बापूगांधी’ हें नाटक महोत्सवांतलें आकर्शक थारलें. अंत्रुज घुडयो नागेशी, फोंडें हे संस्थेन तें सादर केलें. दिग्दर्शक रघुनाथ साकोर्डेकार, कलानंद कामत बांबोळकार हांच्या प्रामाणीक यत्नाक लागून प्रेक्षकांक एक सुंदर तशेंच दर्जेदार सादरीकरण पळोवंक मेळ्ळें. नाटकाचें कथानक पिळगे पिळगे पासून चलत आयिल्ल्या जनरेशन गॅपाचेर आशिल्लें. हो तसो समाजीक विशय घराघरांत दिसून येवपी. सहसा तो कोण घराभायर घालूंक सोदिनात, असो पूण लेखकान आकर्शक संवादान आनी जतनायेन हो विशय मांडपाचो खूब बरो यत्न केला.
‘मरण थाव’ हें महोत्सवातलें चवथें नाटक. लेखक वैभव कवळेकार हांणी मराठी लेखक सुभाष शिरवळकर हांचे कादंबरीचेर आदारून बरयल्लें. रौनक गुरव हांणी दिग्दर्शीत केल्लें. श्रीदामबाब नाट्यारस प्राॅडक्शन, जांबावली हांणी सादरीकरण केल्लें. मनीस जेन्ना शरीरसुखा फाटल्यान धांवता तेन्ना ताका कसलेंच भान उरना. खास करून संवसारी मनीस अशा खिणयाळ्या सुखाच्या जाळ्यांत गुरफटत वता तेन्ना ताचे जिणेचेर कसो परिणाम जावं येता हें बर्यापैकी मांडिल्लें नाटक ‘मरणथाव.’
महोत्सवांतलें निमणें नाटक 21 फेब्रुवारी दिसा जाल्ले ‘हिडोनिस्ट’ सुपर हीट थारलें. नाटकाचे मुळ मराठी लेखक प्रशांत दळवी. हें नाटक सारंग अग्रासनी हांणी अणकारीत केलां. नितीन नाईक हांणी दिग्दर्शीत केलां आनी नटरंग क्रियेशन्स नार्वें, दिवचल हांणी ह्या नाटकाचें सादरीकरण केलें.
मनशाच्यो इत्सा जेन्ना वाडत वता तेन्ना त्यो पुराय करपा खातीर मनीस आपलीं तत्वा सोडून वागूंक लागता. अशा वेळार जें मानसीक संघर्श करचे पडटात, ताचें सोबीत चित्रण हें नाटक करता. दोन कलाकार सुरवातीक रसीक प्रेक्षकांक खिळावन दवरतले अशें दिसूंक नाशिल्लें, पूण जसजशे नाटक मुखार वचत रावलें, प्रेक्षकांचो अदमास सामको चुकलो. मिलिंद बर्वे आनी चैती कडकडे हांणी आपले आगळे वेगळे कलेन रंगमंच रंगून उडयलो. घोड्याचें प्रतीक घेवन दाखयिल्ल्या निमण्या दृश्यान प्रेक्षकांक मंत्रमुग्ध करून सोडले. नाटक सोंपलें हें मतींत येतकच जो टाळ्यांचो कडकडाट जालो तो सुमारा भायलो आशिल्लो.
निमणें आयतार 22 फेब्रुवारी नाटक महोत्सवांत सादर जाल्ल्या नाटकांचेर चर्चासत्र घडोवन हाडिल्लें. ह्या चर्चासत्राचे अध्यक्ष आशिल्ले श्रीधर कामत बांबोळकार आनी भाग घेवपी कोंकणी नाटक महोत्सवाचे निरिक्षक वसंत सैल, मनोज हळर्णेकार आनी मिलिंद काकोडकार. हें चर्चासत्र लेगीत खेळीमेळीच्या वातावरणांत बरेंच रंगलें. जातूंत लेखक, दिग्दर्शक, कलाकार तशेच नाट्य रसीक उमेदीन वांटेकार जाल्ले पळोवंक मेळ्ळे.
एच मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
