भांगरभूंय | प्रतिनिधी
संवसारीक भलायकी संघटनेचो अहवाल
नवी दिल्ली, खबरां संस्था ः जायत्या जाणांक हेडफोन्स वापरपाची सवय आसा. हांलीसराक ती एक फॅशनूच जाल्या. हे विशीं संवसारीक भलायकी संघटनेन एक धक्को दिवपी अहवाल उजवाडायला. 2050 मेरेन संवसारांतले सुमार 100 कोटी लोक भेड्डे जातले आनी तांची पिराय 12 ते 35 वर्सां मदीं आसतली अशें संवसारीक भलायकी संघटनेन एका अहवालांत सांगलां.
हेडफोन वापरतात तेन्ना ताचे दुश्परिणाम कितें जाव शकता हाचो आमी विचार करिनात. संवसारीक भलायकी संघटनेच्या अहवाला प्रमाण हेडफोन, इयरफोन आनी इयरबड्स हांचो आमचे भलायकेचेर व्हड परिणाम जावपाक लागला. संवसारीक भलायकी संघटनेच्या अहवाला प्रमाण 2050 मेरेन संवसारांतले सुमार 100 कोटी लोक भेड्डे जातले आनी तांची पिराय 12 ते 35 वर्सां मदीं आसतली. हेडफोन-इयरफोनाक लागून दर चार जाणां मदलो एकलो भेड्डो जातलो अशें अहवालांत म्हणलां.
संवसारीक भलायकी संघटनेच्या मार्गदर्शक तत्वां प्रमाण सध्या 12 ते 35 वर्सां पिराये मदले सुमार 50 कोटी लोक वेगवेगळ्या कारणांक लागून भेड्डे जाल्यात. हातूंतले 25% लोक सतत इयरफोन, इयरबड वा हेडफोनाचेर व्हड आवाजात कितें ना कितें आयकतात. जाल्यार 50% लोक संगीत, क्लब, डिस्कोथेक, सिनेमा, फिटनेस क्लास, बार वा हेर खंयच्याय व्हडल्या आवाजाक लागून भेड्डे जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
