भांगरभूंय | प्रतिनिधी
नवी दिल्ली, खबरां संस्था: हेडग्या सुण्यां संबंदी सर्वोच्च न्यायालयान म्हत्वाचो निर्णय दिवन तांचें निर्जंतुकीकरण आनी लस दिवप सक्तीचें केलां. अशा सुण्यांक उपचार आनी निर्जंतुकीकरणा उपरांत परतून तांच्या वाठारांत सोडटले अशें न्यायालयान स्पश्ट केलें. मात रेबीज आशिल्ल्या सुण्यांक सोडचे नात. सर्वोच्च न्यायालयान दिल्लो हो आदेश दिल्ली-एनसीआर मेरेन मर्यादीत उरचो ना, जाल्यार पुराय देशाक लागू जातलो. हाका लागून आतां सगल्या राज्य सरकारांक आनी थळाव्या संस्थांक हे बाबतींत पावलां उबारचीं पडटलीं.
भौशीक सुवातेर खावपाचेर बंदी
भौशीक सुवातेर हेडग्या सुण्यांक जेवण दिवपाचेर न्यायालयान बंदी घाल्या. आतां तांकां फकत थारायिल्ले सुवातेर खावपाक मेळटलें. हो नेम खरपणान पाळपाचो निर्देश न्यायालयान दिला. ११ ऑगस्टाक दिल्ल्या पोरण्या आदेशांत दुरुस्ती करून दोन न्यायाधीशांच्या खंडपिठान नवो अंतरीम आदेश संमत केला, न्यायालयान ह्या प्रकरणांत सगळ्या राज्यांक पक्ष केल्यात आनी आतां दरेका राज्याक हो आदेश आपल्या अधिकारक्षेत्रांत चालीक लावचो पडटलो.
सुरक्षेचेर भर दिवची
हो निर्णय फकत जनावरांच्या कल्याणा खातीर न्हय तर भौशीक भलायकी आनी सुरक्षे खातीर आसा अशें न्यायालयान सांगलें. कारण रेबीज सारकिले धोक्याचें दुयेंस पातळप बंद करून लोकांक सुरक्षीत वातावरण दिवप ही सरकाराची जापसालदारकी अशें न्यायालयान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
