भांगरभूंय | प्रतिनिधी
ताळगांव ग्रामसभेंंत हेडग्या सुणीं, गोरवांचेर चर्चा
पणजी : ताळगांवचे ग्रामसबेंत हेडग्या सुणी आनी गोरवांच्या उपद्रवाचेर बरोच वेळ चर्चा जाली. सुण्यांच्या एनजीओच्या सहकार्यान निर्बीजीकरण करपा सयत तांकां खावपाक घालपी लोकांकडेन चर्चा करपाचो निर्णय पंचायतीन घेतला. सांताक्रुज तशेंच हेर लागसारचीं हेडगीं गोरवांं ताळगांव वाठारांत येतात. हाका लागून हेडग्या गोरवांचो आंकडो वाडटा, अशें सरपंच मारिया फर्नांडीस हांणी सांगलेंं.
आयज आयतारा ताळगांवची ग्रामसभा शांतिकायेन जाली. सुणीं आनी हेडग्या गोरवांक लागून सगळ्या लोकांक त्रास जातात, अशी कागाळ ग्रामस्थांनी केली. सुण्यांचो प्रस्न सोडोवपाक पंचायतीक अपेस आयलां, असो आरोप जालो. सुण्यांचो आंकडो उणो करपा खातीर पॉज ह्या एनजीओच्या सहकार्यान निर्बीजीकरणाची प्रक्रीया सुरू जाल्या. ताळगांवचे बरेच लोक रातच्या वेळार रस्ताद सुण्यांक जेवण दितात. हाका लागून रस्ताद सुणीं एकठांय येतात. जेवण कोण घालतात, तांचो सोद घेवन तांचे लागी चर्चा करतले, अशें सरपंच मारिया फर्नांडीस हांणी सांगलें. उरता तें जेवण घरा भायर दिवचें, भौशीक सुवातेर येवन जेवण घालचें न्हय, अशी मागणी लोकांक करतले.
हेडग्या गोरवांक लागून अपघात जातात. गोरवां मरतात. हीं गोरवां व्हरपाक कोणूच येना. कांय दिसां पयलीं गोरवांची कत्तल जाल्ली. गोरवांची कत्तल जावप हो गुन्यांव आसा. हे विशीं लेगीत पंचायतीकडेन कोणेंच कागाळ करूंक ना. सुणीं आनी गोरवांचो प्रस्न सुटावो करपा खातीर ग्रामस्थांचें सहकार्य जाय, अशें सरपंच मारिया फर्नांडीस हांणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
