भांगरभूंय | प्रतिनिधी
मुख्यमंत्री : पंचायतींक गोशाळे कडेन कबलात करपाची सुचोवणी
भांगरभूंय । प्रतिनिधी
पणजी : रस्ताद गोरवां व्हरपा खातीर जेन्ना गोशाळेचे वावुरपी येतात, तेन्ना तांचे धनी तांचे कडेन वाद घालतात. हे खातीर हो विशय सोडवपा खातीर पंचायतींनी गोशाळे वांगडा कबलात करची आनी हे खातीर आमदारांनी फुढाकार घेवचो. फुडल्या तीन चार म्हयन्यांनी हो विशय जाग्यार घालतले, अशें मुख्यमंत्री डॉ. प्रमोद सावंत हांणी सांगलें.
वेळ्ळीचे आमदार क्रुझ सिल्वा हांणी हेडग्यां गोरवांचो विशय शुन्य वरा वेळार काडिल्लो. कितेलेशेच खेपे हो विशय विधानसभेंत काडीत आसा, पूण कोणूच हो विशय गंभीरपणान घेनात. ह्या गोरवांक लागून रातीं वेळार कितलेशेच अपघात जातात. ही जापसालदारकी कोणे घेवपाची, असो प्रस्न सिल्वा हांणी केलो.
ह्या प्रस्नाची जाप दितना मुख्यमंत्री डॉ. प्रमोद सावंत हांणी सांगलें, सरकारा कडेन 6 सुवातांचेर हेडग्यां गोरवां खातीर गोशाळा आसात. पंचायतीं वांगडाच आमदारांनी ह्या गोशाळां कडेन कबलात करची. जर गाडी घेवन ते गोरवां धरपाक गेल्यार लोक तांकां बडयतात. तेच लोक आपलीं गोरवां पयलीं रस्त्यार सोडटात आनी तीं धरपाक गेल्यार गोशाळेच्या वावुरप्यां कडेन वाद घालतात. आमी गोशाळेच्या वावुरप्यांक तेंको दिवपाची गरज आसा, अशें मुख्यमंत्र्यान सांगलें. गोरवांक लागून अपघात जावचे न्हय, हे खातीर फुडल्या दोन- तीन म्हयनां भितर दक्षीण गोंयांत व्हड प्रमाणांत गोरवां एकी कडेन व्हरून दवरपाची वेवस्था करतले. आमदारांनी आपल्या पंचायतीक कबलात करपाक सुरवातक करपाक सांगची, जाका लागून जे कोण गोरवां व्हरपाक येतात, तांचे वांगडा झगडीं करपाचे प्रकार बंद जातले, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
