भांगरभूंय | प्रतिनिधी
पणजी: हेडगेवार विद्यालय कुजिरा हांगा दर वर्सा मकरसंक्रात ते रथसप्तमी ह्या काळांत विद्यालयांतले पांचवी ते धावी मेरेनचे सगले विद्यार्थी विद्यालयांत आनी आपल्या घरा सेगीत सूर्य नमस्कार घालतात. अंदूं ह्या काळांत भुरग्यांनी घरा आनी विद्यालयांत मेळून वट्ट 363468 सूर्य नमस्कार घाले.
भुरग्यांनी वर्सभर नेमान व्यायाम करून आपली कूड आनी मन तंदुरुस्त दवरची आनी अभ्यासांतूय बरी प्रगती करची ह्या उद्देशान हो उपक्रम राबयिल्लो. अंदूं रथसप्तमीक ह्या सूर्य नमस्कार यज्ञाच्या समारोपा वेळार भारत स्वाभिमान संस्थेचे अधिकारी गोंय योग समितीचे जोड सचीव गिरीश प्रभू परुळेकार हे मुखेल सोयरे म्हूण जाल्यार विद्यालयाचे मुख्याध्यापक विलास सतरकार आनी कार्यावळीचे संयोजक आत्माराम उमर्ये हाजीर आशिल्ले.
गिरीश प्रभू परुळेकार हांणी विद्यालयांत सेगीत असो उपक्रम चलोवपी हेडगेवार विद्यालयाचें अभिनंदन केलें आनी भुरग्यांचो सर्वांगी विकास साद्य करपा खातीर हो उपक्रम उपेगी थारता अशें म्हणलें.
जीण ही स्वासाचेर चलता आनी आमी स्वास कसो घेतात आनी कसो सोडटात हाचेर आपली जीण निंबून आसता. नाकात स्वास नेमान चालूच आसता. पूण उजवे नाकपुडींतल्यान चलपी स्वासाक सूर्यस्वर आनी दावे नाकपुडींतल्यान चालू आशिल्ल्या स्वासाक चंद्रस्वर अशे म्हणटात. हे स्वर जाचे समतोल समान काळ आसतात ताची भलायकी निरोगी आसता अशें परुळेकार हांणी मुखार उलयतना म्हणलें.
तकली दुखप वा पोटांत दुखप वा न्हीद येना हें लेगीत स्वास नियंत्रीत केल्यार दुखण्याचेर वा न्हिदेचेर नियंत्रण दवरूंक शकतात. आनी तें नियंत्रण कार्यसूर्य नमस्कारान जायत आसता अशें तांणी म्हणलें. निरोगी आनी उत्साही जीण जगपाची गुरुकिल्ली म्हणल्यार सूर्य नमस्कार तें भुरग्यांनी नेमान घालचे असो संदेश तांणी भुरग्यांक दिलो.
कार्यावळीचें सुत्रसंचालन विद्यालयाच्यो गणीत शिक्षिका रुचिता देसाय हांणी केलें. प्रास्तावीक शिक्षिका विषया कांबळी हांणी केलें. सोयऱ्यांची वळख आनी येवकार शिक्षिका दिव्या मेढेकार जाल्यार सूयस्तुती अदिती बर्वे हांणी सादर केली.
कार्यावळीचे उपकार आत्माराम उमेर्य हांणी मानले. शिक्षिका अक्षता किनळेकार हांणी शांती मंत्र म्हणून कार्यावळीची सांगता केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
