भांगरभूंय | प्रतिनिधी
वाळपय: फाटल्या खूबशा वर्सां सावन अपघाताक कारण थारपी हेडग्या गोरवांच्या बंदोबस्ता खातीर होंडा पंचायतीन आक्रमक धोरण आपणायलां. रस्त्यार ठाण माडून बसत आशिल्ल्या गोरवांक आतां आळो बसतलो. कारण ते खातीर पंचायतीन दिवचल म्हालांतल्या सिकेरी हांगासरल्या गोशाळे बराबर कबलात केल्या. ते प्रमाण पंचायत वाठारांतल्या सगल्या शेतकारांक पयलीं सुचोवणी दिवपी नोटीस पंचायतीन जारी केल्या. हे नोटिसे खाला हेडग्या गोरवांचेर कारवाय जातली.
ह्या निर्णयाची अंमलबजावणी फुडल्या चार दिसांत सुरू जातली अशी म्हायती पंचायती वतीन दिली. ह्या पंचायत वाठारांतल्या राज्य महामार्ग वता. तशेंच ह्या वाठारांत आशिल्ल्या होंडा, पिसुर्लें उद्देगीक वसणुकेंत यो-वच करपी येरादारींत व्हड प्रमाणांत वाड जाल्या.
रस्त्यार खूबशे सुवातेर हेडगीं गोरवां चोंबो करून ठाण मांडून बसतात, आनी सेगीत येरादारीची कोंयडी करतात. तशेंच खूबशे फावटी जिवघेणे अपघात लेगीत जाल्यात. ताका लागून ह्या गोरवांचो बंदोबस्त करचो अशी मागणी नागरिकांनी वेळावेळार होंडा पंचायती कडेन केल्ली.
मजगतीं, पंचायतीचे सरपंच शिवदास माडकार हांणी सांगलें, होंडा पंचायतीन हेडग्या गोरवांचो सांबाळ करपी सिकेरींतल्या गोशाळे बराबर कबलात केल्या. तशेंच रस्त्यार भोंवपी गोरवांक धरून गोशाळेंत धाडपाची येवजण आंखल्या. ते खातीर पंचायती वतीन सगल्या शेतकारांक कळोवपा खातीर पयलींच सुचोवणी दिवपा खातीर नोटीस काडल्या अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
