भांगरभूंय | प्रतिनिधी
गोरवां सांबाळ खात्याचो आदेश, अनुदान वसूल करपाची शिटकावणी
भांगरभूंय । प्रतिनिधी
पणजीः गोंयांत रस्त्याचेर हेडपी गोरवांची समस्या सगळ्याच वाठारांनी दिश्टी पडटा. ह्या गोरवांक लागून येरादारीक आडखळ जाताच तशेंच तांकां लागून अपघात जातात आनी खूब जाणांक जीव वगडावचो पडटा. हाचेर उपाय म्हूण सरकारान रस्त्याचेर हेडपी गोरवां जप्त करपाचो निर्णय घेतला. हे विशीं गोरवां सांबाळ खात्याचे संचालक डॉ. नितीन नायक हांणी हालींच आदेश काडला.
आदेशांत म्हणलां, कामधेनू वा पशुपालन येवजणे खाला घेतिल्लीं गोरवां भौशीक सुवातांचेर वा रस्त्यांचेर भोंवतना दिसल्यार लाबार्थ्याक दिल्लें सगळें अऩुदान सरकार वसूल करून घेतलें. अश्या व्यक्तींक फुडारांत गोरवां सांबाळ खात्याच्या कसलेच येवजणेचो लाव मेळचो ना. तांकां सरकार काळे वळेरेंत घालतले. ह्यो दोन सोडून खात्याच्या हेर येवजण्यो घेतिल्ल्या व्यक्तींक लेगीत होच नेम लागू आसतलो.
फाटल्या कांय वर्सांत गोठ्यांतलीं गोरवां रस्त्याचेर हेडटना दिसलां. ताका लागून येरादारीची कोंयडी जाता तशेंच अपघात वाडटात. सामान्य लोक वा डॅरी शेतकारांनी तांचीं गोरवां भौशीक सुवातांचेर येवचीं ना, हाची जतनाय घेवप गरजेचें आसा. भौशीक सुवातांचेर वा रस्त्यांचेर राखण्या बगर अशीं गोरवां दिसल्यार कायद्या प्रमाण ती जप्त करतले, अशें आदेशांत स्पश्ट म्हणलां. मेळिल्ले म्हायती प्रमाण गोंयांत 2019 ते मे 2024 चे अखेरेक हेडग्या गोरवांक लागून 73 अपघात जाल्ले. तातूंत 13 मनशांक आनी 19 जनावरांक मरण आयिल्लें. हे आदीं पुलीस दळान गोरवां सांबाळ खात्याक गोंयभरांतल्या हेडग्या गोरवांच्यो सुवातो कळयल्ल्यो. येरादारी पुलीस विभागान उत्तर गोंयांत 55 जाल्यार दक्षीण गोंयांतल्या 91 सुवातांचेर हेडगीं गोरवां थपकल मारून बसतात, अशें कळयल्लें. अश्या जनावरांत रस्त्या वयल्यान व्हरपाची विनवणी लेगीत येरादारी पुलिसांनी केल्ली.
गावठीं गोरवां पोसल्यार दिसाक 80 रुपया
गोंरवां सांबाळ खात्या वतीन गोमंतक गोसंवर्धन येवजण अधिसुचीत केल्या. ते प्रमाण एका कुटुंबाक चडांत चड 5 गावठीं गोरवां पोसपाक मजत करतले. ते प्रमाण दरेका गोरवा फाटल्यान दिसाक 80 रुपया अर्थीक मजत दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
