भांगरभूंय | प्रतिनिधी
भांगरभूंय । खबरां मेज
पणजीः हें वर्स सोप मेरेन भारतांतल्या 20 टक्के लोकांक मानसीक दुयेंस जातलें. 5.6 कोटी लोक डिप्रेशनांत (निर्शेणी) वतले जाल्यार 3.8 कोटी लोकांक हेर मानसीक दुयेंसां जातलीं अशें संवसारीक भलायकी संघटनेन (डब्ल्यूएचओ) म्हणलां.
ऑक्टोबर 2021 वर्सा लॅन्सॅटांत उजवाडाक आयिल्लें एका संशोधनात भारतांतल्या मानसीक दुयेसांत 35 टक्क्यांनी वाड जाल्या अशें सांगलां. निमहांस (एनआयएमएचएएनएस) हांणी 2016 वर्सा केल्ल्या सर्वेक्षणांत भारतांतले 70 तें 80 टक्के लोक मानसीक दुयेंसान पिडेस्त आसतात मात तांका उपचार मेळनात अशें नमूद केलां. उपचारांतलो व्हो गॅप भरून काडपा खातीर तशेच मानसीक दुयेंस वेवस्थापना खातीर प्राथमीक भलायकी जतनाय घेतात तांकां प्रशिक्षीत करपाची गरज देशांत उप्रासल्या.
ते खातीर जिल्हो मानसीक भलायकी कार्यावळी खाला (डीएमएचपी) शुक्राराक वैजकी आनी नर्सिंग कर्मचाऱ्यां खातीर प्रशिक्षण कार्यशाळा आयोजीत केल्ली. मानसोपचारतज्ज्ञ डॉ पल्लवी धाकणे आनी आयपीएचबीची नर्सिंग सहाय्यक प्राध्यापक विठोबा म्हालकार हांणी तातूंत मार्गदर्शन केलें. दक्षीण गोंय जिल्हो हॉस्पिटलाचे वैजकी अधिक्षक डॉ राजेंद्र बोरकार ह्या वेळार मुखेल सोयरे म्हणून हाजीर आशिल्ले. कार्यशाळेंत 150 जांणानीं वांटो घेतिल्लो. मानसीक दुयेंतींचेर करपाचे उपचार, तांका दिवपाची वखदां तशेच ताचें समुपदेशन हे विशीं कार्यशाळेंत म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
