भांगरभूंय | प्रतिनिधी
महाराष्ट्रा सयत पांच राज्यांनी रोखड्योच जावपाच्यो आशिल्ल्या विधानसभा वेंचणुकांचेर भाजपाच्या फुडारपणा खालचें फाटोफाट तिसरे खेपे सत्तेर आयिल्लें सरकार आनी विरोधी इंडी आघाडी हांणी लक्ष केंद्रीत केलां. सगल्याच पांवड्यांचेर एकमेकांचेर वरचड जावपाची संद हे दोनूय गट सोडिनात. लोकसभेचें सध्या चालू आशिल्लें अर्थसंकल्पीय अधिवेशन आसूं वा उत्तर प्रदेश, महाराष्ट्रा सारक्या राज्यांतली विधानसभा वेंचणूक… सगले कडेन हें पळोवपाक मेळटा.
लोकसभेचे वेंचणुकेंत 98 जागे जिखपी काँग्रेस पक्षाक तर सध्या सपनां पडपाक लागल्यांत की विरोधी पक्ष फुडारी म्हूण घटनात्मक पद सांबाळपी राहुल गांधी आतां कितेंय बरोवन दिवपाच्यो गजाली सभाघरांत करपाक लागल्यात. जातीय लोकमेजणी करपाची तरतूद आशिल्लें विधेय आमी ह्याच सभाघरात मंजूर करतले, हें हांव बरोवन दितां, अशें ते परत परत सांगपाक लागल्यात. समाजवादी पक्षाच्या आदारान लोकसभेच्या जाग्यांची णव्वदी कशीबशी एकदाची हुपपी काँग्रेसीच्या राहुल गांधीच्या आंगांत सध्या जणू काय बारा हतयांचें बळगें संचारलां कशें दिसता. सभाघरांत आनी भायरुय राहुल गांधी अशा झेतांत वावुरता की जणू काँग्रेसीचो भांगराकाळ परत सुरू जाला. लोकसभा वेंचणुकेंतलें थोडेंशें येश राहुल गांधी आनी तांचे इंडी आघाडेंतल्या घटक पक्षांच्या तकलेक इतलें मारलां की केंद्रांतल्या भाजप सरकाराक चारुय वटेन वेटाळो घालपाक तांणी आतां नाका जाल्ल्या मार्गान आपले यत्न चालूच दवरिल्ल्याचें चित्र दिसता.
काँग्रेस, समाजवादी कांय राज्यांनी जावपी विधानसभा वेंचणुको तशेंच उत्तर प्रदेशांतल्या धा मतदारसंघांनी जावपी पोटवेंचणुकांचेर लक्ष केंद्रीत करून आक्रमक जाल्यात. लोकसभा वेंचणुकेंत जें कितें मेळयलें तें वगडावपाचो वेळ आपणाचेर येवचो न्हय म्हूण भाजपा आनी तांच्या केंद्रांतल्या सरकाराक चारुय वटेन घेरपाचो तांणी यत्न चलयला. आतां विरोधकांची ही चाल भाजपाकूय कळ्ळ्या. ताका लागून तांचे वटेंतल्यानूय विरोधकांचे खर हल्लो सुरू जाला. प्रधानमंत्री नरेंद्र मोदी आनी तांचे सरकार तशेंच विरोधी इंडी आघाडी हांचे मदीं सध्या साबार प्रस्नां वयल्यान चलिल्लें झूज पांच- स राज्यांतल्यो विधानसभा वेंचणुको जावन निकाल लागी मेरेन बंद जावपाची कसलीच शक्यताय दिसना. जातीय लोकमेजणेची राहुल गांधी आनी कंपनीची मागणी आसूं वा हेर खंयचेय विशय, विरोधकांचो आवाज सभाघरांत बळिश्ट जाल्लो दिसता आनी सुमार 234 वांगड्यांच्या बळग्याचेर सरकाराचो आवाज चेपपाचो जें पावल तांणी उखल्लां, ताका लागून सरकारुय सादूर जालां. विरोधकांक जशाक तशी जाप दिवप होच मार्ग तांणी स्विकारिल्लो दिसता. लोकसभा कामकाजा वेळार फाटल्या कांय दिसां सावन सरकाराचो बदलिल्लो पवित्रो दिसलो आनी जातीय लोकमेजणेच्या मागणेचेर राहुल गांधी हांकां घाल्ली गुगली कळून येता म्हणसर ते क्लिन बोल्ड जाल्ले.
महाराष्ट्र, हरयाणा आनी झारखंड तशेंच दिल्लींतूय रोखडीच जावपी विधानसभा वेंचणूक भाजप आनी काँग्रेसी खातीरुय तितलीच म्हत्वाची आसा. थंय आपापलें सरकार येवपाक कितेंय करपाचेर सध्या दोगांयचो भर आशिल्ल्याचें दिसता. काँग्रेस समाजवाद्यांक खिंडींत आडावपाक भाजपाचे केंद्रीय फुडारपण एकूय संद सोडपाक तयार ना. लोकसभा वेंचणुकेंत भाजपा आनी मुख्यमंत्री आदित्यनाथ योगी हांकां उत्तर प्रदेशांत आयिल्ल्या अपेसा वयल्यान समाजवादी फुडारी अखिलेश यादव हांणी तांची धींड काडपाची संद सोडली ना. पूण आतां एका नेण्टे चलयेचेर समाजवादी पक्षाच्या एका ज्येश्ठ फुडाऱ्यान केल्ल्या बलात्काराच्या प्रकरणान इतलें खर रुप घेतलां की ताचो जबरदस्त धपको समाजवादी पक्षाक येवपी पोटवेंचणुकेंत बसपाक शकता. राहुल गांधी आसूं वा इंडी आघाडेचे फुडारी ह्या प्रकरणाचेर सध्या मोने जाल्यात. देखून मोईद खान हांचें वासनाकांड तांच्या गळ्यांत आडकलां, असो निश्कर्श काडपाक मेळटलो. भाजपाक लोकसभा वेंचणुकेंत उत्तर प्रदेशांत जें कितें लुकसाण जालें, ताची व्याजा सयत भरपाय पोटवेंचणुकेंत करपाची आसा आनी ते खातीर मुख्यमंत्री आदित्यनाथ योगी आनी भाजपाचें केंद्रीय फुडारपण सध्या सज्ज जातना दिसता. अखिलेश यादव हांकां उत्तर प्रदेशांत भाजपाक लोकसभा वेंचणुकेंत आयिल्ल्या अपेसाक लागून केंद्रीय फुडारपण मुख्यमंत्री योगी हांकां काडटलें, अशें दिशिल्लें, तशेंच जावचें हाची ते वाट पळयताले, पूण तशें घडलें ना आनी मुख्यमंत्री योगी आनीक नेटान काम करपाक लागले. हाचोच धसको अखिलेश हांणी सध्या घेतिल्लो दिसता.
मुख्यमंत्री योगी हेच युपींत भाजपाची रूळा वयल्यान निसरिल्ली गाडी परत रूळार हाडपाक शकता, हाची कल्पना अखिलेश, राहुल हांकां आसा. देखून भाजपाक हारोवप्यांक फुडारपण कुशीक काडपाक शकना, असो दुश्ट प्रचार हे जोडयेन सुरू केलो. पूण तांकां तातूंत येश मेळ्ळें ना. योगी हांची हिंदू युवा वाहिनी, गोरखपीठ आनी गोरखपूर हांची शक्त कितें हाची जाणीव सगल्यांकूच आशिल्ल्यान योगींक हालोवप तशें सोंपें ना. योगींक मुख्यमंत्री पदा वयल्यान काडल्यार तें बुमरँग जावं शकता, हाची कल्पना सगल्यांकूच आसा. ताकाच लागून उत्तरप्रदेशांत भाजपाक परत तेंगशेर व्हरपाची जापसालदारकी तांकांच दिली जाल्यार अजाप धरपाचें कारण ना. विरोधकांच्या मार्गांतली मात ही व्हडली अडचण थारूं येता. तेवटेन महाराष्ट्रांतूय विधानसभा वेंचणुकांचे फाटभूंयेर महाविकास आघाडी आनी महायुतींत नेटाचें पेटलां. उबाठा शिवसेनेचे मुखेली उद्धव ठाकरे हांणी गृहमंत्री अमित शाह हांचो उल्लेख अब्दाली शाह असो करून सगल्यो मर्यादा हुपल्यात तर देवेंद्र फडणवीस हांणी उद्धव ठाकरे हांचें तकली जाग्यार नाशिल्ल्याची टिप्पणी केल्या. वेंचणुको जाहीर जाय मेरेन हो वाद तेंगशेर पावपाक शकता इतले राजकी वातावरण दुशीत जालां.
भाजप तर चड नेटान विरोधकांचेर वार करपाक लागला. संसदेंत ह्याच सप्तकांत मांडपाच्या वक्फ बो्ड कायदो सुदारणा विधेयक आजून उज्यात पॅत्राॅल रकोवंक शकता, अशी परिस्थिती आसा. विधानसभा वेंचणुकां आदलें हें झूज प्रत्यक्ष मतदान जाय मेरेन चालूच उरतलें, हातूंत दुबाव ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
