भांगरभूंय | प्रतिनिधी
युरी आलेमांवः रोजगार निर्मिती खातीर अर्थसंकल्पांत आराखड्याची तजवीज ना
भांगरभूंय । प्रतिनिधी
पणजी : कल्याणकारी येवजणे परस सरकार इव्हेंटाचेर चड खर्च करता. हें सरकार इव्हेंट मॅनेजमेंट सरकार आसा, अशी टिका युरी आलेमांव हांणी केल्या.
सरकारान सादर केल्ल्या अर्थसंकल्पांत रोजगार निर्मिती खातीर कसलोच आराखडो ना. म्हारगाय वाडोवन सामान्य मनशाचेर वजें घालपी हो अर्थसंकल्प आसा, अशें विरोधी पक्ष फुडारी युरी आलेमांव हांणी सांगलें.
सरकार स्वयंपूर्ण गोंयची घोशणा दीत आसलें तरी एकूय खातें स्वयंपूर्ण जावंक ना. गोंय घुंवळी वखदां, बावंन्सर, खून आनी गुंडाराजांत स्वयंपूर्ण जावपाक लागलां. अर्थसंकल्प सादर करतना मुख्यमंत्र्यांनी गोंयचे सुपूत बाकीबाब बोरकार हांचे कवितेचो उल्लेख केलो. सध्या शेतकारांक आदारभूत मोल मेळना, शेतां काबार जायत आसा, पर्यावरणाचो नाश जायत आसा. हाका लागून बाकीबाब बोरकार आशिल्ले जाल्यार ते सरकाराचे खर टिकाकार आसताले. तांचे कवितेची दरेकी ओळ सरकारान नश्ट केल्या, अशें युरी हांणी सांगलें.
कला अकादमी हें गोंयचे दायज थळ. नुतनीकरणाच्या नांवा खाला सरकारान कला अकादमीची स्थिती बाबत केली, तिचो खून केलो. हाचो परिणाम कलाकार तशेंच फुडले पिळगेक, गोंयकारांक भोगचे पडटले. कला अकादमी सयत स्मार्ट सिटीच्या नांवाचेर पणजेची वाट लावन उडयल्या. पणजे तशेंच हेर वाठारांतले रस्ते येरादारी खातीर धोकादायक जाल्यात. 3 कोटी 97 लाख रुपया खर्च करून हाडिल्ली सोलर फेरीबोट आयज विनावापर पडून आसा. ही बोट परवडपा सारकी ना, अशें आतां तज्ञ सांगतात. फेरीबोटीचेर जाल्ल्या खर्चाची भरपाय कोण, कशी करतलो, हें सरकारान स्पश्ट करपाक जाय, अशें युरी हांणी सांगलें.
सरकार 2 हजार कोटी रुपया रिणाचें कळंतर फारीक करपाचेर मोडटा. सरकाराचें रीण आतां 40 हजार कोटींचेर पावलां. आतां दरेकी गोंयकाराचेर 2 लाख 70 हजार कोटींचें रीण आसा, अशी आकडेवारी युरी आलेमांव हांणी सादर केली.
भलायकी खात्या खातीर चड निधीची तजवीज करपाची गरज आशिल्ली. फावो त्या प्रमाणांत निधीची तजवीज नाशिल्ल्यान भलायकेच्यो साधन सुविधा उबारप शक्य जावचें ना. येणावळ गळटीचें प्रमाण उणें करून येणावळ वाडोपाक प्राधान्य दिवपाची घोशणा अर्थसंकल्पांत आसा. वीज, खण ह्या खात्यांनी फाटल्या वर्सांनी अदमासा परस उणी येणावळ सरकाराक आयल्या. समाज कल्याण खात्याच्या येवजणेचे 21.44 कोटी रुपया प्रलंबीत आसात, असो आरोप युरी हांणी केलो. राष्ट्रीय शिक्षण धोरणाच्या कार्यवाहींत लेगीत घुस्पागोंदळ आसा. शिक्षण खात्यांत 800 पदां रितीं आसात. शिक्षकांचो उणाव आसतना राष्ट्रीय शिक्षण धोरणाची कार्यवाही योग्य रितीन कशी जातली, असो प्रस्न युरी आलेमाव हांणी केलो.
सरकाराच्यो येवजण्यो अपेशी
हें सरकार नव्यो घोशणा करीत आसा. गोवा बाझार ही हाची एक देख आसा. गोवा बाझाराक उर्बा दिवपा खातीर सरकारान 15 लाख 57 हजार रुपया खर्च केल्यात. ताच्या बदलांत गोवा बाझारांतल्यान 17 हजारांची येणावळ आयल्या. मुख्यमंत्री फेलोशीप कार्यावळींतल्यान फक्त 23 जाणाक कायमस्वरूपी रोजगार उपलब्ध जाला. ही येवजण लेगीत अपेशी थारल्या. सरकार नोकऱ्यो तयार करपाच्यो घोशणा करता, मात प्रत्यक्षात बेरोजगारी वाडत आसा. मुख्यमंत्री अप्रेंटिशीप येवजणेक लागून शिक्षण सोडपाच्या प्रकारांत वाड जाल्या, अशें युरी आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
