भांगरभूंय | प्रतिनिधी
मुळाव्या सुविधां खातीर निधी नासतना इवेंटांचेर कोट्यांनी खर्च
विरोधकांची अर्थसंकल्पाचेर टिका
पणजी: राष्ट्रीय शिक्षण धोरणाची कार्यवाही तशेंच मुळाव्या सुविधां खातीर सरकारा कडेन निधी नासतना फॉम्युर्ला कार सारख्या इवेंटांचेर सरकार कोट्यांनी रुपया खर्च करता. हें इवेंट मॅनेजमेंट सरकार आशिल्ल्याची टिका काँग्रेसीचे आमदार अॅड. कार्लुस फेरेरा हांणी केली.
मुख्यमंत्री डॉ. प्रमोद सावंत हांणी शुक्रारा सभाघरांत 2027 – 2028 वर्सा खातीरचो अर्थसंंकल्प सादर केलो. ह्या अर्थसंकल्पाचेर सोमारा सावन सभाघरांत चर्चा सुरू जाली. विरोधी पक्षां वतीन सोमारा काँग्रेसीचे अॅड. कार्लुस फेरेरा आनी गोवा फॉरवर्डाचे विजय सरदेसाय हांंचीं भाशणां जालीं.
हें सरकार इवेंटांचेर भरपूर पयसो खर्च करता. अंदूंचो अर्थसंकल्प हो दिशाहीन आसा. रोजगार निर्मिती खातीर कसलीच तजवीज अर्थसंकल्पांत ना, अशें अॅड. कार्लुस फेरेरा हांंणी सांंगलें.
मुख्यमंंत्री डॉ. प्रमोद सावंत हांणी सादर केल्लो कृती अहवाल लेगीत चुकीचो आनी दिशाभूल करपी आसा. हळदोणें मतदारसंघात खूबशीं कामां सुरू जावंक नात, मात ती पुराय जाल्ल्याचो उल्लेख कृती अहवालांत आसा अशें कार्लुस फेरेरा हांणी सांगलें.
अर्थसंंकल्प हो बोमाडो : विजय सरदेसाय
हो अर्थसंंकल्प म्हणल्यार बोमाडो आसा. भायल्यान तो बोमाड्या भशेन आकर्शक दिसता मात भितर फक्त हवा आसा. अर्थसंकल्पांत फुडाराची दिका ना. अर्थसंकल्प म्हणल्यार फक्त राजकी घोशणाबाजी आसा अशी टिका आमदार विजय सरदेसाय हांंणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
