हेंच काय तें अतिथी देवो भव: ??

भांगरभूंय | प्रतिनिधी

फाटल्या दोन वर्सांनी पर्यटक वाडपाक लागल्यात. तेन्ना असल्यो कळंगुटे सारक्यो घडणुको परत घडच्यो नात हाची जतनाय आमी घेवपाक नाका?

पर्यटन हो भरपूर अर्थीक येणावळ दिवपी व्हडलो उद्देग. पर्यटनाचेर जगपी देश आसात. म्हणटकच पर्यटनाक कसलीच बादा येवची ना, हाची आमी जतनाय घेवपाक जाय. कारण ताचो प्रत्यक्ष परिणाम येणावळीचेर जाता. अतिथी देवो भवः, ही टॅग लायन आमचें केंद्र सरकार वापरता. तैत्तिरीयोपनिषद आनी शिक्षावल्ली उपनिषद हांच्या इकराव्या खंडांनी हो श्लोक आसा. अतिथींचो आदर करप हें भारतांतलें पोरणें हिंदू, बौद्ध तत्वज्ञान. आवय, बापूय आनी गुरू हेय देवा समान असोय उल्लेख आसा. तांकां आनी सोयऱ्याक हो दर्जो, भोवमान दिला. देव समजा आमच्या घरा, गांवांत आयलो जाल्यार आमी ताका जशी वागणूक दितले, तशी पर्यटकांक दिवपाक जाय. पूण हें जाताच अशें ना. दिवाळेचे रातीं कळंगूटे पर्यटकां कडेन दोग टॅक्सी ड्रायव्हर जे तरेन वागले ती वागणूक अतिथीक देवा भशेन वागोवपा सारकी नाशिल्ली.
गोंयांत अंदूं मे मेरेन 8 लाख 32 हजार पर्यटक आयल्यात. तातूंत 2 लाख 16 हजार विदेशी आसात. 2022 त 71 लाख 18 हजारां वयर पर्यटक आयिल्ले. अंदूं हो आंकडो 1 कोटीक तेंकतलो असो सरकाराक विस्वास आसा. कारण आॅक्टोबर ते जानेवारी मेरेन सगल्यांत चड पर्यटक येतात. थळाव्या पर्यटकांचो फायदो जाताच, पूण जितले चड विदेशी पर्यटक येतात, तितली चड येणावळ मेळटा. गोंयांत चडशे पर्यटक येतात, ते दर्यावेळो पळोवपाक, उपरांत पोरणें गोंयच्यो चर्ची. सरकारी आंकड्यां प्रमाण, भारतांत पोरूं 1 अब्ज 73 कोटी लोकांनी पर्यटन केलें. तातूंत 90 लाखां परस चड विदेशी आशिल्ले. 2022 वर्सा परस ही वाड 48.6 टक्के चड आसा. चडशे विदेशी अमेरिका, बांगलादेश, युके हांगाचे. पोरूंचे जीडीपींत 9 टक्के वांटो पर्यटन आनी भोंवडेचो आशिल्लो. अंदूं एक कोटी वयर विदेशी पर्यटक येतले असो सरकाराक विस्वास आसा. देशाक सगल्यांत चड येणावळ मेळटा ती ताजमहाला कडल्यान. (2022- 23 त 81.89 कोटी रुपया फक्त तिकेटी विकून मेळिल्ले.) उपरांत गोंय, जयपूर, लेह- लडाख, केरळाचो नंबर लागता. हाचे वयल्यान, पर्यटना वरवीं प्रत्यक्ष, अप्रत्यक्ष कितलो दुडू मेळटा आसतलो, ताचो फक्त अदमास करचो!
गोंयांत पर्यटकांक बडोवपाच्यो, तांकां लुटपाच्यो घडणुको जाल्यात. दिसाळ्यांनी, सोशल मिडियाचेर आयल्यात, त्यो लोकांक खबर आसा. जपानाच्या पर्यटकान आपणाक 9 लाख रुपयांक लुटलो, तें सांगिल्लें. पोरूं फेब्रुवारींत ही घडणूक गाजिल्ली. कर्नाटकांतल्या कांय पर्यटकांक बडयिल्ले, तेंय प्रकरण गाजिल्लें. आतां कळंगूटे मोटार कुशीक काडपाच्या कारणा वयल्यान दोन थळाव्या टॅक्सी ड्रायव्हरांनी पुण्यांतल्या शेख कुटुंबाक मारपेट केली. एका गोंयकार ड्रायव्हराक अटक केल्या. दुसरो सांज मेरेन मेळूंक नाशिल्लो. मोटारी मुखार आशिल्ली दुसरी मोटार काडपाची विनवणी केली, म्हूण ताणें गाळी संवल्यो. मागीर दुसरो एक ड्रायव्हर येवन दोगांयनी आमकां बडयले. आमी व्हिडियो काडटात तें पळोवन ते पळून गेले, अशी कागाळ तांणी पुलिशेंत केल्या. अतिथी देवो भवः हाका खत लावपी ही घडणूक. हो व्हिडियो व्हायरल जाला. ताचो पर्यटनाचेर परिणाम जावं येता. गोंया विशीं एक प्रकारची भिरांत पर्यटकांच्या मनांत निर्माण जाल्या आसतली. तरीय गोंयच्या आकर्शणाक लागून मोनेळ पडिल्ले भशेन ते हांगा येतात. तांकां हांगा सुरक्षीत दिसपाक जाय. फाटल्या दोन वर्सांनी पर्यटक वाडपाक लागल्यात. तेन्ना कळंगूटे सारक्यो घडणुको परत घडच्यो नात हाची जतनाय आमी घेवपाक नाका?
गोंयांत भायल्यां विशीं एक प्रकारची तिडक तयार जाल्या. भायले येतात, आमच्यो जमनी, नोकऱ्यो घेतात, कामां, धंदेय हातासतात, अशेंय कांय जाणांक दिसपाक लागलां. तातूंत तथ्य आसा. पूण हाका जापसालदार कोण तेंय पळोवपाक जाय. म्हारगाय वाडल्या, दरेका मळाचेर सर्त वाडल्या, पयलीं सारको वेवसाय जायना, दोनूय विमानतळ, दूदसागर घसघसो आनी हेर कडल्या टॅक्सीकारां मदीं वाद, निरशेणी जाणवता. कळंगूटे जालें तो ताचोय परिणाम आसूं येता. खंयची तिडक खंय भायर सरत हें कोणाक सांगपाक येना. तातूंत ते दोगूय नशेंत आशिल्ले, असो दावो कागाळ करपी पर्यटक कुटुंबान केला. खरें, फट कितें तें पुलिसांनी सोदचें. दोशींक ख्यास्त दिवची. गोंयकारांनीय, पर्यटन ही भांगराचीं तांतयां दिवपी कोंबी हें विसरचें न्हय.