भांगरभूंय | प्रतिनिधी
राज्यांत अपघातांचें प्रमाण वाडलां. तातूंत दुचाकी चलोवपी चड आसात. चडशे हॅल्मेट घालूंक नाशिल्ल्यान तकली आपटून मरतात. तरीय बरेच दुचाकी चलोवपी तें घालपाक तयार नात. कायद्यान हॅल्मेट घालप सक्तीचें आसा. हॅल्मेट, सीट बेल्ट घालीना जाल्यार तालांव पडटा. ताका लागून थोडे दुचाकी चलोवपी ते घालतात. जांणी तें हाडूंक ना, ते पुलीस दिसले काय पयस अर्द वर पसून उबे रावतात आनी ते गेले काय वतात. नाजाल्यार दुसरो रस्तो धरतात. सध्या रस्तो सुरक्षा सप्ता चलता. जनजागृतीचो एक वांटो म्हूण, स्कूटरकारांक शिस्त लागची म्हूण सरकारान ‘नो हॅल्मेट, नो पॅत्राॅल’ धोरण लागू केलां. म्हणल्यार हॅल्मेट घालीनात तांकां पॅत्राॅल पंपधनी पॅत्राॅल दिवचे नात…. आनी दुचाकी चलयतलो जाल्यार पॅत्राॅला बगर पर्याय ना. इलेक्ट्रीक दुचाकी चलोवपी ह्या नेमांतल्यान सुटले, अशें कोणें समजूचें न्हय.
गोंयांतल्या अपघातां विशीं, तांचे फाटल्या कारणां विशीं दर म्हयन्याक दिसाळ्यांनी डझनभर तरी लेख, पत्रां येतात. इतलें हें प्रकरण गंभीर जालां. वर्साक तिनशे वयर तरणाटे मरतात. ताचे तिपटीन जखमी जातात. कांयजाण दिव्यांगूय जातात आसतले. रस्त्यांची बाबत अवस्था, हेडगीं गोरवां (हातूंत गायीय आसात.), रस्ताद सुणीं, वेगान, सोरो पियेवन, मोबायलाचेर मॅसेजी वाचत, बायल- गर्लफ्रेंडा कडेन गजाली मारीत गाडी चलोवप, जागरणां अशा कांय कारणांक लागून अपघात जातात. एकल्याचे निश्काळजी खातीर दुसरो त्रासांत पडटा. तातूंत ती बस आसल्यार कितेंय जावं येता. दुचाकी चलोवप्यांनी हॅल्मेट घालें, मोटार चलोवप्यान सीट बेल्ट लायलो जाल्यार अपघातांतल्यान जीव वांचपाची शक्यताय आसता. दुचाकी वयलो आपले आपूण पडलो जाल्यारुय हॅल्मेटाक लागून जीव वाटावंता. म्हणटकच तें घालपाकूच जाय. हॅल्मेट ही तकलेक घालपाची वस्त, हातांत लांबोवपाची वा हॅण्डलाक हुमकळोपाची न्हय. दरेकल्या चलोवप्याचो स्वताचेर अतिविस्वास आसता. आपणाक कांयच जावंचें ना, अशें तांकां दिसता. मात, ल्हानशें फोंडकूल, गोरवां, सुणीं, रानदुकर, गवे धोक्याचे थारूं येतात. तुमी नेमाक धरून गाडी चलयता आसत, पूण फुडल्यान, फाटल्यान येवपी अतिशाणो, कानांत वारें भरिल्लो ड्रायव्हर तुमकां फोंडांत घालूं शकता. घडये कांय जावंचें ना, असो तुमकांय आत्मविस्वास आसत, पूण घरा कडेन तुमचो आवय, बापूय आसा. बायल, भुरगीं आसात. तुमची तीं वाट पळयतात, हाचो विचार करात. गाडी सांबाळून चलयात. घरांतले जोडकार तुमी एकलेच आसल्यार फाटल्यान उरिल्ल्यांचें कितें जातलें, हाचोय विचार करात.
कांय दुचाकी चलोवपी हॅल्मेटा विशीं कागाळी सांगतात. फाटल्यान गाडी येता जाल्यार तिचो आवाज आयकूंक येना. तकलेचेर चड वजें आशिल्ले सारकें दिसता. थोडे मान दुखता म्हणटात. तातूंत वारें घोळना. घामाघूम जावपाक जाता. ताका लागून कांय जाण गर्मेच्या दिसांनी हॅल्मेट घालीनात. सवकास गेल्यार हॅल्मेटाची गरज ना, अशेंय दिसपी लोक आसात. हॅल्मेटाक लागून खास करून पावसाच्या दिसांनी सारकें दिसना. थोड्यांक तें म्हारग दिसता. आतां कांय दुचाकी चलोवप्यांक मुफत हॅल्मेट दिवपाचो निर्णय येरादारी खात्यान घेतला. तो चालीकूय लायला. हॅल्मेट हें फॅशनी खातीर न्हय, हाचीय जाणवीकाय तरणाट्यांनी दवरपाक जाय. गोंयांतल्या अपघातांचो आंकडो पळयल्यार हांगा रेसी वेळार दुचाकी चलोवपी जशे कोपरांक, धोंपरांक कांय जावचें न्हय, म्हूण जतनाय घेतात, तशे उपाय घेवपाचो वेळ आयला. पणजे सारक्या राजधानी शारांत रावल्यार दुचाकी कितल्यो वाडल्यात ताचो अदमास येतलो.
हॅल्मेट नासल्यार पॅत्राॅल दिवचे ना, अशें सरकारान थारायलें तरी फक्त पॅत्राॅल पंपा लागसार हॅल्मेट घालून पंप धनयाक (खरें म्हणल्यार स्वताकूच) फटोवपी स्कूटरकार आसचे नात कित्या वयल्यान? ह्या धोरणाक कितलो तेंको मेळटा वा तें कितलें यशस्वी जाता, ताचो अभ्यास पयलीं करचो पडटलो. पूण ताचे परस पुलिसांची नदर चड परिणाम करपी थारतली. शारांनी येवपी, म्हामार्गांचेर दुचाकी चलोवपी चडशे हॅल्मेट घालतात. तरीय तें घालिनासतना हेडपी शेंकड्यांनी लोक आसात, हें न्हयकारुन चलचें ना. हॅल्मेट ना जाल्यार पॅत्राॅल दिवप ना, हें धोरण तशें बरें, पूण वयर म्हणलां तशे पंपधनयाक फटोवपाचे यत्न जावचे नात, कित्या वयल्यान? ते जावचे न्हय. हॅल्मेट घालप गरजेचेंच, पूण आयकता कोण?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
